اقش ادىلەت مينيسترلىگى جاريالاعان جاڭا قۇجاتتارعا سايكەس، قارجىگەر دجەففري ەپشتەين 2008 جىلى كامەلەتكە تولماعاندى جەزوكشەلىككە تارتۋ ءىسى بويىنشا سوتتالعاننان كەيىن دە ءىرى بانكتەرمەن جانە ميللياردەرلەرمەن بايلانىسىن ۇزبەگەن.

ەپشتەين 2008 جىلى كەلىسىم نەگىزىندە جەڭىل جازا الىپ، فەدەرالدىق ايىپتاۋلاردان قۇتىلعان. الايدا تىركەلگەن سەكسۋالدىق قۇقىقبۇزۋشى مارتەبەسىنە قاراماستان، ول قارجى ەليتاسى اراسىنداعى ىقپالىن ساقتاپ قالعان.

قۇجاتتاردا ونىڭ اقش ءىرى بانكى JPMorgan-داعى بۇرىنعى توپ-مەنەدجەر دجەس ستەيلي-مەن تىعىز بايلانىسى بولعانى ايتىلادى. كەيىن ۇلىبريتانيانىڭ قارجىلىق رەتتەۋشىسى ونى ەپشتەينمەن قارىم-قاتىناسى تۋرالى جاڭساق مالىمەت بەرگەنى ءۇشىن ايىپتاپ، قىزمەتتەن شەتتەتكەن.

سونداي-اق Apollo Global Management كومپانياسىنىڭ نەگىزىن قالاۋشى ميللياردەر لەون بلەك 2012–2017 جىلدارى ەپشتەينگە سالىق جانە مۇلىكتىك كەڭەس ءۇشىن 158 ملن دوللار تولەگەنى انىقتالعان. بلەك وزىنە تاعىلعان ايىپتاردى جوققا شىعارادى.

JPMorgan ەپشتەينمەن قارىم-قاتىناسىن 2013 جىلى توقتاتسا، كەيىن ونىڭ نەگىزگى بانكىنە اينالعان Deutsche Bank 2020 جىلى باقىلاۋ تالاپتارىن بۇزعانى ءۇشىن 150 ملن دوللار ايىپپۇل تولەگەن.

قۇجاتتاردا سونداي-اق 2019 جىلى تۇتقىندالۋىنا بىرنەشە اي قالعاندا ەپشتەين ماروككوداعى مارراكەش ماڭىنان 25 ملن ەۋروعا ءزاۋلىم ساراي ساتىپ الۋعا ارەكەت جاساعانى ايتىلادى. مامىلە وفشورلىق قورلار ارقىلى راسىمدەلمەك بولعانىمەن، بانكتەر كۇماندى اۋدارىمداردى كەرى قايتارىپ، وپەراسيالاردى توقتاتقان. كوپ ۇزاماي ول نيۋ-دجەرسيدە قاماۋعا الىندى.

ەپشتەين 2019 جىلى كامەلەتكە تولماعانداردى ساۋداعا سالۋ ءىسى بويىنشا قايتا ايىپتالىپ، تەرگەۋ يزولياتورىندا قازا تاپقان.