بيىل الماتىنى اباتتاندىرۋ جۇمىسى قاتتى جۇرگىزىلدى. الىپ شاھاردىڭ وزگەشە سيپاتقا بەت العانىن ءبىزدىڭ دە كوزىمىز كورىپ، كوڭىلىمىز ورنىعىپ ەدى. كوشە-كوشەدە جاياۋ جۇرگىنشىلەر جولى كوبەيە باستادى. ۆەلوسيپەد جولاعىن ارتتىرۋعا دا بيلىك شىنداپ كىرىستى. ول ءۇشىن بوركىمىزدى اسپانعا اتپاساق تا، كادىمگىدەي ءىشىمىز جىلىپ قالعان. ويتكەنى تىنىسى تارىلعان قالانىڭ ەكولوگياسىنا بۇل اسا قاجەت.

قالا دەگەن قانداي بولۋى كەرەك ءوزى؟ قالا دەگەن قاراپايىم حالىقتىڭ قامسىز ءومىر سۇرۋىنە ىڭعايلى بولۋى كەرەك. ال كولىك جولدارى مەن تۇراقتارى – ەكىنشى كەزەكتەگى نارسە.

حوش. اۋقىمنان اۋا جايىلماي، نەگىزگى ماسەلەگە كوشەيىك.

وتكەن اپتادا ۇلتتىق كاسىپكەرلەر پالاتاسى باستاعان ءبىر توپ بيزنەسمەن جوعارىدا ايتىلعان وزگەرىستەرگە قارسى شىقتى. ولار «قونايەۆ كوشەسىندەگى ۆەلوجولاقتى الىپ تاستاپ، ونىڭ ورنىنا قايتادان كولىك تۇراعى سالىنسىن» دەگەن تالاپ قويدى. كاسىپكەرلەردىڭ سوزىنشە، ۆەلوسيپەد جولاعىنىڭ كەسىرىنەن ساۋدا ورتالىعىنا كەلەتىندەردىڭ سانى كۇرت ازايعان. كىرە بەرىسى جابىق تۇرعاندىقتان، ساتىپ الۋشىلار كولىك قوياتىن ورىن تاپپاي، ساندالىپ قالادى ەكەن. ايتپاقشى، كليەنتتەرىمىزدەن قاعىلدىق دەپ مالىمدەمە جاساعان 95 كاسىپكەردىڭ تۇگەلگە جۋىعى «ۆوسحود» دۇكەنىندەگى ساۋدا نۇكتەلەرىن جالعا العان بولىپ شىقتى. ياعني بۇل – بۇكىل قالانىڭ ەمەس، الاقانداي عانا «ۆوسحودتاعى» ات توبەلىندەي كاسىپكەرلەردىڭ شارۋاسى دەگەن ءسوز.

بۇل تۋرالى الماتى ۇكپ-نىڭ جاڭا تاعايىندالعان جەتەكشىسى نە ويلايدى ەكەن؟ ال ءبىزدىڭ ويىمىزشا، دىنمۇحاممەد ءابساتتاروۆ قالانىڭ جاي-جاپسارىنان بەيحابار سياقتى. بىردەڭەدەن حابارى بولسا، ۆەلوجولاققا سوقتىقپاس ەدى. الدە كوك تۇتىنگە كومىلگەن الماتىنىڭ اۋاسىن كوپ كورە مە ەكەن؟ ونسىز دا كورىنگەن جەردى كولىك تۇراعىنا اينالدىرىپ بىتتىك. اۆتوترافيكتى شەكتەپ جاتقانىمىز بەسەنەدەن بەلگىلى جايت قوي. ەندەشە دىنمۇحاممەد ءابساتتاروۆتىڭ اياق استىنان شي شىعارعانىنا جول بولسىن.

ءابساتتاروۆتىڭ جەكەمەنشىك تاسىمالداۋشى كومپانيالاردى ءبيتىن سالىپ قورعاشتاپ جۇرگەنىن كورگەندە ءتىپتى قارنىڭ اشادى. ونىڭ باسپا ءسوز قىزمەتى «تاسىمالداۋشىلاردىڭ ءحالى مۇشكىل» دەگەن سىڭايداعى رەليزدەرىن جان-جاققا قارشا بوراتىپ جاتىر. دىنمۇحاممەد بولات ۇلىنىڭ وزگە وڭىردەن كەلگەنى ءبىلىنىپ-اق تۇر. ءوزى سول اۆتوپاركتەرگە تيەسىلى اۆتوبۋستارعا وتىرىپ كوردى مە ەكەن؟ الدەكىمدەردىڭ شاشباۋىن كوتەرمەس بۇرىن كوك ءتۇتىن قۇسقان اڭعال-ساڭعال اۆتوبۋستارمەن قالانى ءبىر اينالىپ شىقسىنشى. بالكىم سوندا پىكىرى وزگەرەر.

ايتقان سايىن اۋزىڭ قىشيدى. سانانى سانسىراتقان ساۋال كوپ. ءابساتتاروۆ قالا جاعالاعان قازاقتىڭ تۇرمىسىن بىلە مە ەكەن؟ الدە ول ەلدەگى جاعدايدى تەلەديداردان عانا كورىپ، وي تۇيەتىن ادام با؟

ارينە، ءابساتتاروۆ مىرزا كاسىپكەرلەردىڭ قۇقىعىن قورعاي بەرسىن. ءبىراق تۇرعىندارعا زيانىن تيگىزبەسىن.

ءوزى قاناتىنىڭ استىنا الىپ جۇرگەن كاسىپكەرلەردىڭ نە تىندىرعانىن جازدا كوردىك قوي. كوشە بويلاي وسكەن كولەڭكەلى اعاشتاردى وتاپ، تۇراق قالتالارىن سالىپ تاستاعان. شىرىگەن اۆتوبۋستارى قالادا جۇيتكىپ ءجۇر. سونىڭ ءبارىن ويلاعاندا كەۋدەنى ءزىل، كوڭىلدى مۇڭ باسادى.

راس، اڭىزعا اينالعان الماتى، اپورت اڭقىعان سالقىن سابات الماتى كەلمەسكە كەتكەن. سوندا دا بارىمىزدى ساقتاپ، جوعىمىزدى تۇگەندەۋگە مۇمكىندىك بار. تەك ءابساتتاروۆ سياقتىلار الەكەدەي جالانىپ شىقپاسا...