نيەۆادا شتاتىنىڭ اتلەتتەر كوميسسياسى (NSAC) مەكسيكالىق بوكسشى ساۋل "كانەلو" الۆارەستىڭ دوپينگ ءىسى بويىنشا العاشقى شەشىمىن شىعاردى، - دەپ حابارلايدى Qamshy.kz اقپارات اگەنتتىگى. بۇل تۋرالى Vesti.kz جازدى.

ناۋرىز ايىنىڭ باسىندا الۆارەستىڭ 17 جانە 20 اقپاندا تاپسىرعان دوپينگ-سىناماسىنان كلەنبۋتەرول دەگەن تىيىم سالىنعان زاتتىڭ تابىلعانى حابارلانعان. بوكسشىنىڭ كومانداسى مۇنى جەلىنگەن ەتتىڭ قۇرامىندا بولدى دەپ تۇسىندىرگەن. كەلەسى ءۇش دوپينگ-سىناقتى مەكسيكالىق اقش-تا تاپسىرىپ، وندا تىيىم سالىنعان زات تابىلماعان.

Los Angeles Times ءجۋرناليسى لەنس پاگمايەرءدىڭ حابارىنا قاراعاندا، الۆارەس 10 ساۋىرگە دەيىن ۋاقىتشا شەتتەتىلگەن، وسى كەزدە ونىڭ ماسەلەسى بويىنشا كوميسسيا كەزدەسۋى وتەدى. NSAC باسشىسى بوب بەننەنت بۇل مالىمەتتى BoxingScene باسىلىمىنا راستاپ وتىر، مەكسيكالىق نە تەلەفون ارقىلى جاۋاپ بەرەدى، نە وتىرىسقا ءوزى كەلىپ قاتىسادى.

10 ساۋىردە NSAC الۆارەستىڭ ۋاقىتشا شەتتەتىلۋىنە قاتىستى قورىتىندى شەشىم شىعارادى. ال وسى اپتادا ۇيىم ونىڭ پروموۋتەرى ەريك گومەسپەن جانە گولوۆكيننىڭ پروموۋتەرى توم لەففلەرمەن كەزدەستى.

مۇنىڭ الدىندا گولوۆكين وسى ماسەلە بويىنشا ماڭىزدى مالىمدەمە جاساعان ەدى. ونىڭ ايتۋىنشا، ءبىرىنشى جەكپە-جەكتىڭ الدىندا الۆارەستىڭ بۇلشىقەتتەرىندە ينەنىڭ ىزدەرى بولعان. سونىمەن قاتار، ول الۆارەس پەن وسكار دە لا حوييانى وتىرىكشىلەر دەپ اتادى. سونداي-اق، ءبىرىنشى جەكپە-جەكتە تەڭ ءتۇستى دەپ شەشىم شىعارعانداردى تۇرمەگە قاماۋ كەرەگىن ايتقان.

وسىدان كەيىن الۆارەس جاتتىعۋ كەزىندە تۇسىرىلگەن ۆيدەونى Instagram ارقىلى جاريالادى، ول ۆيدەونىڭ استىنا بالاعات سوزدەر جازعان. ەكى حابارلاما دا Golden Boy پروموۋتەرلىك كومپانياسىنىڭ پاراقشاسىندا قايتالاندى، ول كومپانيانىڭ پرەزيدەنتى ەريك گومەس بۇعان دەيىن گولوۆكينگە سەس كورسەتكەن بولاتىن.

ەسكە سالا كەتەيىك، 5 مامىرعا بەلگىلەنگەن گولوۆكين - الۆارەس اراسىنداعى ريەۆانش ماچ لاس-ۆەگاستا T-Mobile ارەناسىندا وتەدى.

گولوۆكين مەن الۆارەستىڭ العاشقى جەكپە-جەگى 2017 جىلدىڭ 16 قىركۇيەگىندە لاس-ۆەگاستا وتكەن بولاتىن. 12 راۋندقا سوزىلعان جەكپە-جەك تەڭ ەسەپپەن اياقتالعان ەدى.