وقۋشىلار سارايىندا 2018 جىلدى قارسى الۋعا ارنالعان قويىلىم ءوتتى. استانا اكىمى اسەت يسەكەشيەۆتىڭ اتىنان ۇيىمداستىرىلعان جاڭا جىلدىق شىرشاعا 300-دەن استام بالا قاتىستى دەپ حابارلايدى Qamshy.kz اقپارات اگەنتتىگى استانا اكىمدىگىنىڭ باسپا ءسوز قىزمەتىنە سىلتەمە جاساي وتىرىپ.

مەرەكەگە وقۋ وزاتتارى، جەتىم بالالار، از قامتىلعان وتباسىلاردىڭ بالالارى مەن ەرەكشە قاجەتتىلىگى بار بۇلدىرشىندەر شاقىرىلدى. 

ەلوردا اكىمىنىڭ ورىنباسارى ەرمەك امانشايەۆتىڭ سوزىنشە ءوتىپ بارا جاتقان جىل قالا ءۇشىن ايرىقشا بولدى.

«استانادا ەكسپو حالىقارالىق كورمەسى دۇركىرەپ ءوتتى. الداعى جىل دا ايتۋلى شارالارعا تولى بولماق. ءبىز ەلوردامىزدىڭ 20 جىلدىعىن قارسى الامىز.بارلىعىڭىزعا ارماندارىڭىزدىڭ ورىندالۋىن جانە جاڭاجىلدىق عاجايىپ تىلەيمىن!» –  دەدى ە.امانشايەۆ ەلوردالىق وقۋشىلاردى قۇتتىقتاۋ كەزىندە. 

شارا ينتەراكتيۆتى شوۋ قويىلىم رەتىندە ءوتىپ، ونداعى ەرتەگىگە بارلىق بالا قاتىستى. 

مەرەكەلىك باعدارلاما اياسىندا بالالار ەرتەگى كەيىپكەرلەرىمەن شىرشانى اينالا ءان سالىپ، سىيلىقتارعا يە بولدى. 

جاڭاجىلدىق شىرشادان سوڭ بالالارعا "نۇر الەم" سفەراسىندا ەكسكۋرسيا ۇيىمداستىرىلدى. 

قالالىق ءبىلىم باسقارماسىنىڭ باسشىسى انۋار ءجانعوزيننىڭ سوزىنشە، شىرشانىڭ نەگىزگى يدەياسى ەلوردانىڭ 20 جىلدىعى مەن ونىڭ تاريحى.  بۇعان قوسا ەلوردالىق وقۋشىلاردىڭ جەتىستىگىنە دە توقتالدى. 

«بۇگىن بارلىق وقۋشىلاردى كەلە جاتقان جاڭا جىلمەن قۇتتىقتاعىم كەلەدى. سونداي-اق ولاردىڭ وقۋداعى جەتىستىگىن اتاپ وتكىم كەلەدى. سەبەبى ءبىزدىڭ توبىمىز 11 جىل قاتارىنان رەسپۋبليكا بويىنشا ءبىرىنشى ورىندا كەلەدى. بالالارىمىزعا ارماندارىنىڭ ورىندالۋىن جانە باقىتتى بولاشاققا دەگەن سەنىم تىلەيمىن»، – دەدى  ا.جانعوزين.