قازاقستان رەسپۋبليكاسىنىڭ ۇلتتىق ەكونوميكا مينيسترلىگى دۇنيەجۇزىلىك بانك توبىمەن بىرلەسىپ «Doing business» سۋبۇلتتىق بايانداماسىنىڭ تانىستىرىلىمىن وتكىزدى، دەپ حابارلايدى Qamshy.kz اقپارات اگەنتتىگى ق ر ۇلتتىق ەكونوميكا مينيسترلىگىنىڭ ءباسپاسو قىزمەتىنە سىلتمە جاساپ.

تانىستىرىلىم جۇمىسىنا دۇنيەجۇزىلىك بانك ساراپشىلارى، كاسىپكەرلىكتى دامىتۋ سالاسىنداعى قازاقستاندىق ساراپشىلار، ورتالىق جانە جەرگىلىكتى مەملەكەتتىك ورگانداردىڭ وكىلدەرى، سونداي-اق بيزنەس-قوعامداستىق قاتىستى.

ءىس-شارا بارىسىندا ەل وڭىرلەرىندەگى جانە قالالارداعى كاسىپكەرلىك قىزمەتتى رەتتەۋ جانە جۇرگىزىلگەن رەفورمالاردى تالداۋ ناتيجەلەرى تانىستىرىلدى.

قازاقستانداعى «Doing business» سۋبۇلتتىق رەيتينگى بايانداماسىندا ءتورت كورسەتكىش: كاسىپورىن اشۋ، قۇرىلىسقا رۇقسات الۋ، ەلەكترمەن جابدىقتاۋ جۇيەسىنە قوسىلۋ جانە مەنشىكتى تىركەۋ بويىنشا سالىستىرمالى تالداۋ جاسالعان.

ۇلتتىق ەكونوميكا ۆيسە-مينيسترى ايباتىر جۇماعۇلوۆتىڭ ايتۋىنشا، 2017 جىلى قازاقستاننىڭ 2 قالاسى مەن 6 وڭىرىندە (استانا، الماتى، اقتوبە، قاراعاندى، قوستاناي، وسكەمەن، پاۆلودار، شىمكەنت) زەرتتەۋ جاسالعان.

ەلىمىزدىڭ ءاربىر وڭىرىندەگى ىسكەرلىك احۋالدى كەشەندى زەرتتەۋ بويىنشا جۇمىستاردى جالعاستىرۋ ماقساتىندا ۇكىمەت «Doing business» سۋبۇلتتىق رەيتينگىن وتكىزۋ تاجىريبەسىن تاراتۋعا شەشىم قابىلدادى. سۋبۇلتتىق رەيتينگ ناتيجەسى بويىنشا ۇزدىك تاجىريبە قازاقستاننىڭ قالعان وڭىرلەرىندە پايدالانىلاتىن بولادى.

ۇەم ۆيسە-مينيسترىنىڭ ايتۋىنشا، قازاقستان ءوز الدىنا دامىعان ەلدەردىڭ ۇزدىك 30-دىعىنا ەنۋ سەكىلدى ءورشىل ماقسات قويىپ وتىر. اتالعان ماقساتقا جەتۋ ءۇشىن بيزنەستى قايتا رەتتەۋ بويىنشا جوسپارلى ساياسات جۇرگىزىلىپ، رۇقسات بەرۋ جۇيەسى جەتىلدىرىلۋدە، مەملەكەتتىك ورگانداردىڭ باقىلاۋ-قاداعالاۋ قىزمەتى وڭتايلاندىرىلىپ، بيزنەس-كليمات جاقسارتىلۋدا. قابىلدانعان شارالاردىڭ ناتيجەسىندە قازاقستان 2017 جىلدىڭ قورىتىندىسى بويىنشا دۇنيەجۇزىلىك بانكتىڭ «Doing business» رەيتينگىندەگى 36 ورىندى يەلەندى.

«بىزگە دۇنيەجۇزىلىك بانكپەن بىرلەسىپ، ەلىمىزدەگى ءاربىر ءوڭىر مەن قالادا جەرگىلىكتى دەڭگەيدە ءىس جۇزىندە جۇرگىزىلگەن رەفورمالاردىڭ جۇزەگە اسىرىلۋىن تاۋەلسىز باعالاۋ قاجەت»، - دەدى ۆيسە-مينيستر.

ءىس-شارانىڭ قورىتىندىسىن تۇيىندەي كەلىپ، ۆيسە-مينيستر ايباتىر جۇماعۇلوۆ اتالعان جۇمىستاردىڭ جەكەلەگەن ءاربىر وڭىردەگى ىسكەرلىك احۋالدى ەداۋىر جاقسارتۋعا مۇمكىندىك بەرەتىندىگىن اتاپ كورسەتتى. ول جەرگىلىكتى اتقارۋشى ورگانداردى «Doing business» سۋبۇلتتىق رەيتينگى جوباسىن جۇزەگە اسىرۋعا بەلسەندى قاتىسۋعا شاقىردى.