تالدىقورعان قالاسىندا "انالارعا تاعزىم" ەسكەرتكىشى سالىنۋى مۇمكىن. مۇنداي يدەيانى وبلىس اكىمىنە "ەگەمەن قازاقستان" گازەتىندە تالاي جىل ەڭبەك ەتكەن  زەينەتكەر جۋرناليست كۇمىسجان بايجان ۇسىندى.

ءوڭىر باسشىسى اماندىق باتالوۆ جەتىسۋ جەرىنىڭ نازىك جاندارىن حالىقارالىق ايەلدەر كۇنىمەن قۇتتىقتادى. اماندىق باتالوۆ ءوز سوزىندە اتاپ وتكەندەي، ءقازىر الماتى وبلىسىنداعى بيزنەس سۋبەكتىلەرىنىڭ 40 پايىزعا جۋىعىن قىز-كەلىنشەكتەر باسقارىپ، جوعارى كورسەتكىشكە قول جەتكىزۋدە. سالتاناتتى جيىن بارىسىندا قۇرمەتكە بولەنگەن انالار مەن نازىك جاندىلار ريزاشىلىعىن ءبىلدىرىپ، ءوز ۇسىنىستارىن دا جەتكىزدى. زەينەتكەر جۋرناليست كۇمىسجان بايجان وبلىسقا انالارعا تاعزىم ەتەتىن ەسكەرتكىش قاجەت ەكەنىن ايتتى.

وبلىس اكىمى اماندىق باتالوۆ بۇل باستامانى قىزۋ قولدايتىنىن ايتتى. سەبەبى جەتىسۋ جەرىندەگى قىز-كەلىنشەكتەر ايماقتىڭ دامۋىنا ولشەۋسىز ۇلەس قوسىپ كەلەدى. مەملەكەتتىك قىزمەتكەرلەردىڭ تەڭ جارتىسىنا جۋىعى نازىك جاندىلار. بارلىق دەڭگەيدەگى ءماسليحات دەپۋتاتتارىنىڭ 70 پايىزى ايەل-انالاردان قۇرالعان. الماتى وبلىسىندا 80 «التىن القا» يەگەرى جانە  265 «كۇمىس القا» يەگەرى بار. ءقازىر ولاردىڭ قاتارى تاعى تولىعا تۇسكەن.    

"وتە جاقسى يدەيا. مەن قولدايمىن. بولاشاقتا  "انالارعا تاعزىم" ەسكەرتكىشى تالدىقورعاننان بوي كوتەرسە  قانداي كەرەمەت"، - دەدى ا. باتالوۆ.

زاۋرە شونبايەۆا، «التىن القا» يەگەرى:

– سەگىز بالام بار. ءۇش قىزىم، بەس ۇلىم. ەكى ۇلىم ماسكەۋگە بارىپ كەلدى. ءقازىر اكەسىنە كومەكتەسىپ جاتىر. ءبارى يبالى، تاربيەلى. قازاقستاننىڭ بولاشاعى، التىن ۋىقتاي ازاماتتارى بولادى دەپ سەنەمىن.

جانسايا مۇسىلمانبەكوۆا، «كۇمىس القا» يەگەرى:

– جاسىم 33-تە، 6 بالانىڭ اناسىمىن. 4 قىز، 2 ۇل تاربيەلەپ جاتىرمىز. جولداسىم ەكەۋمىز جوسپارلاعان جوقپىز. بىزگە اللانىڭ بەرگەنى عوي، سوعان ءتاۋبا دەپ ءجۇرمىز. ارمانىم 4 قىزىمدى، 2 ۇلىمدى قازاقستاننىڭ ءبىر ۇلگىلى ازاماتى قىلىپ تاربيەلەگىم كەلەدى. مەنىڭ بار ارمانىم سول.