بىلتىر الماتى وبلىسى اكىمىنىڭ 100 ءبىلىم گرانتى بولىنسە، بيىل بۇل كورسەتكىش ەكى ەسەگە وسەدى.

«ەلباسىنىڭ 5 الەۋمەتتىك باساتاماسىنىڭ ءۇشىنشىسى — جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ دەپ اتالادى. وسى رەتتە، پرەزيدەنت الداعى وقۋ جىلىنا تاعى 20 مىڭ ءبىلىم گرانتىن بولەتىنىن ايتتى. ءبىز دە ءوز تاراپىمىزدان ەلباسى باستاماسىنا ءۇن قوسىپ، وبلىس اكىمى گرانتتارىنىڭ سانىن 100-گە ارتتىرماقپىز. وسىعان دەيىن 438 جەتىسۋلىق ستۋدەنت وبلىس اكىمى گرانتى بويىنشا ءبىلىم السا، كەلەر وقۋ جىلىندا ولاردىڭ سانى 538 بولادى». بۇل تۋرالى بۇگىن وبلىس اكتيۆىنىڭ جيىنىندا الماتى وبلىسىنىڭ اكىمى اماندىق باتالوۆ ايتتى. باسقوسۋ ەلباسىنىڭ 5 الەۋمەتتىك باستاماسى اياسىندا وبلىستىق اتقارۋشى بيلىكتىڭ جۇمىسىن ۇيىمداستىرۋ ماسەلەسىنە ارنالدى.

اكتيۆ جيىنىنا وبلىسقا قارايتىن اۋدان-قالالار سەلەكتورلىق رەجيمدە قاتىستى. 5 الەۋمەتتىك باستامانىڭ ءارقايسىسىنا جەكەلەي توقتالعان ا.باتالوۆ اتقارىلۋى كەرەك جۇمىستاردى پىسىقتاپ، ناقتى تۇلعالارعا تاپسىرمالار بەردى.

 «ءتيىستى سالا باسشىلارى مەن ورىنباسارلارىما، سونداي-اق اۋدان، قالا اكىمدەرىنە 12-ناۋرىزعا دەيىن ەلباسى باستامالارىن جۇزەگە اسىرۋ جونىندەگى جول كارتاسىن ازىرلەۋدى تاپسىرامىن» دەگەن ءوڭىر اكىمى وسى اپتادا 8-ناۋىرزدان باسقا كۇندەردىڭ بارلىعىندا جۇمىس ىستەۋ كەرەكتىگىن اتاپ ءوتتى.

وبلىستىق ءبىلىم باسقارماسى باسشىسىنىڭ ورىنباسارى مايگۇل وماروۆانىڭ ايتۋىنشا، تەگىن ءبىلىم گرانتىنا وبلىستىڭ كەز-كەلگەن تۇلەگى ۇمىتكەر بولا الادى.

«ەگەر تۇلەك جيناعان ۇبت دەگى بالىمەن جوو-نا تۇسە الماسا، ءبىزدىڭ اكىمىنىڭ گرانتىنا قاتىسۋعا مۇمكىندىگى بار. ارنايى كوميسسياعا قۇجاتتارىن وتكىزەدى. ءبىز  بيىل اۋىلشارۋاشىلىق، تەحنيكالىق جانە پەداگوگيكالىق ماماندىقتارعا باسىمدىق بەرىپ وتىرمىز. جانە وتباسىلىق جاعدايى تومەن تۇلەكتەردىڭ جاعدايىنا قاراپ، ولاردىڭ تەگىن ءبىلىم الۋىنا بارىنشا قولداۋ كورسەتەمىز. ال تۇلەكتەر اكىمنىڭ گرانتى ارقىلى ەلىمىزدىڭ  كەز-كەلگەن جوو-نا تۇسە الادى»، – دەدى م.وماروۆا.

جالپى بيىل الماتى وبلىسى بويىنشا 16 مىڭنان استام وقۋشى مەكتەپ بىتىرەدى. ونىڭ 13 مىننان استامى قازىردەن ۇبت-گە قاتىسۋعا نيەت بىلدىرگەن.

«وتكەن جىلى 8000-نان استام وقۋشى جوو تۇسسە، سونىڭ 3800 تۇلەگى گرانت يەگەرى بولعان. بيىل سول مەجەدەن اسامىز دەگەن ويدامىز. سەبەبى وبلىس اكىمى تاراپىنان وتكەن جىلى 100 ءبىلىم گرانتى بولىنسە، بيىل  قوسىمشا تاعى 100 گرانت ءبولۋ جوسپارلانعان»، – دەدى م.وماروۆا.