قازاقستاندا جولاۋشىلار پويىزدارىن بەينەباقىلاۋ جۇيەسىمەن جابدىقتاۋ قارقىندى جۇرگىزىلىپ جاتىر. قازىرگى ۋاقىتتا ءتورت مىڭعا جۋىق بەينەكامەرا ورناتىلعان. جىل سوڭىنا دەيىن ەل ىشىندەگى بارلىق 112 باعىتتاعى پويىز تولىق بەينەباقىلاۋمەن قامتىلماق.

مامانداردىڭ ايتۋىنشا، پويىزدارداعى كامەرالاردان تۇسەتىن بەينەماتەريالدار ناقتى ۋاقىت رەجيمىندە ارنايى سيتۋاسيالىق ورتالىقتا باقىلانادى. بۇل ستاندارتتى ەمەس جاعدايلارعا جەدەل ارەكەت ەتۋگە مۇمكىندىك بەرەدى. سونىمەن قاتار، بەينەجازبالار جولاۋشىلاردىڭ ۇمىت قالدىرعان زاتتارىن تابۋعا دا كومەكتەسەدى.

"قازاقستان تەمىر جولى" كومپانياسىنىڭ مالىمەتىنشە، بەينەباقىلاۋ جۇيەسىن ەنگىزگەلى بەرى پويىزدارداعى قۇقىقبۇزۋشىلىقتار سانى 21%-عا، ال جولاۋشىلار تاراپىنان كەلىپ تۇسەتىن شاعىمدار ۇشتەن بىرىنە ازايعان. ۇمىت قالعان زاتتاردىڭ ءاربىر توعىزىنشىسى يەسىنە قايتارىلعان.

– "بەينەاناليتيكالىق جۇيە ارقىلى پويىزداعى ءتۇتىندى، بۇزاقىلىقتى، سونداي-اق بەت-الپەتتى تانۋ سياقتى ەرەكشە جاعدايلاردى انىقتاي الامىز. بۇل جولاۋشىلاردىڭ قاۋىپسىزدىگى مەن جايلىلىعىن قامتاماسىز ەتۋگە باعىتتالعان"، – دەدى "جولاۋشىلار تاسىمالى" اق باسقارما ءتوراعاسىنىڭ ورىنباسارى مۇرات تورەگەلدين.

ايتا كەتەيىك، جاڭادان ساتىپ الىنعان بارلىق ۆاگوندار بەينەباقىلاۋ جۇيەسىمەن تولىق جابدىقتالعان كۇيدە جەتكىزىلىپ جاتىر.