الماتىدا قورشاعان ورتاعا ۇقىپتى قارايتىن مادەنيەت قالىپتاستىرىپ، تۇرعىنداردى ەكولوگيالىق ءىس-شاراعا تارتۋدى كوزدەيتىن «تازا سانا» ەكولوگيالىق باستاماسى باستالدى. جوبا تۋرالى وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا ايتىلدى. بۇل جولعى باستاماعا العاش رەت قالا تۇرعىندارىن تازالىقتى ساقتاپ، ەكولوگيانى كۇتىپ-باپتاپ، ايالاۋعا شاقىراتىن تازابەك ماسكوتى دا قاتىستى.
«تازا سانا» جوباسىنىڭ جەتەكشىسى ديانا الييەۆانىڭ ايتۋىنشا، بۇل ءبىر رەتتىك اكسيا ەمەس، قالدىقتاردى سۇرىپتاۋدان باستاپ قوعامدىق كەڭىستىكتەرگە ۇقىپتى قاراۋعا دەيىن تۇراقتى داعدى قالىپتاستىرۋعا باعىتتالعان. ونىڭ اياسىندا قالادا اۋلا تازالاۋ سەنبىلىكتەرى، جاعالاۋلار مەن قوعامدىق اۋماقتاردى تازالاۋ، سونداي-اق تۇرعىندارعا ارنالعان ەكولوگيالىق ميني-دارىستەر مەن ينتەراكتيۆتى ءىس-شارالار وتپەك.
«قالادا قالدىقتى جيناپ، ونى قايتا وڭدەۋگە جىبەرەتىن نۇكتەلەر اشىلىپ، ەرىكتىلەر مەن جاستار ۇيىمدارى وعان بەلسەنە اتسالىسپاقشى. جوبانىڭ الەۋمەتتىك جەلىلەرىندە اتقارىلعان جۇمىستىڭ ناتيجەسىن كورسەتۋ ءۇشىن «بۇعان دەيىنگىسى مەن كەيىنگىسى» دەيتىن فورماتتا ماتەريال جاريالانادى»، - دەپ ايتتى ول.
نەگىزگى باعىتتىڭ ءبىرى — بالالار مەن جاسوسپىرىمدەرمەن جۇمىس ىستەۋ. ولارعا ارناپ قالالىق ەكو-لاگەر ۇيىمداستىرىلىپ، قاتىسۋشىلار ەكولوگيا تۋرالى ءبىلىم الىپ قانا قويماي، ونى ءىس جۇزىندە قولدانا الادى. باعدارلاماعا ينتەراكتيۆتى ساباقتار، اكسيالارعا قاتىسۋ، قالدىقتاردى بولەك جيناۋدى ۇيرەنۋ مەن ءوز ەكولوگيالىق باستامالاردى ازىرلەۋ دە كىردى.
تازابەك ماسكوتى ەكولوگيالىق مادەنيەتتىڭ جارشىسى بولادى: ول ءتۇرلى اكسياعا قاتىسىپ، تۇرعىندارمەن، اسىرەسە جاستارمەن بايلانىس ورناتىپ، قوقىس تاستاماۋ، قالدىقتاردى سۇرىپتاۋ مەن قالاعا ۇقىپتى قاراۋ سياقتى قاراپايىم، ءبىراق ماڭىزدى ەرەجەلەردى اركىمنىڭ ەسىنە سالىپ وتىرماق.
جوبا الماتىنىڭ ىشكى ساياسات باسقارماسىنىڭ قولداۋىمەن جۇزەگە اسادى. ۇيىمداستىرۋشىلاردىڭ ايتۋىنشا، باستى ماقسات — تازالىققا جاۋاپتى بولۋدى ۇيرەتەتىن جاڭا قالالىق مادەنيەتتى قالىپتاستىرۋ ەكەن.
باستاماعا نيەت بىلدىرگەندەردىڭ بارلىعى قاتىسا الادى. ءىس-شارالار كەستەسى جوبانىڭ الەۋمەتتىك جەلىلەرىندە جاريالانىپ، ولار سول جەردە تازابەكتىڭ بەلسەندىلىگىن باقىلاپ، ەكولوگيا تۋرالى پايدالى اقپارات الا الادى.
