استانا قالاسىنىڭ ەكونوميكالىق تەرگەپ-تەكسەرۋ دەپارتامەنتىنىڭ قىزمەتكەرلەرى «زاڭ مەن ءتارتىپ» قاعيداتى اياسىندا «سارىارقا» اۋدانى اكىمدىگى اپپاراتىمەن بىرلەسىپ، اۋداندىق ارداگەرلەر كەڭەسىنىڭ مۇشەلەرىمەن اۋقىمدى ءاقپاراتتىق-تۇسىندىرۋ كەزدەسۋىن وتكىزدى، دەپ حابارلايدى Elordainfo.kz قالا اكىمدىگىنىڭ رەسمي سايتىنا سىلتەمە جاساپ.
ءىس-شارا مەملەكەت باسشىسىنىڭ «زاڭ مەن ءتارتىپ» قاعيداتىن قامتاماسىز ەتۋ جونىندەگى تاپسىرمالارىن جۇزەگە اسىرۋ اياسىندا ۇيىمداستىرىلىپ، حالىقتىڭ قارجىلىق ساۋاتتىلىعىن ارتتىرۋعا باعىتتالدى.
كەزدەسۋدىڭ نەگىزگى ماقساتى – زەينەتكەرلەردى قارجى پيراميدالارىن تانۋ تاسىلدەرىنە ۇيرەتۋ جانە ينتەرنەت-الاياقتاردان قورعانۋ جولدارىن ءتۇسىندىرۋ. ەگدە جاستاعى ازاماتتار ەكونوميكالىق قىلمىستارعا ءجيى الداناتىن وسال توپتاردىڭ ءبىرى بولعاندىقتان، الدىن الۋ جۇمىستارى قۇقىق قورعاۋ ورگاندارى قىزمەتىنىڭ باستى باعىتتارىنىڭ ءبىرى سانالادى.
كەزدەسۋ بارىسىندا ۆەدومستۆو وكىلدەرى جوعارى تابىس ۋادە ەتەتىن كۇماندى ينۆەستيسيالىق جوبالارعا الدانباۋ ءۇشىن قارجى پيراميدالارىنىڭ بەلگىلەرىن؛ بانك ەسەپشوتتارىن تەلەفون جانە ينتەرنەت-الاياقتاردان قورعاۋعا ارنالعان سيفرلىق گيگيەنا نەگىزدەرىن؛ كۇماندى قارجىلىق ۇسىنىستارعا تاپ بولعان جاعدايدا قايدا جۇگىنۋ كەرەكتىگىن جان-جاقتى ءتۇسىندىردى.
كەزدەسۋ فورماتى ارداگەرلەرگە ەكونوميكالىق تەرگەپ-تەكسەرۋ دەپارتامەنتى قىزمەتكەرلەرى مەن اۋدان اكىمدىگى وكىلدەرىنە وزدەرىن تولعاندىرعان سۇراقتاردى تىكەلەي قويۋعا مۇمكىندىك بەردى.
قاتىسۋشىلارعا جيناقتى ءقاۋىپسىز ساقتاۋ تاسىلدەرى مەن تولەم كارتالارىن پايدالانۋ ەرەجەلەرى بويىنشا پراكتيكالىق كەڭەستەر بەرىلدى.
«زاڭدىلىق پەن قۇقىقتىق ءتارتىپ ءار ازاماتتىڭ حاباردار بولۋىنان باستالادى. ءبىزدىڭ مىندەتىمىز – ارداگەرلەرگە قاراجاتىن جانە تىنىشتىعىن ساقتاۋعا كومەكتەسەتىن ءبىلىم بەرۋ»، – دەپ اتاپ ءوتتى ەكونوميكالىق تەرگەپ-تەكسەرۋ دەپارتامەنتىنىڭ وكىلدەرى.
مۇنداي ءتۇسىندىرۋ شارالارى ەلوردانىڭ بارلىق اۋدانىندا جۇيەلى تۇردە وتكىزىلىپ كەلەدى.
ەسكە سالا كەتەيىك، ەلوردادا كيبەرالاياقتىقدەرەكتەرى بويىنشا جۇزدەگەن ءىس قوزعالدى.
