كوك-توبەدە سۋرەتكە تۇسۋگە تىيىم سالىندى. بۇل تۋرالى فوتوگراف ماكسيم زولوتۋحين ءوزىنىڭ Facebook پاراقشاسىندا جازدى، دەپ حابارلايدى Qamshy.kz اقپارات اگەنتتىگى. 

«بۇگىن تاڭەرتەڭ بىر-ەكى سۋرەت ءتۇسىرۋ ءۇشىن كوك-توبەگە كوتەرىلدىم. الايدا مەنى جولدان كۇزەتشىلەر توقتاتىپ، تەررورلىق ءقاۋپى بار بولعاندىقتان ماعان فوتواپپاراتپەن جۇرۋگە رۇقسات بەرمەيتىندىكتەرىن ايتتى. ءبىراق، كەز كەلگەن ماسەلەدەن شىعۋدىڭ جولى بار. ولارعا 35 مىڭ تەڭگە بەرىپ، فوتواپپاراتىمدى كوتەرىپ، سەرۋەنىمدى جالعاستىردىم. تولەنگەن 35 مىڭ تەڭگە سۋرەتتەردىڭ تەرروريستتەر قولىنا تۇسپەۋىنە كەپىلدىك بەرە الاتىنداي»، دەپ جازدى ول.

فوتوگرافتىڭ «نەلىكتەن اقشا تولەۋىم كەرەك؟ مەن قايرات نۇرتاسقا نەمەسە تويعا ارناپ ۆيدەو جازبا ءتۇسىرىپ جاتقان جوقپىن عوي» دەگەن قارسىلىعىنا كۇزەتشىلەر ىشكى تاپسىرماعا سايكەس «فوتو-ۆيدەو ءتۇسىرۋدىڭ ساعاتىنا 35 مىڭ تەڭگە» دەپ بەكىتىلگەن قاعازدى ۇسىنعان.

اقى تولەۋدىڭ نەگىزگى سەبەپكەرى – فوتواپپارات بولعان. فوتوگرافقا كوك-توبەگە كەلگەن شەتەلدىكتەر دە فوتواپپاراتپەن جۇرۋگە تىيىم سالىنعاندى ايتىلعان. اتالمىش جاعدايدان كەيىن ماكسيم الماتى تۋريزم باسشىلىعىنا دەگەن رەنىشىن جاسىرا المادى. ول «مەن بارعان ەشبىر ەلدە سۋرەتكە تۇسىرۋگە تىيىم سالماعان» دەپ رەنىش ءبىلدىردى.

وسى جازبادان كەيىن ماكسيم زولوتۋحين الەۋمەتتىك جەلىدەگى ءوز پاراقشاسىندا كوك-توبە اكىمشىلىگىنەن اتالمىش ماسەلەگە بايلانىستى جاۋاپ كەلگەندىگىن ايتتى. ولار فوتوگرافتان كەشىرىم سۇراپ، كۇزەتشىلەردىڭ حابارلامانى دۇرىس ايتپاعانىن جەتكىزگەن. كوك-توبە اكىمشىلىگى: "سۋرەتتى قالا تۇرعىندارى، كاسىبي فوتوگرافتار جانە تۋريستەر تەگىن تۇسىرە الادى. وسىنداي جاعداي قايتالانا قالسا،بىزگە حابار بەرىڭىز" دەپ جازعان.