قونايەۆ قالاسىندا توزىعى جەتكەن كارىز جەلىلەرىن تولىق جاڭعىرتۋ باستالادى. جۋىردا قونايەۆ كوشەسىنىڭ بويىندا جانە حقكو عيماراتىنىڭ الدىندا بولعان اپاتتاردان كەيىن ينجەنەرلىك كوممۋنيكاسيالاردى مەرزىمىنەن بۇرىن اۋىستىرۋ تۋرالى شەشىم قابىلداندى.

ەسكە سالايىق، بىرنەشە اپتا بۇرىن قالاداعى ورتالىق كوشەلەردىڭ بىرىندە اسفالت وپىرىلىپ، اپاتتى جاعداي تىركەلگەن ەدى. مامانداردىڭ ايتۋىنشا، وعان ەسكىرگەن كارىز قۇبىرلارى سەبەپ بولعان. قازىرگى تاڭدا اپات سالدارى جويىلعانىمەن، مۇنداي جاعدايلاردىڭ قايتالانۋ ءقاۋپى ءالى دە ساقتالىپ وتىر.

ماسەلەنىڭ قالاي شەشىلەتىنى تۋرالى قونايەۆ قالاسى اكىمىنىڭ ورىنباسارى تيمۋر اقمىرزايەۆ ايتىپ بەردى. ونىڭ سوزىنشە، «ەنەرگەتيكالىق جانە كوممۋنالدىق سەكتوردى مودەرنيزاسيالاۋ» ۇلتتىق جوباسى اياسىندا كارىز جەلىلەرىن قايتا جاڭارتۋ جانە سالۋ بويىنشا كەشەندى جۇمىستار جوسپارلانعان.

«قازىرگى كارىز قۇبىرلارى 58 جىل بۇرىن سالىنعان. ۇلتتىق جوبا اياسىندا ولاردى جاڭارتۋ 2027 جىلعا جوسپارلانعان بولاتىن. الايدا سوڭعى اپاتتاردان كەيىن جوبانى جەدەلدەتىپ، قۇرىلىستى 2026 جىلعا اۋىستىرۋ تۋرالى شەشىم قابىلداندى. ۇزىندىعى 6 شاقىرىمنان اساتىن كارىز جەلىلەرى تولىق جاڭعىرتىلادى. قۇرىلىس جۇمىستارى الداعى ءبىر اي ىشىندە باستالادى»، – دەدى اكىم ورىنباسارى.

بۇدان بولەك، بيىل ۇلتتىق جوبا شەڭبەرىندە الماتى جانە سەيفۋللين كوشەلەرىندەگى اۋىز سۋ جەلىلەرىن جاڭارتۋ باستالادى. سونىمەن قاتار جىلۋ جۇيەلەرىن مودەرنيزاسيالاۋ بويىنشا ەكى ءىرى جوبانى ىسكە اسىرۋ جوسپارلانعان.

«2026 جىلى ۇلتتىق جوبا اياسىندا ينجەنەرلىك ينفراقۇرىلىمعا قاتىستى 5 جوبا جۇزەگە اسىرىلادى. كەلەسى جىلعا تاعى 4 جوبا جوسپارلانعان. ناتيجەسىندە قالاداعى 67 شاقىرىم ينجەنەرلىك جەلى جاڭعىرتىلادى»، – دەدى تيمۋر اقمىرزايەۆ.

سونىمەن قاتار قالادا 11 كارىز-سورعى ستانسياسىن جاڭعىرتۋ جۇمىستارى قاتار جۇرگىزىلۋدە. قازىرگى تاڭدا ەكى نىساندا قۇرىلىس-مونتاج جۇمىستارى ءجۇرىپ جاتىر. جوبانى جاقىن ارادا تولىق اياقتاۋ كوزدەلىپ وتىر.

اكىم ورىنباسارىنىڭ ايتۋىنشا، كارىز-سورعى ستانسيالارى – بۇكىل سۋ بۇرۋ جۇيەسىنىڭ نەگىزگى بولىگى. ولار اعىن سۋلاردى تازارتۋ نىساندارىنا ايدايدى. سورعى جابدىقتارىن اۋىستىرۋ جانە ستانسيالاردى جاڭارتۋ جۇيەنىڭ سەنىمدىلىگىن ارتتىرىپ، تۇرعىندارعا كورسەتىلەتىن كوممۋنالدىق قىزمەت ساپاسىن جاقسارتۋعا مۇمكىندىك بەرەدى.

قالاداعى تاعى ءبىر وزەكتى ماسەلە – تازارتۋ نىساندارىنىڭ ابدەن توزۋى. قازىرگى كارىز-تازارتۋ جۇيەسىنىڭ توزۋ دەڭگەيى 100 پايىزعا جەتكەن. وسىعان بايلانىستى مەملەكەتتىك-جەكەمەنشىك ارىپتەستىك اياسىندا جاڭا كارىز-تازارتۋ كەشەنىنىڭ قۇرىلىسى جۇرگىزىلۋدە.

جاڭا نىسان قونايەۆ قالاسىنان 20 شاقىرىم جەردە ورنالاسادى. ءقازىر قۇرىلىس الاڭىندا جەر جۇمىستارى باستالعان. كەشەننىڭ قۋاتتىلىعى ساعاتىنا 1600 تەكشە مەتر سۋدى قابىلداۋعا جەتەدى.

بۇل جوبا قالا تۇرعىندارى ءۇشىن اسا ماڭىزدى. سەبەبى ەسكى تازارتۋ نىساندارىنان شىعاتىن جاعىمسىز يىسكە قاتىستى تۇرعىنداردان ءجيى شاعىم تۇسەتىن. جاڭا كەشەن ىسكە قوسىلعاننان كەيىن ەسكى نىسان رەكۋلتيۆاسيالانىپ، ەكولوگيالىق ماسەلە تولىق شەشىمىن تاپپاق.

قۇرىلىس جۇمىستارىن ەكى جىل ىشىندە اياقتاۋ جوسپارلانىپ وتىر. جوبانىڭ جالپى قۇنى – 33 ملرد تەڭگە.

وسىلايشا، قونايەۆتا ونداعان جىل بويى جاڭارتىلماعان ينجەنەرلىك ينفراقۇرىلىمدى كەزەڭ-كەزەڭىمەن مودەرنيزاسيالاۋ ءجۇرىپ جاتىر.