12 جاستاعى الماتىلىق ۆۋندەركيند ابزال مىرزاشتىڭ قازاقستان-بريتان تەحنيكالىق ۋنيۆەرسيتەتىندە ءبىلىم الىپ كەلە جاتقانىنا دا بىرنەشە ايدان استام ۋاقىت ءوتتى. جاسىنىڭ كىشىلىگىنە قاراماستان، ول وزىمەن قاتار بالالاردى باسىپ وزىپ، مەكتەپ باعدارلاماسىن جەدەل ءتامامداعان ەدى. ەندى ءتىپتى، ءوزى تۇسكەن جوو-ن دا جىلدامداتىپ اياقتاۋدى كوزدەپ وتىر. وعان قوسا، وقۋىن شەتەلدە جالعاستىرۋدى ارماندايدى.

ونىڭ ۋنيۆەرسيتەت قابىرعاسىنداعى ءومىرى مەن العا قويعان جوسپارىن ءسۇراپ-بىلۋ ماقساتىندا Qamshy.kz اقپارات اگەنتتىگىنىڭ ءتىلشىسى ابزالدىڭ ۇيىنە بارىپ قايتقان ەدى. سۇحباتتى نازارلارىڭىزعا ۇسىنامىز:

-مەكتەپ پەن جوو-دا وقۋدىڭ نە ايىرماشىلىعى بار؟

-ارينە، ۋنيۆەرسيتەتتىڭ وقۋ باعدارلاماسى مەكتەپتەن الدەقايدا قيىنداۋ. ساباقتار قىزىعىراق جانە تەك ءوزىڭنىڭ ماماندىعىڭا قاتىستى پاندەردى عانا ۇيرەتەدى. وعان قوسا، مۇندا ءوزىڭدى ەركىن سەزىنەسىڭ، ماسەلەن، مەكتەپتەگىدەي فورما كيەتىن قاتال ەرەجەلەر دە جوق.

-ۋنيۆەرسيتەتكە كەلگەن ۋاقىتتا نە نارسەگە ۇيرەنۋ ساعان قيىندىق تۋعىزدى؟

ماعان پروگراممالاۋ ءپانى وتە قاتتى ۇنايدى. ءبىراق، باس كەزدە بۇل ءپاندى ۇيرەنىپ كەتۋ ماعان ازداپ قيىندىق تۋعىزدى. پروگراممالاۋ بويىنشا، مەن ناقتى ەشتەڭە بىلمەيتىنمىن. سول ءۇشىن مەن ونىمەن كوبىرەك اينالىستىم. ناتيجەسىندە، ارالىق باقىلاۋلاردان كەيىنگى سىناقتاردان وتە جوعارى دەگەن (100%) كورسەتكىشكە يە بولدىم.

-اقپاراتتىق تەحنولوگيالار ماماندىعىن تاڭداۋدى توعىزىنشى سىنىپتا شەشتىڭ، قازىردە وسى ماماندىقتان ءدارىس الىپ ءجۇرسىڭ. ساعان ەكىنشى رەت تاڭداۋ بەرسە، بۇل ماماندىعىڭدى اۋىستىرار ما ەدىڭ؟

-ماعان اقپاراتتىق تەحنولوگيا ماماندىعى جانە وعان قاتىستى وقىتىلاتىن پاندەر ۇناپ جاتىر. سوندىقتان، بۇل ماماندىقتى تاڭداعانىما وكىنبەيمىن.  

-جاقىندا عانا ۋنيۆەرسيتەتتەگى سىناقتاردان سۇرىنبەي ءوتتىڭ دەپ ەستىدىك، ارالىق باقىلاۋ سەن ءۇشىن قيىن بولمادى ما؟

-شۇكىر، بارلىق ساباقتاردى جاقسىلاپ اياقتادىم. اسا قاتتى قيىندىق تۋعىزدى دەپ ايتا المايمىن.

-ءبىر توپتا وقيتىن ستۋدەنتتەرمەن اراداعى قارىم-قاتىناسىڭ قالاي؟ جاڭا دوستار تابا الدىڭ با؟

-باستاپقى بىر-ەكى اپتادا ازداپ ىڭعايسىز بولدى. سەبەبى بارلىعى ءبىر-بىرىن تانىمايدى. ودان كەيىنگى ۋاقىتتاردا عانا ءبىز ەتەنە ارالاسا باستادىق. مەن دە ءبىراز دوستار تاپتىم. بىزدەر جالپى ءدارىس وقىلعاندا اۋديتوريادا 80 ادام بولىپ وتىرامىز، ال سەمينارلاردا 10-15 ستۋدەنت قالادى. اقپاراتتىق تەحنولوگيالار (IT) ماماندىعى بولعاندىقتان، توبىمىزدا ۇلدار باسىم.

