ءبىرىنشى ورتا سالماقتا IBF بەلبەۋىنىڭ يەگەرى، كاسىپقوي بوكستا جەڭىلىستىڭ كەرمەك ءدامىن تاتپاعان امەريكالىق بوكسشى دجاررەتت حەرد (21-0، 15 كو) وسى سالماقتا WBA (Super) جانە IBO بەلبەۋلەرىنىڭ يەگەرى كۋبالىق ەريسلاندي لارامەن (25-2-2، 14 كو) كەزدەسەتىن بولدى، دەپ حابارلايدى  Qamshy.kz اقپاراتتىق اگەنتتىگى Vesti.kz-كە سىلتەمە جاساپ.

جەكپە-جەك 7 ءساۋىر كۇنى وتەدى. كەزدەسۋ Showtime ارناسى تىكەلەي ەفيردە كورسەتەدى. ءبىراق كەزدەسۋدىڭ ناقتى قاي جەردە وتەتىنىن بەلگىسىز. 

ەسكە سالايىق، وتكەن جىلدىڭ قازان ايىندا حەرد پەن لارا ءبىر بوكس كەشىندە ونەر كورسەتكەن ەدى. ول كەزدە امەريكالىق بوكسشى الەمنىڭ بۇرىنعى چەمپيونى وستين تراۋتتان (30-4، 17 كو) ۇستەم تۇسسە، كۋبالىق بوكسشى تورەشىلەردىڭ شەشىمى بويىنشا تەررەل گاۋشادان (20-1، 9 كو) ايلاسىن اسىردى.  

ايتا كەتەيىك، جۋىردا قانات يسلامعا (25-0، 20 كو) حەردپە جەكپە-جەك وتكىزۋ تۋرالى ۇسىنىس ايتىلعان ەدى. مۇنداي ۇسىنىستى امەريكالىق ماچمەيكەر راينەلو نەلسون لوپەس جاسادى. 

دەگەنمەن دە قازىرگى ۋاقىتتا قانات يسلامنىڭ باسقا دا مىندەتتەرى بار. 2017 جىلدىڭ 21 قاراشاسىندا WBA قانات يسلام مەن امەريكالىق دجون ۆەرا (18-0، 11 كو) اراسىنداعى كەزدەسۋدى ۇيىمداستىرۋعا ءبىر اي ۋاقىت بەرگەن. قاي جەڭگەنى لارانىڭ مىندەتتى قارسىلاسى بولاتىن ەدى. ءبىراق جەكپە-جەكتى ۇيىمداستىرۋعا بەرىلگەن ۋاقىت اياقتالدى. دەگەنمەن بۇل كەزدەسۋ تۋرالى ەشقانداي اقپارات جوق. ال امەريكالىق بوكسشىنىڭ كومانداسىنداعى دەرەككوزدىڭ مالىمەتى بويىنشا، قازاقستاندىق بوكسشى بۇل كەزدەسۋدەن باس تارتىپتى.