الماتى وبلىسىندا «كەدەرگىسىز كەلەشەك» پارتيالىق جوباسى اياسىندا وبلىستىق جاستار ساياساتى ماسەلەلەرى باسقارماسى، «جاس وتان» جاستار قاناتى مەن ناشار ەستيتىن جانە ساڭىراۋ بالالارعا ارنالعان ارناۋلى مەكتەپ-ينتەرناتىنىڭ قولعا الۋىمەن «جۇرەكتەن جۇرەكە» اكسياسى ۇيىمداستىرىلدى.

الماتى وبلىسى جاستار ساياساتى ماسەلەلەرى باسقارماسى، جاستار رەسۋرستىق ورتالىعى، “جاس وتان” جق ۇيىتقى بولۋىمەن مۇمكىندىگى شەكتەۋلى جاستار اراسىندا  “جۇرەكتەن جۇرەككە” بايقاۋى ءوتتى. اتالمىش وبلىستىق بايقاۋ استانا قالاسىنىڭ 20 جىلدىق مەرەكەسى قارساڭىندا ۇيىمداستىرىلدى.

شارانىڭ ماقساتى – وبلىسىمىزعا  قاراستى شالعاي اۋدان، قالالارداعى مۇمكىندىگى شەكتەۋلى جاستاردىڭ شىعارماشىلىق دەڭگەيىن  دامىتۋعا بارىنشا قولداۋ كورسەتۋ، ولاردىڭ ەرەكشە قابىلەتتەرىن كوپشىلىككە تانىستىرۋ. ۇمىتكەرلەر 5 كەزەڭ بويىنشا ءوزارا سىنعا ءتۇستى.  ەڭ اۋەلى  سپورتتىق شارادا بەلسەندىلىكتەرىمەن كوزگە تۇسسە، كەيىنگى بولىمدەردە قولونەر بۇيىمدارىن جاساۋ، سۋرەت سالۋ،  بي بيلەپ، ءان شىرقاۋ سىندى شىعارماشىلىق قىرلارىن تانىتتى.

«بۇگىنگى شارانىڭ باستى ماقساتى – مۇمكىندىگى شەكتەۋلى جاستاردىڭ ومىرگە دەگەن قۇشتارلىعىن ارتتىرىپ، ونەرگە بەيىمدەۋ، ەرەكشە قابىلەتتىلەرىن كوپشىلىككە تانىستىرىپ، ساحناعا شىعارۋ»، - دەيدى بايقاۋدى ۇيىمداستىرعان وبلىستىق «جاس وتان» جاستار قاناتىنىڭ بەلسەندىلەرى.

وبلىستىق جاستار رەسۋرستىق ورتالىعىنىڭ ديرەكتورى ب.جاقسىگەلدينوۆ: “ءبىز جاستار بولىپ، جالپى حالىق بولىپ،  مۇمكىندىگى شەكتەۋلى ازاماتتاردى سىرتقا شەكتەتپەي، كەرىسىنشە قوعامدا بەلسەندى بولۋلارىنا ىقپال ەتۋىمىز كەرەك. وسىنداي شىعارماشىلىق بايقاۋلار ارقىلى ومىرگە دەگەن قۇشتارلىقتارى ارتادى دەپ ويلايمىز ”- دەپ اتاپ ءوتتى.

ۇيىمداستىرۋشىلاردىڭ ايتۋىنشا  بيىلعى جىلى قاتىسۋشىلار  قاتارى الدەقايدا  كوبەيگەن. جامبىل اۋدانىنىڭ  ورەنى مەيىرجان ماتيش تە اتالمىش بايقاۋعا قاتىسۋدى ارمانداعان ەكەن. الايدا،   جاس تالانت يەسى سايىستان بەس كۇن بۇرىن دۇنيەدەن ءوتىپ، قايعىلى جاعداي ورىن العان. دەگەنمەن، قىلقالام شەبەرىنىڭ تۋىندىلارى كورمەگە قويىلىپ، كوپشىلىكتىڭ جوعارى باعاسىنا يە بولدى.