-مۇعالىمدەردىڭ ساعان دەگەن قارىم-قاتىناسى قانداي، ولار ساعان ەرەكشە كوڭىل بولەدى مە؟

-مۇعالىمدەر ماعان بارلىعىنا بىردەي قاراعانداي قارايدى. ولار ساباقتى وتە قىزىقتى وتەدى. لەكسيا اعىلشىن تىلىندە وتكەنمەن، ولار قول جەتىمدى، تۇسىنىكتى تىلمەن جەتكىزەدى.

-سىنىپتاستارىڭدى ساعىندىڭ با؟ ولارمەن ءالى ارالاسىپ تۇراسىڭ با؟

-سىنىپتاستارمەن، اۋلاداعى دوستارىممەن ارالاسىپ تۇرامىن. ولار كەي كەزدە تۇسىنبەگەن سۇراقتارىن سۇراپ تۇرادى.

-بوس ۋاقىتىڭدا نەمەن اينالىساسىڭ؟

-مەن ءقازىر ءوز شەشىمىم بويىنشا، ىنىممەن بىرگە بوكسقا قاتىسىپ ءجۇرمىن. اپتاسىنا ءۇش رەت بولادى. ۇستازىم تمد جانە سلاۆيان ەلدەرىنىڭ چەمپيونى، الەمدە ونى ايگىلى مەنني پاكياونى ۇرىپ-جىققان بوكسشى رەتىندە تانيتىن سەرىكجان ەشماعامبەتوۆ. 

سۋرەتتە ابزالدىڭ اناسى جازيرا جارماعامبەت قىزى جانە ءىنىسى سۇلتان

-جوو-ن دا مەرزىمىنەن بۇرىن ءبىتىرۋ تۋرالى اقپاراتتى ەستىدىك، بۇل ويىڭدى ۋنيۆەرسيتەت تاراپى بىلەدى مە؟ ولاردىڭ ويى قالاي؟

-وسى سەمەستردە ەكىنشى كۋرستان ءبىر ساباق العان بولاتىنمىن. باسىندا ءبىر ساباق قانا الدىم، قاتتى قيىن بولىپ كەتپەسىن دەپ. بىرتىندەپ قوسامىن، ەكىنشى سەمەستردە ودان دا كوبىرەك قوسامىن دەپ وتىرمىن. جەدەلدەتىلگەن تۇردە، ياعني 2،5-3 جىلدا وقىپ بىتىرگىم كەلەدى. ۋنيۆەرسيتەت تاراپى بۇل تۋرالى حاباردار.

-سەنىڭ ەڭ مىقتى قاسيەتىڭ نە؟

مەن كىشكەنتاي كەزىمنەن باستاپ، اينالاداعى زاتتارعا قاتتى زەيىن قويىپ قارايتىنمىن. مەنىڭ ويىمشا، قىزىعۋشىلىق پەن ەستە ساقتاۋ قابىلەتىمنىڭ ارقاسىندا جاقسى وقيمىن دەپ ويلايمىن.

-ساعان تانىمال بولعان ۇنايدى ما؟

-نەگىزى، باسقالاردىڭ نازارىندا بولا بەرگەن ونشا ۇنامايدى.

-العا قويعان ماقساتىڭ قانداي؟

-قازاق-بريتان تەحنيكالىق ۋنيۆەرسيتەتىن بىتىرگەننەن كەيىن، بالكىم جەدەلدەتىپ، اللا بۇيىرتسا، اقش-تىڭ ماسساچۋسەتس شتاتىنداعى MIT (Massachusetts Institute of Technology) ينستيتۋتىنا تۇسكىم كەلەدى. وندا ماگيستراتۋرا ماماندىعىن يگەرسەم دەگەن ويىم بار.

-سەن ۋنيۆەرسيتەتتى بىتىرگەندە 15-تە بولاسىڭ، سوناۋ اقش-قا جالعىز بارۋعا جۇرەكسىنبەيسىڭ بە؟

مەن جالعىز ەمەس، اتا-انامدى دا وزىممەن بىرگە الىپ كەتكىم كەلەدى. ارينە ونى ۋاقىتى كەلگەندە كورە جاتارمىز...

سۇحباتىڭىزعا راقمەت!

سۇحباتتاسقان: زاميرا پۋلاتوۆا