سول ءبىر ناۋبەت جىلدارى قانشاما ۇلتتى جىلى قابىلداپ، ءوسىپ وركەندەۋىنە مۇمكىندىك جاساعان قازاق ەلىنە العىسىم شەكسىز. بۇگىن الماتى وبلىسىنداعى باستوبە اۋىلىندا «العىس ايتۋ» كۇنىنە وراي وتكەن شاراعا ارنايى كەلگەن اسىلى وسمان جينالعان جۇرتشىلىققا وسىنداي جىلى لەبىزىن ءبىلدىردى.
"ەلباسىمىز نۇرسۇلتان نازاربايەۆتىڭ 1 ناۋرىزدى «العىس ايتۋ» كۇنى دەپ جاريالاۋى كورەگەن كوسەمدىكپەن، ومىرلىك تاجىريبەمەن جاسالعان زاڭدى شەشىم. ويتكەنى بۇگىندە ەلىمىزدە قانشاما ۇلت پەن ۇلىس ءتاتۋ-تاتتى، باقۋاتتى ءومىر ءسۇرىپ جاتىر. قانشاما ءدىني سەنىمنىڭ ادامدارى بىر-بىرىمەن تۇسىنىستىكتە، ىنتىماق-ىمىرادا تۇرىپ جاتىر. وسىنىڭ بارلىعى قازاق حالقىنىڭ كەڭپەيىل مەيىرباندىعىنىڭ جانە قيىن-قىستاۋ زاماندا وسىناۋ كيەلى جەرگە ەرىكسىز تابان تىرەپ، ەركىن وسىپ-ونگەن بارلىق ەتنوستاردىڭ رياسىز ريزاشىلىعىنىڭ ارقاسىندا دەپ بىلەمىن!" - دەيدى اسىلى وسمان.
العىس ايتۋ كۇنى الماتى وبلىسى، قاراتال اۋدانىنىڭ باستوبە اۋىلىنداعى «قازاق حالقىنا مىڭ العىس» اتتى ەسكەرتكىش ماڭىندا ءوتتى. يگى شاراعا جينالعاندار مونۋمەنت باسىنا گۇل شوقتارىن قويىپ، ەستەلىكتەرىمەن ءبولىستى. قازاقستان حالقى اسسامبلەياسىنىڭ مۇشەسى، الماتى وبلىسىنىڭ قۇرمەتتى ازاماتى اسىلى وسمان العىس ايتۋ كۇنىنىڭ ءمان-ماعىناسىن تەرەڭ ۇعىنىپ، جۇرەكپەن سەزىنۋ كەرەكتىگىن ايتادى. قازاق ءتىلىنىڭ جاناشىرى بۇل مەرەكە ۇلت پەن ۇلىستى، ادام مەن ادامدى جاقىنداتىپ، بىر-بىرىنە دەگەن مەيىرىمىن ەسەلەيدى. سول ءبىر ناۋبەت جىلدارى قانشاما ۇلتتى جىلى قابىلداپ، ءوسىپ وركەندەۋىنە مۇمكىندىك جاساعان قازاق ەلىنە العىسىم شەكسىز دەپ اتاپ ءوتتى.
«العىس ءسوزىنىڭ ءوزى ىستىق ىقىلاس، جىلى جۇرەكپەن ايتىلعان ىزگى نيەتتەگى ءسوز. سوندىقتان دا مەن وتانى ءبىر ازاماتتارىمىزدىڭ بارلىعىن العىس ايتۋ كۇنىمەن قۇتتىقتايمىن. وسى دارەجەگە جەتكىزگەن قازاق حالقىنا العىسىم شەكسىز!»، - دەدى اسىلى وسمان.
«قازاق حالقىنا مىڭ العىس» مەموريالدى كەشەنىن 2012 جىلى كورەي ۇلتىنىڭ وكىلدەرى ورناتقان. سەبەبى 1937 جىلى توتاليتارلىق جۇيەدەن جاپا شەككەن مىڭداعان كورەيلەر ءدال وسى جەرگە كوشىرىلگەن بولاتىن. اش-جالاڭاش، بارار جەر، باسار تاۋى جوق جۇرتتى قازاق حالقى باۋىرىنا باستى. ۇيىنە كىرگىزىپ، ءبىر جاپىراق نانىمەن ءبولىستى. امان قالىپ، ۇرپاق وربىتۋىنە سەبەپشى بولدى. وسى جاقسىلىقتى ۇمىتپاعان كەيىنگى بۋىن ءالى كۇنگە دەيىن قازاق ەلىنە ريزاشىلىعىن ءبىلدىرىپ كەلەدى.
