قازاقستان حالقى اسسامبلەياسىنىڭ ءحححىV سەسسياسىندا قاسىم-جومارت توقايەۆ ازاماتتاردىڭ ءبىر-بىرىن قانداي دا ءبىر تىلدە سويلەۋگە ماجبۇرلەۋگە بولمايتىنىن ايتتى. سونداي-اق ول ەل ىشىنە ىرىتكى سالۋعا تىرىسقاندار زاڭ الدىندا قاتاڭ جاۋاپ بەرەتىنىن ەسكە سالدى.
پرەزيدەنتتىڭ ايتۋىنشا، بۇگىندە مەكتەپ ءبىتىرۋشى تۇلەكتەردىڭ 80 پايىزعا جۋىعى ۇلتتىق ءبىرىڭعاي تەستىلەۋدى مەملەكەتتىك تىلدە تاپسىرادى. ال بيىل العاش رەت مەكتەپ تابالدىرىعىن اتتايتىن بالالاردىڭ 70 پايىزدان استامى قازاق تىلىندە ءبىلىم الادى.
سونىمەن قاتار، توقايەۆ ەلىمىزدە ازاماتتاردىڭ ءبىر-بىرىن بەلگىلى ءبىر تىلدە سويلەۋگە ماجبۇرلەۋگە بولمايتىنىن اتاپ ءوتتى. ونىڭ پىكىرىنشە، ءتىل ماسەلەسىن جەلەۋ ەتىپ، قوعامدا الاۋىزدىق تۋدىرۋعا باعىتتالعان كەز كەلگەن ارەكەتكە زاڭ شەڭبەرىندە توسقاۋىل قويىلادى. بۇل تەك ەل ىشىندە ەمەس، شەتەلدە وتىرىپ، ءتۇرلى ۇيىمداردىڭ تاپسىرمالارىن ورىندايتىن ارانداتۋشىلارعا دا قاتىستى.
«ەلىمىزدە ازاماتتار ءبىر-بىرىن نەمەسە مىنبەردە سويلەپ تۇرعان ادامدى «مىنا تىلدە سويلە» دەپ ماجبۇرلەمەۋى ءتيىس. ءتىل ماسەلەسىن تۋ ەتىپ قوعامدا الاۋىزدىق تۋعىزعىسى كەلەتىن، ەل ىشىندەگى جاعدايدى شيەلەنىستىرۋگە ۇمتىلاتىن ءاربىر ارەكەتكە توسقاۋىل قويىلىپ، زاڭ جۇزىندە جازالانادى. بۇل رەتتە ءۇي ىشىندەگى عانا ەمەس، شەتەلدە وتىرىپ الدەبىر ۇيىمداردىڭ اقشاسى مەن تاپسىرماسىنا دەسترۋكتيۆتى ارەكەتپەن اينالىساتىن ارانداتۋشىلار تۋرالى دا ايتىپ وتىرمىز»، — دەدى توقايەۆ.
توقايەۆ وتكەن جىلى ۇلتتىق قۇرىلتاي وتىرىسىندا ەل بىرلىگى، وتانشىلدىق، تاۋەلسىزدىك جانە كەلىسىمنىڭ ماڭىزدى قۇندىلىقتار ەكەنىن اتاپ ءوتتى. ول بۇل قۇندىلىقتاردان اۋىتقيتىن ارەكەتتەرگە قارسى تۇرىپ، زاڭ شەڭبەرىندە جاۋاپكەرشىلىككە تارتىلاتىنىن مالىمدەدى. سونىمەن قاتار، ۇلت بىرلىگى مەن ىنتىماعىن نىعايتۋعا ۇلەس قوسقان ازاماتتار ءاردايىم قۇرمەتكە لايىقتى بولاتىنىن ايتتى.
