تالدىقورعاندا الماتى وبلىستىق ءدىن ىستەرى باسقارماسىنىڭ ۇيىمداستىرۋىمەن «عيبراتتى قازىنا» اتتى رۋحاني كەش ءوتتى. تانىمال ءدىنتانۋشى ماماندار مەن ورەلى ونەر يەلەرىنىڭ باسىن قوسقان يگى شارا بىر-بىرىنەن بولە قاراۋعا بولمايتىن ءدىن مەن ءداستۇر ساباقتاستىعىن جان-جاقتى دارىپتەۋ ارقىلى  حالىقتىڭ ءدىني ساۋاتىن ارتتىرۋعا باعىتتالعان.

ەكى ايدا ءبىر كورسەتىلەتىن باعدارلاما جەرگىلىكتى «جەتىسۋ» تەلەارناسىنان بەرىلەدى. ءدىني باعدارلاماعا تەولوگ ماماندارى جانە قىزۋعىشىلىق تانىتقان ادامدار قاتىسا الادى. وندا بارلىق الماتى وبلىسىنىڭ تۇرعىندارى كوكەيىندە جۇرگەن سۇراقتارىنا جاۋاپ الا الادى.

باسقوسۋدا الدىمەن بەلگىلى ءدىنتانۋشى ايبەك ءنابي يسلام ءدىنىنىڭ كىرشىكسىزدىگى،  قازاق حالقىنىڭ تاريحي ۇستانىمى جايىندا جان-جاقتى  ءتۇسىندىرىپ بەردى. وسىدان سوڭ بەلگىلى اقىن، ءتىنتانۋشى كامنۇر ءتالىم:  «ۇلتىمىزدىڭ عاسىرلار بويى  سانا-سەزىمدەرىنە ءسىڭىپ، ءسالت-داستۇرى بولىپ قالىپتاسقان ءدىني ۇستانىمدارىنىڭ ورنى ەرەكشە. سەبەبى، بۇل قازاقتىڭ ۇلى عۇلاما، اقىن-جازۋشىلارىنىڭ دانالىق سوزدەرى، جىر-داستاندارى ارقىلى، جۇرت جۇرەگىنەن تەرەڭ ورىن العان. وعان كەشەگى قيىن قىستاۋ زامانداردا قارسى قويىلعان  نەبىر قيتۇرقى ارەكەتتەر دە ەش بوگەت بولا الماعان. قايتا، ۇرپاقتان ۇرپاققا تاراپ، ءتول مادەنيەتىمىزبەن ادەپ-عۇرپىمىزدىڭ التىن ارقاۋىنا اينالدى. بۇگىنگى جاستار اتا-بابالارىمىز ۇستانعان سول باعىتتان تايماسا ەش اداسپايدى» – دەدى.

سونىمەن قاتار، وبلىس تۇرعىندارىنىڭ ءدىني ساۋاتىن ارتتىرۋمەن قاتار، ءداستۇرلى ەمەس ءدىني باعىتتارعا قارسى يممۋنيتەت قالىپتاستىرۋ ماقساتىندا ءتۇرلى فورماتتا ءىس-شارالار وتكىزىلەدى.

وتكەن جىلى وبلىس بويىنشا ءدىن ماسەلەسىن تۇسىندىرۋدە جالپى 3274 ءىس-شارا وتكىزىلىپ، وعان 247 907 ادام قاتىستى. ول الدىنعى جىلعى سالىستىرمالى شارالار سانىمەن 77-گە ارتىپ وتىر.

شارا بارىسىندا ونەرپازدار ءدىن مەن ءداستۇر ساباقتاستىعىن ۇلتىمىزدىڭ وت اۋىزدى، وراق ءتىلدى شەشەندەرىنىڭ تەرمە-تولعاۋلارىمەن جەتكىزسە، كەش جۇرگىزۋشىسى جۇماحمەت جايلاۋبايەۆ دانالار ءسوزى مەن تۇيىندەدى. كەشتى قورىتىندىلاعان وبلىستىق ءدىن ىستەرى باسقارماسىنىڭ باسشىسى راحمەت ەسداۋلەتوۆ  بۇل شارا جاستاردىڭ ءدىن تۋرالى تۇسىنىگىن ايقىنداپ،  ءدىني ەكسترەميزم مەن تەرروريزمنىڭ الدىن الۋعا تيگىزەر پايداسى زور دەپ اتاپ كورسەتتى.

«ءدىن ماسەلەلەرى جونىندەگى ءاقپاراتتىق-تۇسىندىرۋ توپتارى ەلىمىزدەگى ۇيلەسىمدى كونفەسسياارالىق قارىم-قاتىناستى قالىپتاستىرۋعا، نىعايتۋعا، حالىقتىڭ ءدىني ساۋاتىن ارتتىرۋعا، ءدىني ەكسترەميزم مەن تەرروريزمنىڭ الدىن

الۋعا باعىتتالعان اقپاراتتىق-ناسيحات ءتۇسىندىرۋ جۇمىستارىن ىسكە اسىرۋ ءۇشىن قۇرىلعان. وسىمەن بىرگە، وبلىستا ءارتۇرلى ۇلت وكىلدەرىنىڭ كوپتىگىنە بايلانىستى ميسسيونەرلىك قىزمەتپەن كەلگەن ءدىن وكىلدەرى مەن قۇرىلعان ءدىني بىرلەستىكتەر جۇمىس اتقارۋدا»، - دەدى ر.ەسداۋلەتوۆ.

ايتا كەتۋ كەرەك، وبلىستىق ءدىن ىستەرى باسقارماسىنىڭ تاعى ءبىر تىڭ جاڭالىعى «رۋحاني كەرۋەن» اتتى كىتاپتىڭ شىعۋى بولدى.