الماتى وبلىسىندا مەكتەپكە ورمال تاعىپ، حيدجاب كيەتىن وقۋشىلارمەن ءتيىستى جۇمىستار جۇرگىزىلە باستادى. بۇگىنگى كۇنى 33 وقۋشى ورامالىن شەشتى. ءقازىر وڭىردە حيدجاب ماسەلەسىنە بايلانىستى ءبىلىم باسقارماسى پروكۋراتۋرا جانە ءدىنتانۋشى قىزمەتكەرلەرىمەن بىرلەسىپ اتا-انالار اراسىندا ءتۇسىندىرۋ جۇمىستارىن جۇرگىزىپ جاتىر.

مۇنداي شارالار ءوڭىردىڭ ەڭبەكشىقازاق، تالعار، جامبىل، ىلە اۋداندارى مەن تالدىقورعان قالاسىنداعى ءبىلىم شاڭىراقتارىندا جۇرگىزىلدى. وبلىستىق ءبىلىم باسقارماسى باسشىسىنىڭ ورىنباسارى جاڭىل سۇلەيمەنوۆا وقۋشىنىڭ ورامال تاعىپ كەلۋى ءبىلىم بەرۋ زاڭنامالارىنا، مەكتەپتىڭ ىشكى تالاپتارىنا قايشى ەكەنىن جەتكىزدى. پروكۋراتۋرا وكىلدەرى اتا-انا قۇقىقتارىنان قۇلاعدار ەتىپ، پسيحولوگتار ورامال وقۋشىلاردى ەكى جاققا ءبولىپ، ءوزارا پسيحولوگيالىق كەدەرگى كەلتىرەتىنىن ءتۇسىندىردى.

ناتيجەسىندە ەڭبەكشىقازاق اۋدانىنداعى «راحات» ورتا مەكتەبىندە ءبىر ءۇيدىڭ ەكى وقۋشىسى مەكتەپكە بۇدان بىلاي حيدجابسىز كەلەتىن بولدى. جامبىل اۋدانىنداعى قارعالى اۋىلىنداعى №45 مەكتەپتىڭ اتا-اناسى دا مامانداردىڭ ءتۇسىندىرۋ جۇمىستارىن قولداپ، ساتبەك كەنجەبەكوۆتىڭ ەكى قىزى ورامال تاقپايتىن بولدى.

«بۇل جەردە اتا-انالاردىڭ دا قوعامداعى جاعدايعا، مەكتەپ تارتىبىنە تۇسىنە قاراي باستاعانىن اتاپ ءوتۋ كەرەك»، دەدى وبلىستىق ءبىلىم باسقارماسى باسشىسىنىڭ ورىنباسارى ج. سۇلەيمەنوۆا.

مۇنداي جۇمىستار الداعى ۋاقىتتا ءوڭىردىڭ باسقا اۋداندارىندا دا جالعاساتىن بولادى.