الماتى قالاسى وڭىرلىك كوممۋنيكاسيالار قىزمەتىندە ەڭبەك، الەۋمەتتىك قورعاۋ جانە كوشى-قون كوميتەتىنىڭ الماتى قالاسى بويىنشا دەپارتامەنتىنىڭ باسشىسى ايدىنجان نارماتوۆتىڭ قاتىسۋىمەن بريفينگ ءوتتى، دەپ جازادى Qamshy.kz اقپارات اگەنتتىگى.

ونىڭ سوزىنە سۇيەنسەك، قازىرگى ۋاقىتتا قازاقستاندا بازالىق، مىندەتتى جانە ەرىكتى دەڭگەيلەردەن تۇراتىن كوپدەڭگەيلى زەينەتاقى جۇيەسى جۇمىس ىستەيدى.

ءبىرىنشى دەڭگەي (بازالىق) – مەملەكەتتىك بازالىق زەينەتاقى تولەمى، بۇل زەينەتكەرلىككە شىعاتىن بارلىق ازاماتقا ەڭبەك ءوتىلى مەن تابىسىنا قاراماستان بىردەي تاعايىندالادى.

مەملەكەتتىك بازالىق زەينەتاقى تولەمى قازاقستان رەسپۋبليكاسى پرەزيدەنتىنىڭ 2005 جىلعى 18 اقپانداعى قازاقستان حالقىنا ارناعان جولداۋىن ىسكە اسىرۋ ءۇشىن 2005 جىلدان باستاپ ەنگىزىلدى، ول كەدەيشىلىكتىڭ الدىن الۋدا نەگىزگى قۇرال بولدى جانە قارتتاردىڭ تابىسىن ۇلعايتۋعا مۇمكىندىك بەردى،-دەيدى ول.

ەكىنشى دەڭگەي (مىندەتتى) – ىنتىماقتى زەينەتاقى، ول 1998 جىلعى 1 قاڭتارعا دەيىن جيناقتالعان ەڭبەك وتىلىنە جانە 10 %-دىق مىندەتتى زەينەتاقى جارنالارىنان قالىپتاسقان زەينەتاقى جيناقتارىنىڭ ەسەبىنەن جۇرگىزىلەتىن ءبىرىڭعاي جيناقتاۋشى زەينەتاقى قورىنداعى  اۋدارىمدار – زەينەتالدىنداعى تابىسقا بايلانىستى رەسپۋبليكالىق بيۋدجەت قاراجاتىنان تولەنەدى.

قازاقستان رەسپۋبليكاسى پرەزيدەنتىنىڭ 2014 جىلعى 18 ماۋسىمداعى № 841 جارلىعىمەن بەكىتىلگەن قازاقستان رەسپۋبليكاسىنىڭ زەينەتاقى جۇيەسىن ودان ءارى جاڭعىرتۋدىڭ 2030 جىلعا دەيىنگى تۇجىرىمداماسىندا ىنتىماقتى زەينەتاقى مولشەرىن ءتيىمدى دەڭگەيدە ۇستاپ تۇرۋ ءۇشىن ولاردىڭ مولشەرىن جىل سايىن ينفلياسيا دەڭگەيىنەن ەكى پايىزعا ىلگەرىلەتە وتىرىپ يندەكستەۋ كوزدەلگەن،-دەپ اتاپ ءوتتى.

ءۇشىنشى دەڭگەي (ەرىكتى) – ەرىكتى زەينەتاقى جارنالارى ەسەبىنەن بەرىلەتىن تولەمدەر.

قولدانىستاعى قازاقستان رەسپۋبليكاسىنىڭ زەينەتاقى زاڭناماسىنا سايكەس، بولاشاقتا زەينەتكەرلەردىڭ قوسىمشا تابىس كوزىنە اينالاتىن ەرىكتى زەينەتاقى جارنالارى ەسەبىنەن ازاماتتارعا وزدەرىنىڭ جيناقتارىن ۇلعايتۋ مۇمكىندىگى بەرىلىپ وتىر.

وسىلايشا، قازىرگى زەينەتاقىمەن قامسىزداندىرۋ مودەلى ءاربىر ازاماتتىڭ ەرتەڭگى كۇنى زەينەتاقىمەن قامسىزداندىرىلۋىنا وزدەرىنىڭ دەربەس جاۋاپتى بولۋىن كوزدەيدى،-دەپ ايتىپ ءوتتى.