وسكەمەندىك مولدا جەلىنى شۋلاتقان سۋرەتكە قاتىستى تۇسىنىكتەمە بەردى، دەپ جازادى Qamshy.kz اقپارات اگەنتتىگى.
گولليۆۋد جۇلدىزدارىنىڭ وسكەمەندەگى «حاليفا التاي» مەشىتىندە تۇسكەن سۋرەتى جەلىدە قاتتى تالقىلانىپ جاتىر. اسىرەسە، ءدىن وكىلىنىڭ اكتريسا باي لينعا «ءبىرتۇرلى» قاراپ قالعان ءساتىن كوز زيناسىنا بالاپ، سان-ساققا جۇگىرتكەندەر كوپ.
Qamshy.kz اقپارات اگەنتتىگى ءمان-جايدى ءبىلۋ ءۇشىن سۋرەتتەگى مولدانىڭ وزىمەن تىلدەستى. ول وسكەمەندەگى «مۇحاممادي» مەشىتى يمامىنىڭ ورىنباسارى دۋبەك قۇسايىنوۆ بولىپ شىقتى. مولدانىڭ ايتۋىنشا، بۇل جەردە ارانداتۋشىلىقتان باسقا دانەڭە جوق.
- بۇل سەنساسياعا ۇلاسادى دەپ ويلاماپپىن. ءۇش ۇيىقتاسام دا، تۇسىمە كىرمەيتىن جاعداي. نەگىزى بۇل فوتودا قالانىڭ يمامدارى ساپتا ءتىزىلىپ تۇر. مەنىڭ فوتومدى ارنايى قيىپ الىپ، «كوز زيناسى» دەپ جالا جاۋىپ، كۇپىرلىككە سالىنعان نەگىزسىز، جالعان اقپارات قانا بۇل. ەشكىمنەن جاسىرىنىپ قاراعان جوقپىن، بۇل جەردە اشىقتىق بار، - دەگەن دۋبەك قۇسايىنوۆ جەلى قولدانۋشىلارىنىڭ ارەكەتىن ءوزى دە قاتاڭ سىنادى.
مولدا حالىقتى ادامگەرشىلىكتەن اتتاماي، مادەنيەتتى بولۋعا شاقىردى. «الەۋمەتتىك جەلىنى كەزىپ جۇرگەن فوتوسۋرەت – ادامنىڭ ويىندا جوق نارسەنى ايتىپ عايباتتاپ، ارانداتىپ، قوعامنىڭ تەرىس باعىتتاعى پىكىرىن تۋعىزباقشى بولعانداردىڭ ءىسى، - دەپ اشىندى.
- باسشىلىق ءبىزدى اكتەرلار كەلدى دەپ مەشىتكە شاقىرتقان سوڭ اق شاپانىمىزدى كيىپ باردىق. ۇلتتىق ناقىشتاعى شاپانمەن تۇرعاندىقتان، شەتەلدىكتەر قىزىققان بولۋى كەرەك، وزدەرى سۋرەتكە تۇسۋگە نيەت ءبىلدىردى. ءبىز كەلىسە كەتتىك. سوندا انا اكتريساعا كوزىمنىڭ قيىعىمەن قاراپ قالعان ءساتىم ءتۇسىپ قالىپتى. مەن قىزعا ەمەس، ونىڭ ەرەكشە كيىم ۇلگىسىنە نەمەسە كوزىلدىرىگىنە قاراعان بولۋىم كەرەك. ءدال وسىلاي ءورشىپ كەتەدى دەپ ويلاماپپىن. ول ايەل مەشىتكە اشىق-شاشىق كيىنىپ كەلگەن جوق، ءتىپتى، ونىمەن تىلدەسۋ دە ويىمدا بولعان جوق. ءبىز ءدىن وكىلى بولعاندىقتان، حالىق بىزگە قاراپ يماندىلىقتى تانيدى. ال ادامداردى تەرىس تاربيەلەۋ ءبىزدىڭ ويىمىزدا دا جوق، - دەدى دۋبەك قۇسايىنوۆ.
