قازاقستان مۇسىلماندارى ءدىني باسقارماسىنىڭ ءتوراعاسى سەرىكباي قاجى ورازدىڭ بۇيرىعىمەن السابەكوۆ مۇحاممەد-حۋسەين قاجى وسمان ۇلى باس ءمۇفتيدىڭ باس كەڭەسشىسى قىزمەتىنە تاعايىندالدى، دەپ حابارلايدى Qamshy.kz اقپارات اگەنتتىگى muftyat.kz سايتىنا سىلتەمە جاساي وتىرىپ.

السابەكوۆ مۇحاممەد-حۋسەين قاجى وسمان ۇلى 1970-1980 ارالىعىندا ورتا ازياداعى كورنەكتى يسلام عالىمدارىنان ءدارىس العان. سونىمەن قاتار، ءدىني ءبىلىمىن جەتىلدىرۋ ماقساتىندا سيريا جانە پاكىستان مەملەكەتتەرىندە حالىقارالىق  يسلام ۋنيۆەرسيتەتتەرىنەن شاريعات جانە اراب ءتىلى فاكۋلتەتىن بىتىرگەن. ول 1985 جىلى 25 جاسىندا الماتى قالاسى ورتالىق مەشىتىنە باس يمام بولىپ تاعايىندالدى.

1990 جىلدىڭ 12 قاڭتارىندا قازاقستان مۇسىلماندارى ءدىني باسقارماسى قۇرىلعالى بەرى م.ح. السابەكوۆ قازاق يسلام ۋنيۆەرسيتەتىنىڭ تۇڭعىش رەكتورى، قمدب ءتورالقاسىنىڭ مۇشەسى، سونداي-اق 1990 جىلداردىڭ باسىندا قازاقستان رەسپۋبليكاسى پرەزيدەنتى جانىنداعى ءدىني بىرلەستىكتەرمەن بايلانىس كەڭەسىنىڭ، «الماتى-حەلسينكي-پاريج» اتتى ارال تەڭىزىن قۇتقارۋ حالىقارالىق كوميتەتىنىڭ  جانە ادام قۇقىعىن قورعاۋ كوميتەتتەرىنىڭ مۇشەسى. ەلىمىزدىڭ مۇسىلماندارى اتىنان رەسەي، كاۋكاز، ورتا ازيا، سيريا، ساۋد ارابياسى كورولدىگى، كيپر، ليۆان، تۇركيا، يران، پاكىستان جانە ت.ب مەملەكەتتەردە ديپلوماتيالىق قىزمەت ميسسيالارىن اتقاردى.