قازاقستاننىڭ ءىرى التىن وندىرۋشىلەرىنىڭ ءبىرى شىعىنعا باتقان جوباسىنان قول ءۇزدى. «اك التىنالماس» جامبىلداعى اكباقاي كەنى ءۇشىن قۇرىلعان ەنشىلىسىن جاپتى — بۇل شەشىم سالانىڭ احۋالىنا دا، جەرگىلىكتى ەكونوميكاعا دا اسەر ەتۋى مۇمكىن.

14 قاڭتاردا بيرجالىق حابارلامادا كومپانيانىڭ «اكباقاي گولد رەسورسيز» اكسيونەرلىك قوعامىنان يەلىك قۇقىعىن توقتاتقانى كورىندى. قۇجاتقا قاراعاندا، ەنشىلەس ۇيىمدى 2025 جىلدىڭ 31 جەلتوقسانىندا رەسمي تۇردە تاراتۋ اياقتالدى.

جوبا قالاي توقتادى

«اكباقاي گولد رەسورسيز» 2021 جىلى تىركەلدى. باس ديرەكتور بولىپ ماكەن ىسقاقوۆا كورسەتىلدى. ەنشىلەس ۇيىم اكباقاي كەنىن يگەرۋ، باعالى مەتالداردى ءوندىرۋ جانە وڭدەۋ ءۇشىن قۇرىلدى.

جوبا قارجىلىق تۇرعىدان مينۋسقا كەتتى. كومپانيا اكتيۆتەرى 2022 جىلى 1،16 ملرد تەڭگەدەن 2024 جىلعا قاراي 120،7 ملن تەڭگەگە دەيىن قىسقاردى. 2022 جىلى 223 ملن تەڭگە، 2023 جىلى 9،3 ملن تەڭگە شىعىن كورسەتىلدى. مىندەتتەمەلەر اكتيۆتەردەن جۇزدەگەن ميلليونعا ارتىق تۇردى.

2024 جىلى جالعىز اكسيونەردىڭ شەشىمىمەن كومپانيا قازاقستان قور بيرجاسىنان شىعارىلدى. سول كەزدە اكسيالاردىڭ بالانستىق قۇنى تەرىسكە كەتكەن ەدى.

اكباقاي كەنى تۋرالى نە بەلگىلى

اكباقاي كەنى جامبىل وبلىسىنىڭ مويىنقۇم اۋدانىندا ورنالاسقان. كەن ورنى 1968 جىلى اشىلدى. گەولوگتار مۇندا التىننىڭ ءتورت ءتيپىن انىقتادى. الايدا ءوندىرىس پەن وڭدەۋ شىعىنى جوعارى بولىپ، جوبا كوممەرسيالىق تيىمدىلىك بەرمەدى.

يەلەر قۇرامى جانە قارجىلىق كورىنىس

«اك التىنالماس» ەلدەگى ەڭ ءىرى التىن وندىرۋشىلەردىڭ قاتارىندا «قازمىرىشپەن» بىرگە اتالادى. كومپانيانىڭ ۇلەسىنىڭ 66،8%-ىن Gouden Reserves B.V. (نيدەرلاند) ۇستاپ وتىر، 22،2%-ىن بيزنەسمەن ۆلاديمير دجۋمانبايەۆ يەلەنىپ وتىر. Forbes مالىمەتتەرىندە ونىڭ داۋلەتى 472 ملن دوللار شاماسىندا باعالاندى.

2025 جىلعى 1 قازانعا «التىنالماس» اكتيۆتەرى 902 ملرد تەڭگەدەن استى، تازا پايدا 260،3 ملرد تەڭگە بولدى. 2025 جىلدىڭ سوڭىندا كومپانيا ءۇشىنشى توقسان قورىتىندىسى بويىنشا 127 ملرد 742،6 ملن تەڭگە ديۆيدەند تولەۋ تۋرالى حابارلادى.

بۇل تۋرالى Qamshy.kz اقپارات اگەنتتىگى حابارلايدى.