قونايەۆ قالاسىنا قاراستى شەڭگەلدى اۋىلدىق وكرۋگىنىڭ كەربۇلاق جانە سارىبۇلاق اۋىلدارىندا جىلدار بويى تۇرعىنداردى الاڭداتقان اۋىز سۋ ماسەلەسى وڭ شەشىمىن تاپتى. ەندى بۇل ەلدىمەكەندەردە سۋ قىسىمى ايتارلىقتاي كوتەرىلىپ، حالىقتىڭ كۇندەلىكتى تۇرمىسىنداعى ەڭ وزەكتى تۇيتكىلدەردىڭ ءبىرى جويىلدى.وسىعان دەيىن اۋىل تۇرعىندارى اسىرەسە جاز مەزگىلىندە سۋ تاپشىلىعىن قاتتى سەزىنەتىن. كۇن ىسىعان ۋاقىتتا باۋ-باقشا سۋارۋ، مال-جانعا قاراۋ، ءۇي شارۋاسىنا قاجەتتىلىك ارتقان سايىن ورتالىق جۇيەدەگى سۋ قىسىمى كۇرت تومەندەپ، كەي ۇيلەرگە سۋ مۇلدە جەتپەي قالاتىن.
اتالعان ەكى اۋىلدا بۇگىندە 437 ابونەنت تىركەلگەن. بۇعان دەيىن ەلدىمەكەندەر 300 تەكشە مەترلىك رەزەرۆۋار ارقىلى عانا سۋمەن قامتىلىپ كەلگەن. الايدا تۇتىنۋ كولەمى ارتقان سايىن بۇل قۋات جەتكىلىكسىز بولدى. وسىعان بايلانىستى قوسىمشا 25 تەكشە مەتر سۋ جينايتىن سۋ مۇنارالارى ورناتىلىپ، جۇيەگە قوسىلدى.
مامانداردىڭ ايتۋىنشا، سۋ مۇناراسى سۋ جۇيەسىندەگى قىسىمدى تۇراقتى ۇستاپ تۇراتىن ماڭىزدى ينجەنەرلىك قۇرىلعى سانالادى. مۇنارا بيىكتە ورنالاسقاندىقتان، جينالعان سۋ تومەنگە تابيعي قىسىممەن تارالادى. سونىڭ ارقاسىندا سۋ تەك ورتالىق كوشەلەرگە ەمەس، ەڭ شەتكى ۇيلەرگە دەيىن ءبىرقالىپتى جەتەدى.
وزگەرىستى تۇرعىندار دا بىردەن بايقاعان.
«سۋ مۇناراسى ىسكە قوسىلعانىنا ءۇش كۇننەن استى. ءقازىردىڭ وزىندە ايىرماشىلىق انىق سەزىلەدى. بۇرىن كەي ۋاقىتتا سۋ جىڭىشكەرىپ، كەيدە مۇلدە توقتاپ قالاتىن. ءقازىر قىسىم الدەقايدا جاقسى. ەندى الاڭسىز كوكونىس ەگىپ، جەمىس-جيدەك سۋارىپ، كۇندەلىكتى تىرلىگىمىزدى جاسايتىن بولدىق»، – دەيدى سارىبۇلاق اۋىلىنىڭ تۇرعىنى قۋانىش.
شەڭگەلدى اۋىلدىق وكرۋگى اكىمىنىڭ ورىنباسارى جاندوس مانەيەۆتىڭ ايتۋىنشا، ماسەلە ۇزاق ۋاقىت باقىلاۋدا بولىپ، تۇرعىنداردىڭ ءوتىنىشى نەگىزىندە شەشىلگەن.
«مۇنىمەن جۇمىس توقتامايدى. قونايەۆ قالاسىنىڭ كەشەندى دامۋ جوسپارىنا سايكەس، الداعى ۋاقىتتا كەربۇلاق، سارىبۇلاق، شەڭگەلدى جانە اقوزەك ەلدىمەكەندەرىندەگى سۋ قۇبىرلارى تولىق جاڭارتىلادى. جوبالىق-سمەتالىق قۇجاتتارى دايىندالىپ، مەملەكەتتىك ساراپتامانىڭ وڭ قورىتىندىسى الىنعان»، – دەدى ول. سوڭعى جىلدارى شەڭگەلدى اۋىلدىق وكرۋگىندە ينفراقۇرىلىمدى جاڭعىرتۋ جۇمىستارى كەزەڭ-كەزەڭىمەن جۇرگىزىلۋدە. بىلتىر بەس اۋىلعا جاڭا جول توسەلسە، بيىل تىرشىلىك نارىنە قاتىستى تۇيتكىل تارقاتىلدى.