اقش پرەزيدەنتى دونالد ترامپ 2026 جىلدىڭ 1 اقپانىنان باستاپ دانيا، نورۆەگيا، شۆەسيا، فرانسيا، گەرمانيا، ۇلىبريتانيا، نيدەرلاندى جانە فينليانديادان اقش-قا جەتكىزىلەتىن بارلىق تاۋارعا 10 پايىزدىق كەدەندىك تاريف سالىناتىنىن مالىمدەدى.

ونىڭ ايتۋىنشا، «قاسيەتتى جەرگە» ەشكىم قول سۇقپاۋى ءتيىس، اسىرەسە ماسەلە اقش-تىڭ جانە بۇكىل الەمنىڭ ۇلتتىق قاۋىپسىزدىگىنە قاتىستى بولسا.

ترامپ 2026 جىلدىڭ 1 ماۋسىمىنان باستاپ بۇل تاريف 25 پايىزعا دەيىن وسەتىنىن ايتتى. اتالعان باج سالىعى گرەنلانديانى تولىق ءارى تۇپكىلىكتى ساتىپ الۋ جونىندە كەلىسىم جاسالعانعا دەيىن كۇشىندە بولادى.

پرەزيدەنت بۇعان دەيىن ەۋروپالىق وداق ەلدەرى اقش تاراپىنان ەشقانداي تاريفكە ىلىنبەگەنىن، الايدا ەندى «قارىزدى قايتارۋ ۋاقىتى كەلگەنىن» اتاپ ءوتتى.

«عاسىرلار وتكەن سوڭ، ەندى دانيانىڭ قارىزىن قايتاراتىن كەزى كەلدى. سەبەبى بۇل جەردە الەمدىك بەيبىتشىلىك تاعدىرى تۇر. جۇڭگو مەن رەسەي گرەنلاندياعا قىزىعۋشىلىق تانىتىپ وتىر، ال دانيا بۇعان قارسى تۇرا المايدى. قازىرگى تاڭدا ولاردىڭ قورعانىسى رەتىندە نەبارى ەكى يت جەككەن شانا عانا بار، ونىڭ ءبىرى جاقىندا عانا قوسىلعان. بۇل ويىندا تەك اقش قانا ءتيىمدى ءارى تابىستى ارەكەت ەتە الادى»، – دەدى دونالد ترامپ.