تالدىقورعان قالاسىنىڭ «جاستار» سپورت سارايىندا دزيۋدودان جاستار اراسىندا قازاقستان رەسپۋبليكاسىنىڭ چەمپيوناتى باستالدى. ءدۇبىرلى دوداعا ەلىمىزدىڭ ءار وڭىرىنەن 400-دەن اسا سپورتشى كەلىپ، شەبەرلىك بايقاسۋدا.

جارىستىڭ سالتاناتتى اشىلۋ راسىمىندە الماتى وبلىسى اكىمىنىڭ ورىنباسارى جاقسىلىق ومار العاش ءسوز الىپ، سپورتشىلارعا ءوزىنىڭ جىلى لەبىزىن ءبىلدىردى. – قۇرمەتتى سپورت سۇيەر قاۋىم! وبلىس تۇرعىندارىنىڭ جانە ءوڭىر باسشىسى اماندىق باتالوۆتىڭ اتىنان جارىسقا كەلگەن بارلىق سپورتشىعارعا جەتىسۋ جەرىنە قوش كەلدىڭىزدەر دەگىم كەلەدى! سىزدەرمەن بۇگىن ۇلكەن جارىستا باس قوسىپ وتىرمىز. كەز-كەلگەن مەملەكەت ءوزىنىڭ ايبارىن، كۇشىن الەمگە پاش ەتۋ ءۇشىن جانە ەكونوميكالىق ساياسي جاعدايىنىڭ تۇراقتى ەكەنىن بايقاتۋ ماقساتىندا، ەڭ اۋەلى وسى سپورتقا ۇلكەن كوڭىل بولەدى. قازاقستاندا دا سپورتشىلاردىڭ دەڭگەيىن كوتەرۋ باعىتىندا كوپتەگەن جۇمىستار قولعا الىنىپ، بارلىق جاعداي جاسالىنىپ جاتىر. قازىرگى تاڭدا ەلىمىزدىڭ جانە سونىڭ ىشىندە الماتى وبلىسىنىڭ سپورتشىلارى الەمدىك ارەنالاردا توپ جارىپ، الاشتىڭ اتىن شىعارىپ جۇرگەندىگى بارشاڭىزعا ءمالىم. وسىنداي ۇلكەن جانكۇيەرى بار دزيۋدو كۇرەسى تەك قازاقستاندا عانا ەمەس، الەمدە دە قاناتىن كەڭگە جايىپ وتىر. سوندىقتان دا ساڭلاقتارىمىز بايراقتى باسەكەلەردە ەلىمىزدىڭ داڭقىن اسىرىپ، كوك تۋىمىزدى بيىكتەن جەلبىرەتە بەرەتىنىنە سەنىمدىمىن. ال، بۇگىنگى دوداعا تۇسەتىن سپورتشىلارعا تەك قانا ساتتىلىك تىلەيمىن، — دەدى ج.ومار.

سونداي-اق، ءوز كەزەگىندە ءسوز العان پەكين وليمپياداسىنىڭ كۇمىس جۇلدەگەرى، قر-نىڭ دزيۋدو فەدەراسياسىنىڭ ۆيسە پرەزيدەنتى اسحات جەتكەيەۆ ايتۋلى جارىستىڭ جوعارى دەڭگەيدە وتۋىنە قولداۋ كورسەتكەن وبلىس اكىمدىگىنە ريزاشىلىعىن جەتكىزدى. جارىستا تەك قانا مىقتىلار جەڭىسكە جەتسىن دەپ اق تىلەگىن اقتاردى.

ايتالىق، جارىسقا كەلگەن سپورتشىلار 16 سالماق دارەجەسى بويىنشا تاتميگە شىعاتىن بولادى. سونىڭ ىشىندە 60-قا جۋىق دزيۋدوشى جەتىسۋ جەرىنىڭ نامىسىن قورعاماق.  بۇگىنگى سايىستا ۇلدار 55-60 كەلى سالماقتا ونەر كورسەتسە، قىزدار 44،48 جانە 52 كەلى سالماقتا شەبەرلىك بايقاستى.

جارىسقا الماتى وبلىسىنىڭ ساڭلاقتارى تىڭعىلىقتى دايىندىقپەن كەلگەندىكتەرىن دالەلدەپ باعۋدا. سولاردىڭ ءبىرى تالدىقورعاندىق سپورتشى، جاستار اراسىندا قر-نىڭ چەمپيونى جانە ەۆروپا كۋبوگىنىڭ يەگەرى  — دامير بولاتبەك. جەرلەسىمىز بۇگىن 55 كەلى سالماقتا بەس كەزدەسۋ وتكىزىپ، اقتىق سىندا قىزىلوردا وبلىسىنىڭ سپورتشىسىن ۇتتى. وسىلايشا ول تاعى ءبىر مارتە ەل بىرىنشىلىگىندە توپ جارىپ وتىر. – بۇل سايىستا جەڭىسكە جەتۋىمە بىردەن ءبىر سەبەپكەر بولعان جەكە باپكەرىمە جانە ماعان قولداۋ كورسەتكەن بارلىق جانكۇيەرلەرىمە شىنايى العىسىمدى بىلدىرگىم كەلەدى. قارسىلاستارىم مىقتى بولدى، الايدا جاقسى دايىندىقتىڭ ارقاسىندا جەڭىستىڭ ءدامىن تاتتىم،  — دەگەن جاس بالۋان ءساتىن سالسا، ەندىگىدە ازيا، الەم بىرنىشىلىكتەرىندە  توپ جارۋدى ماقسات ەتىپ وتىر.

دامير اقتىق سىننىڭ ءبىرىنشى اينالىمىندا جامباسقا لاقتىرۋ ارقىلى العا شىقسا، كەلەسى دە قارسىلاسىنا بۇراپ اينالدىرۋ ءتاسىلىن قولدانىپ، ءوزىنىڭ مىقتى ەكەنىن دالەلدەپ باقتى.

جارىس 7 ناۋرىزعا دەيىن سوزىلادى. ەرتەڭ ۇلدار 66، 73، 81 كەلىدە ب ا ق سىناسسا، قىزدار 57، 63 جانە 70 كەلىدە تاتاميگە شىعىپ، سايىس كوركىن قىزدىرماق.