الماتى وبلىسىنىڭ اكىمى اماندىق باتالوۆ سۋ باسقان اۋىلدارعا ءوزى باردى. ءوڭىر باسشىسى ءۇش اۋداندا بولىپ، ونداعى احۋالمەن تانىستى.

الماتى وبلىسى تۇزدىباستاۋ اۋىلىندا سۋ باسقان اۋماقتاردى تازارتۋ جۇمىستارى ءالى دە جالعاسىپ جاتىر. مۇندا قاردىڭ قارقىندى ەرۋى ناتيجەسىندە 27 اۋلا سۋ استىندا قالعان. وبلىس اكىمى جۇمىس بارىسىندا سۋ باسقان اۋلالاردى تازارتۋ ءۇشىن قۇرال – جابدىقتار مەن ادام كۇشتەرىنىڭ سانىن كوبەيتۋدى تاپسىردى. بەلسەندى جۇمىستىڭ ناتيجەسىندە بۇگىنگى كۇنى 3000 تەكشە مەتر سۋ سورىلدى.

«قازىرگى ۋاقىتتا وسى ەلدى مەكەندەگى ماسەلەلەر شەشىمىن تاپتى، ءبىراق بۇل جۇمىس اياقتالمايدى. سۋ تاسقىنىنىڭ الدىن الۋ ءۇشىن ساراپشىلار ءالى دە جۇمىس ىستەۋ ۇستىندە. سۋ استىندا قالعان اۋىل تۇرعىندارىنىڭ جاعدايىن ايماقتىق كوميسسيا ءجىتى باقىلاۋعا الىپ، سونىمەن قاتار ماتەريالدىق كومەك كورسەتىلەدى. ايماقتا 144 سۋ قويماسى بار، ولار بويىنشا دا جەكە جۇمىستار جۇرگىزىلىپ جاتىر»، – دەيدى وبلىس اكىمى اماندىق باتالوۆ.

ايتا كەتەيىك، اۋىل كوشەلەرى مەن اۋلالاردا جينالعان سۋدى تازارتۋ ءۇشىن ءۇشىن جەرگىلىكتى اتقارۋشى ورگانداردان شامامەن 326 ادام، وبلىستىڭ توتەنشە جاعدايلار دەپارتامەنتىنەن 177 قىزمەتكەر، 132 بىرلىك تەحنيكا مەن 22 موتور سورعىسىن قولداندى.

تالعار اۋدانىنداعى تۇزدىباستاۋ اۋىلىندا ەرىگەن قار سۋىنان ءبىرقاتار ۇيلەردىڭ اۋلاسىنا سۋ كىرگەن. جاعدايدى ساراپتاعان اكىم جۇمىس ىستەپ جاتقان تەحنيكا سانىن كوبەيتۋدى تاپسىردى. كەرەك بولسا ءورت ءسوندىرۋ كولىكتەرىن دە سۋ سورۋعا جۇمىلدىرۋ قاجەتتىگىن ايتتى.

وبلىس اكىمى قاراساي اۋدانىنا قاراستى قىرعاۋىلدى جانە اباي اۋىلدارىنا دا بارىپ قايتتى. ءقازىر ەرىگەن قار سۋىنان ارىلۋعا 3 ەكسكاۆاتور، جۇك كولىگى جانە 25 ادام جۇمىس ىستەپ جاتىر. ارىقتاردىڭ ارنالارى تەرەڭدەتىلىپ، جاعاسى قۇم سالىنعان قاپتارمەن بوگەتتەر تۇرعىزىلۋدا. قۇتقارۋشىلار زارداپ شەككەندەردىڭ بارلىعىنا كومەك كورسەتۋدە.

اماندىق باتالوۆ قاراساي اۋدانىنداعى قاسكەلەڭ قالاسىنا بارىپ، ءمان-جايدى ءبىلىپ قايتتى.

اۋدان ورتالىعى قاسكەلەڭ قالاسىندا وبلىس اكىمىنە اۋدان اكىمىنىڭ ورىنباسارى، توتەنشە جاعدايلار بويىنشا اۋداندىق كوميسسيا ءتوراعاسى نۇرجان ساتۋبەكوۆ ەسەپ بەردى. 

«سوڭعى كۇندەرى ەرىگەن قار سۋىنان جاعداي ەداۋىر كولەمدە ۇلعايىپ جاتىر. قالا كوشەلەرى مەن اۋلالارىنا جينالعان سۋدان تازارتۋ جۇمىستارىنا 100-گە جۋىق ادام جۇمىلدىرىلدى. شامالعان اۋىلىن دا سۋ باسقان. ول اۋىلدا دا جۇمىس كۇشەيتىلدى. 10-شاقتى تەحنيكا جىبەرىلدى. قىزىل سۋ اۋىل ماڭىنداعى القاپتاردا 80 ادام توقتاۋسىز جۇمىس ىستەپ جاتىر»، – دەدى اۋداندىق اكىمنىڭ ورىنباسارى توتەنشە جاعدايلار جونىندەگى اۋداندىق كوميسسيانىڭ ءتوراعاسى نۇرجان ساتۋبەكوۆ.

كەشە كەشكە قاراي جامبىل اۋدانى توتەنشە جاعداي جاريالاعان بولاتىن. ءوڭىر باسشىسى وزگەلەردەن كوبىرەك زارداپ شەككەن قاينازار اۋىلىندا دا بولدى. قۇتقارۋشىلار مەن ۇلتتىق گۆارديا جاۋىنگەرلەرىنىڭ جىلدام قيمىلداعانىنىڭ ارقاسىندا سۋ اۋىلدان تىس باعىتقا بۇرىلدى. اماندىق باتالوۆ سۋ كىرگەن بىرنەشە ۇيدە بولىپ تۇرعىندارمەن كەزدەستى. اڭگىمە بارىسىندا بۇل باسپانالار ەشقانداي رۇقساتسىز سالىنعانى انىقتالدى. ەكى ءۇيدىڭ دە قۇجاتتارى تولىق بولماي شىقتى. بىرىندە جالعىز باستى انا، ەكىنشىسىندە سوزىلمالى اۋرۋمەن اۋىراتىن ناۋقاس تۇرىپ جاتىر. ەكى وتباسىنىڭ اۋىر جاعدايى ەسكەرىلىپ، وبلىس اكىمى اۋدان باسشىلارىنا زارداپ شەككەندەرگە بارلىق قاجەتتى كومەك كورسەتۋدى تاپسىردى.

ارنايى قۇرىلعان كوميسسيا ءۇي-ۇيدى ارالاپ، قىزىل سۋدان زارداپ شەككەندەردىڭ ءتىزىمى جاسالاتىن بولدى. ءوڭىر باسشىسى ساپاردى قورتىندىلاي كەلە جاعداي تولىق سارالانىپ،  اكت جاسالعاننان كەيىن قاجەتتى كومەك كورسەتىلەتىنىن تىلگە تيەك ەتتى.