تالدىقورعاندا «تاعزىم» اتتى ادەبي-مۋزىكالىق كەش ءوتتى. ءتورتىنشى رەت ۇيىمداستىرىلىپ وتىرعان رۋحاني شارا ادەبيەت ايدىندا قالام تەربەگەن اقىن جازۋشىلار مەن جۋرناليستەر ءومىرى مەن شىعارماشىلىعىنا ارنالدى.

تالدىقورعان قالاسىنداعى ءى. جانسۇگىروۆ اتىنداعى مادەنيەت سارايىنا جەتىسۋدىڭ سەگىز بىردەي ونەر تارلانىن ەسكە الۋعا ارنالعان ادەبي سازدى كەش ءوتتى. كەش جۇرگىزۋشىسى بەلىگىلى اقىن جۇماتاي وسپان ۇلى. وسىمەن  ءتورتىنشى رەت ۇيىمداستىرىلىپ وتىرعان «تاعزىم» اتتى شاراعا الماتى وبلىسى اكىمدىگى جان-جاقتى قولداۋ كورسەتىپ، وبلىستىق تىلدەردى دامىتۋ باسقارماسى ۇيتقى بولعان.   مۇنداعى  ماقساتى   – وڭىردەگى ۇلت مادەنيەتىنىڭ وركەندەۋىنە ەلەۋلى ۇلەس قوسىپ كەلكەن ونەر مايتالماندارىنىڭ ەڭبەگىن  كەڭىنەن دارىپتەۋ  ارقىلى  جاستارعا ۇلگى ونەگە سىيلاۋ.

كەشتە اقىن تەمىرعالي رۇستەمبەكوۆ، قۇداش مۇقاشيەۆ، ادەبيەت پەن جۋرناليستيكانى قاتار الىپ جۇرگەن باقىت ءالىموۆ، رافات ءابدىعۇلوۆتاردىڭ ومىرىنەن سىر شەرتىلىپ، ولەڭدەرى مەن شىعارمالارى وقىلدى. ال تەلەجۋرناليستيكادا تەر توككەن ەدىل توكەنوۆ، تۇرسىنبەك ايتبەك، ناتاليا بورسەنكو تۋرالى بەينەفيلمدەر كورسەتىلىپ، ولاردىڭ ەفيرگە دايىنداعان ماتەريالدارى جۇرت نازارىنا ۇسىنىلدى. سونداي-اق تەاتر اكتەرى اسان يسايەۆتىڭ ساحناداعى ومىرىنە ارنالعان دەرەكتى تۋىندى دا كەش قاتىسۋشىلارىنىڭ كوڭىلىن تەبىرەنتتى.

ادەبي كەشتە ەسكە الىنعان ءاربىر تۇلعانىڭ بەينەسى قىلقالاممەن قاعازعا ءتۇسىرىلىپ، تۋىستارىنا تابىستالدى. الماتى وبلىستىق تىلدەردى دامىتۋ باسقارماسىنىڭ تاعلىمى مول شارانى ۇيىمداستىرۋداعى باستى ماقساتى ونەر وعلاندارىن ەسكە الۋ ارقىلى جاستار جادىسىندا جاڭعىرتۋ.

كەش شىمىلدىعى  وت اۋىزدى، وراق ءتىلدى زاعيىپ اقىن تەمىرعالي رۇستەمبەكوۆتىڭ 14 جاسىندا اكە-شەشەسىن ساعىنا جازعان جىر شۋماقتارىمەن ءتۇرىلدى. وسىدان سوڭ اقىننىڭ ءومىرى جايلى  «جەتىسۋ» تەلەارناسى ارنايى  دايىنداعان بەينەبايان جۇرت نازارىنا ۇسىنىلىپ، قىزى كۇنسايا وسپانوۆا اكەسى تۋرالى ەستەلىكتەرىمەن ءبولىستى. كەلەسى كەزەكتە جۇرت ليريك اقىن، بىرنەشە درامالىق  شىعارمالار مەن داستانداردىڭ اۆتورى  قۇداش مۇقاشيەۆتى ەسكە الدى.  قىسقا عانا قىرىق ءبىر جىلدىق عۇمىرىندا  ارتىنا وشپەس ءىز قالدىرىپ كەتكەن  قۇداش اقىن مەن ونىڭ جارى اقجولتايدىڭ جاستىق شاعى شەبەر سومدالعان ساحنالىق قويىلىمدا كورىنىس تاپتى. ءدال وسىلاي باستالعان تاعىلىمدى شارا اۋەزدى ءان، تولعامدى جىر جولدارىمەن جالعاسىپ، قازاق جۋرناليستيكاسىنىڭ قوس تارلانى  باقىت ءالىموۆ، رافات ءابدىعۇلوۆقا، «جەتىسۋ» تەلەارناسىنا ەلەۋلى ەڭبەك سىڭىرگەن ەدىل توكەنوۆ، ناتاليا بورسەنكو، تۇرسىنبەك ىبىرايىمبەكۇلىنا جانە ساحنالىق تەكتى ونەردىڭ  تەڭدەسىز شەبەرى  اسان يسايەۆقا ارنالدى.  جينالعان جۇرت الدىندا ءسوز العان  الماتى وبلىسىنىڭ تىلدەردى دامىتۋ جونىندەگى باسقارماسىنىڭ باسشىسى ايدار باشبايەۆ : «ۇلتىمىزدىڭ رۋحاني، مادەني مۇراسى – ءسوز ونەرىنىڭ اسىل قازىناسىنا ولشەۋسىز ۇلەس قوسقان جەتىسۋ ولكەسىنىڭ مادەنيەت جانە ادەبيەت سالاسىنىڭ قايراتكەرلەرىنە قۇرمەت كورسەتۋ – ءبىزدىڭ باستى پارىزىمىز. وسىدان ءتورت جىل بۇرىن اقىن احمەتبەك كەندىربەك ۇلىنىڭ باستاماسىمەن قولعا الىنعان «تاعزىم» شاراسى جىل سايىن  جالعاسىپ، داستۇرگە اينالدى. «جاقسىنىڭ جاقسىلىعىن ايت، نۇرى تاسىسىن» دەمەكشى، جوبا اۆتورىنا ايتار العىسىمىز شەكسىز. بۇل ءىس بۇدان بىلاي دا جالعاسا بەرمەك. ماڭگىلىككە باعىت العان قازاق ەلى باردا ارىستاي ازاماتتاردىڭ ەسىمى ەل ەسىنەن ەش وشپەيتىن  بولادى» – دەدى.

 شارا بارىسىندا  كەش كەيىپكەرلەرىنىڭ قىلقالام شەبەرلەرى سالعان  سۋرەتتەرى تۋعان-تۋىس، ەت جاقىندارىنا  تابىس  ەتىلدى.