وبلىس اكىمى بەرىك ءۋالي جەڭىس كۇنى قارساڭىندا سوعىس ارداگەرى، مەرەكە كۇندەرىنە وراي ماسكەۋگە بارعان گريگوريي مالاروۆقا بايلانىسقا شىعىپ، مەرەكەمەن قۇتتىقتادى.

ايماق باسشىسى بۇگىندە اباي وبلىسىنداعى كوزى ءتىرى جالعىز مايدانگەرگە قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ قۇتتىقتاۋ حاتىن وقىپ بەردى.

«ءسىزدىڭ ءومىر جولىڭىز جاس ۇرپاق ءۇشىن شىنايى وتانسۇيگىشتىكتىڭ ۇلگىسى بولىپ سانالادى. «ەشكىم دە ۇمىتىلمايدى، ەشنارسە دە ۇمىت قالمايدى» – جەڭىس كۇنىنىڭ بارلىق ءمان-ماعىناسى وسى سوزدەرگە سىيىپ تۇر. حالقىمىز مايدانگەرلەر مەن تىل ەڭبەككەرلەرىنىڭ تەڭدەسسىز ەرلىگىن ءاردايىم ەستە ساقتاپ، قۇرمەتتەيتىن بولادى. بارشا وتانداستارىمىزدىڭ اتىنان سىزگە زور دەنساۋلىق پەن باق-بەرەكە تىلەيمىن!»، – دەلىنگەن قۇتتىقتاۋدا.

ارداگەرگە مەملەكەت تاراپىنان 5 ميلليون تەڭگە قارجىلاي سىياقى بەرىلدى.

بيىل جازدا 100 جاسقا تولاتىن گريگوريي مالاروۆ 19 جاسىندا وتان قورعاۋعا اتتانىپ، سوعىس جىلدارىندا مايدان جولىنان ءوتتى. 2ء-شى بالتىق مايدانى قۇرامىندا ەستونيا مەن پولشانى ازات ەتۋ شايقاستارىنا قاتىسىپ، بەرلينگە دەيىن جەتتى. مايدانداعى قايسارلىعى ارقىلى جەڭىستى جاقىنداتۋعا ءوز ۇلەسىن قوستى.

سوعىستان كەيىنگى جىلدارى ءشۇلبى گەس-ىندە باس ەكونوميست قىزمەتىن اتقاردى. ەنەرگەتيكا سالاسىنىڭ دامۋىنا قوسقان ۇلەسى مەن كوپ جىلعى ادال ەڭبەگى ءۇشىن «ەرەن ەڭبەگى ءۇشىن» جانە «ەڭبەك ارداگەرى» مەدالدارىمەن ماراپاتتالدى.

ايماق باسشىسى بۇگىن سونداي-اق سەمەي قالاسىندا تۇراتىن تىل ارداگەرلەرى شايحسليام ۇسكەنبايەۆ پەن يۆان بەلگەردىڭ شاڭىراعىنا بارىپ، مەرەكەمەن قۇتتىقتادى.

شايحسليام ۇسكەنبايەۆ سوعىس باستالعان جىلى 13 جاستا بولعان. اكەسى سول جىلدارى ەڭبەك ارمياسىنا كەتىپ، شەشەسى اۋىلدا قالىپ اسكەرلەرگە قولعاپ توقىپ، اۋىل شارۋاسىنا ارالاسقان. ول 14 جاسىنان باستاپ كولحوز جۇمىسىندا ەڭبەك ەتتى. 

مايداننان كەيىنگى جىلدارى حالىق دەپۋتاتتارى كەڭەسى جانىنداعى اۋىلدىق كەڭەستىڭ ءتوراعاسى قىزمەتىن اتقارىپ، ەل ىشىندە سىيلى ازامات رەتىندە تانىلدى. قوعامدىق جۇمىستارعا بەلسەنە ارالاسىپ، ءوڭىردىڭ الەۋمەتتىك دامۋىنا ۇلەس قوستى. بۇگىندە سەمەي قالاسىندا ۇرپاقتارىنىڭ ورتاسىندا باقىتتى عۇمىر كەشىپ وتىر. توقسان سەگىز جاسقا كەلگەن قاريا سوعىس جىلدارىنداعى جانقيارلىق ەڭبەگى ءۇشىن ءبىرقاتار مەملەكەتتىك ناگرادالارمەن ماراپاتتالعان. اقساقال لەبىزىن ءبىلدىرىپ، كەيىنگى ۇرپاققا اق باتاسىن بەردى.

يۆان بەلگەر 1927 جىلى دۇنيەگە كەلگەن. ەكىنشى دۇنيەجۇزىلىك سوعىس باستالعان كەزدە ەڭبەككە ەرتە ارالاسىپ، ورمان شارۋاشىلىعىندا جۇرگىزۋشى، كەيىن مەحانيك بولىپ ۇزاق جىل ەڭبەك ەتتى. مايدان جىلدارىندا قازاقستانعا جەر اۋدارىلعان بەلگەرلەر وتباسى پاۆلودار وڭىرىنە قونىستانىپ، كەيىن مايقاراعاي ورمان شارۋاشىلىعىندا تۇراقتاعان. يۆان يۆانوۆيچ نەبارى 15 جاسىندا ۇلكەن جۇك كولىكتەرىن جۇرگىزىپ، ەڭبەك مايدانىنا ارالاستى. كەيىن ەكىباستۇز قالاسىندا كومىراۆتوماتيكا سالاسىندا باس مەحانيك بولىپ ەڭبەك ەتىپ، 58 جىلدىق ەڭبەك وتىلىمەن زەينەتكە شىققان. قازىرگى تاڭدا سەمەي قالاسىندا تۇرادى. 99 جاستاعى قاريا «ەرەن ەڭبەگى ءۇشىن»، «تىڭ جەرلەردى يگەرگەنى ءۇشىن»، «ەڭبەك ارداگەرى» سەكىلدى كوپتەگەن مەدالدارمەن ماراپاتتالعان.

وبلىس اكىمى تىل ەڭبەككەرلەرىن جەڭىس كۇنىمەن قۇتتىقتاپ، ولاردىڭ ءومىر جولى كەيىنگى ۇرپاق ءۇشىن ۇلكەن ونەگە ەكەنىن اتاپ ءوتتى.

«سوعىس جىلدارى بار اۋىرتپالىقتى كوتەرىپ، تىلدا تىنىمسىز تەر توگىپ، ەلدىڭ ەڭسەسىن تىكتەۋگە ولشەۋسىز ۇلەس قوستىڭىزدار. مەرەكە قارساڭىندا حال-جاعدايلارىڭىزدى ءبىلىپ، وبلىس جۇرتشىلىعى اتىنان قۇتتىقتايىق دەپ ارنايى كەلىپ وتىرمىز. سىزدەردىڭ ءومىر جولدارىڭىز كەيىنگى ۇرپاققا ۇلگى-ونەگە، ۇلكەن مەكتەپ»، – دەدى بەرىك ءۋالي.

ايتا كەتەيىك، وڭىرىمىزدەن 100 مىڭعا جۋىق ازامات وتان قورعاۋعا اتتانىپ، ولاردىڭ 44 مىڭنان استامى تۋعان جەرگە ورالمادى. مايدان دالاسىندا كورسەتكەن تەڭدەسسىز ەرلىگى ءۇشىن 56 جەرلەسىمىزگە كەڭەس وداعىنىڭ باتىرى اتاعى بەرىلدى.