ءبىرىنشى اۋىر سالماقتا WBO بەلبەۋىنىڭ يەگەرى ۋكراينالىق الەكساندر ۋسيك الداعى ۋاقىتتا ءوز سالماعىندا الەمدەگى مىقتى بوكسشى ەكەنىن دالەلدەپ، سودان سوڭ اسا اۋىر سالماققا اۋىسىپ ەنتوني دجوشۋانى جەكپە-جەككە شاقىرۋدى ويلاستىرىپ وتىر. بۇل تۋرالى بوكسشىنىڭ ءوزى Sky Sports تەلەارناسىنا بەرگەن سۇحباتىندا ايتتى، دەپ جازادى Qamshy.kz اقپاراتتىق اگەنتتىگى vesti.kz-گە سىلتەمە جاساپ.
«مەن اسا اۋىر سالماققا اۋىسىپ، بارلىق جانكۇيەرگە ءوزىمنىڭ مىقتى ەكەنىمدى دالەلدەيمىن. مەنىڭ قانشالىقتى مىقتى ەكەنىمدى دجوشۋامەن كەزدەسۋىمدە كورەسىزدەر. ءبىراق ول جەكپە-جەك ءقازىر بولمايدى. مەنەن ۇنەمى ەنتونيدىڭ  دەڭگەيىن سۇراپ جاتادى. دجوشۋانىڭ قانشالىقتى كۇشتى ەكەنىن مەنىمەن بولاتىن كەزدەسۋدە كورەسىزدەر»، – دەيدى ۋسيك. 

سونىمەن قاتار ۋسيك جۋىق ارادا اسا اۋىر سالماققا اۋىسۋ تۋرالى ويى جوق ەكەنىن ايتتى. بوكسشىنىڭ بارلىق نازارى ءقازىر WBC بەلبەۋىنىڭ يەگەرى مايريس بريەديسكە قارسى وتەتىن كەزدەسۋگە اۋىپ وتىر. 

«مەنىڭ ويىمشا، بريەديس – كارەرامداعى ەڭ مىقتى قارسىلاس. ول 23 رەت جەڭىپ، بىردە-بىر رەت جەڭىلگەن جوق. سوققىسى دا مىقتى. سوندىقتان مەن ونى ءقاۋىپتى قارسىلاس دەپ ويلايمىن. مەن نەگىزى ۇنەمى 12 راۋند جۇدىرىقتاسۋعا دايىندالامىن. ءبىراق الداعى كەزدەسۋدى ءمايريستى نوكاۋتقا تۇسىرۋگە تىرىسامىن»، – دەيدى ۋسيك. 

ايتا كەتەيىك، ۋسيك پەن بريەديس اراسىنداعى كەزدەسۋ 27 قاڭتار كۇنى ريگادا «Arena Riga» سپورت كەشەنىندە وتەدى.

ال ەنتوني دجوشۋ بولسا ءوزىنىڭ كەلەسى كەزدەسۋىن 31 ناۋرىز كۇنى كارديفف (ۋەلس) قالاسىنداعى «Principality Stadium» ارەناسىندا وتكىزەدى.