قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنىڭ اسكەري-قولدانبالى سپورت تۇرلەرىنەن 2018 جىلعا ارنالعان XVI سپارتاكيادا ەرەجەسىنىڭ تالاپتارىنا سايكەس ۇلتتىق ۇلاننىڭ الماتى قالاسىندا ورنالاسقان 3650 اسكەري ءبولىمىنىڭ بازاسىندا قىسقى پرەزيدەنتتىك كوپسايىس بويىنشا «وڭتۇستىك» وڭىرلىك قولباسشىلىعىنىڭ بىرىنشىلىگىنە جەكە - كوماندالىق جارىس وتكىزىلدى، دەپ حابارلايدى Qamshy.kz اقپارات اگەنتتىگى.
اتالعان كوپسايىس جەكە قۇرامنىڭ دەنە دايارلىعىن كوتەرۋ، ولاردىڭ سپورتتىق شەبەرلىكتەرىن شىڭداۋ ماقساتىندا وتكىزىلدى.
10 شاقىرىمداعى شاڭعى جارىسى جانە بەلتەمىرگە تارتىلۋ بويىنشا ورتاسىنان وق بويى وزىق شىققان 5571 اسكەري ءبولىمىنىڭ ماتەريالدىق-تەحنيكالىق قامتاماسىز ەتۋ روتاسى تەحنيكالىق قامتاماسىز ەتۋ ۆزۆودىنىڭ مامانى قاتارداعى ترۋبكين ۆلاديمير يۆانوۆيچ، پنيەۆماتيكالىق مىلتىقتان اتۋ بويىنشا مەرگەندەردى شاڭ قاپتىرعان 3650 اسكەري ءبولىمىنىڭ ماتەريالدىق-تەحنيكالىق قامتاماسىز ەتۋ روتاسىنىڭ مامان جۇرگىزۋشىسى قاتارداعى تاراسوۆ پاۆەل ۆيكتوروۆيچ جەڭىمپازدارعا لايىق مەدال جانە ديپلومدارمەن ماراپاتتالدى.
پرەزيدەنتتىك كوپسايىس بويىنشا جەكە بىرىنشىلىكتە جەڭىمپاز بولعان قاتارداعى تاراسوۆ ۆ.ي. ءوز اسكەري ءبولىمىنىڭ ءبىرىنشى ورىنعا شىعۋىنا جول اشتى. جالپىكوماندالىق ەسەپ بويىنشا جەڭىمپاز بولعان 5571 اسكەري ءبولىمى قولباسشىنىڭ اتىنان اۋىسپالى كۋبوكپەن جانە ەكىنشى، ءۇشىنشى ورىنداردى ءوزارا بولىسكەن 3650، 6506 اسكەري بولىمدەرى باعالى سىيلىقتارمەن ماراپاتتالدى.
ۇلتتىق ۇلاننىڭ 3650 اسكەري ءبولىمىنىڭ شتاتتان تىس ءتىلشىسى،
كىشى سەرجانت گۇلناز دۇيسەمبينوۆا
الماتى قالاسى
