الماتى وبلىسىنىڭ ىشكى ساياسات باسقارماسى مەن وڭىرلىك كوممۋنيكاسيالار قىزمەتى بىرلەسىپ، ەلباسى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسى اياسىندا فوتوسۋرەتشىلەر اراسىندا «Street photo» اتتى شەبەرلىك ساباعىن ۇيىمداستىردى. «Photo day Taldykorgan» جوباسى وسىمەن ەكىنشى مارتە ۇيىمداستىرىلىپ وتىر. شەبەرلىك ساعاتىن الماتى قالاسىنان كەلگەن بەلگىلى فوتوسۋرەتشى مانات سەرىكباي ۇلى وتكىزدى.
شەبەرلىك ساعاتتىڭ ماقساتى: ءار سۋرەتتىڭ تاريح بەتتەرىندە قالۋ جولىندا قىزمەت ەتىپ جۇرگەن فوتوسۋرەتشىلەرمەن تاجىريبە الماسىپ، ءوز بىلگەنىمەن ءبولىسۋ.
فوتوسۋرەتشى ءوزىنىڭ جۇمىستارىمەن ۇلكەن ەكران ارقىلى «كوشە سۋرەتتەرى جانرى»، ستريت جانە لوكاسيا سلايدتارىن كورسەتۋ ارقىلى تانىستىردى. قىلاڭ ەتكەندى قاعىپ الىپ، كورەرمەن جانە وقىرمانعا جەتكىزەتىن قىراعى كوز كاسىبي فوتوسۋرەتشىنىڭ بۇل سالادا جۇرگەنىنە 7 جىلدان استام ۋاقىت بولعان. بۇگىندە «IDEAHUB» شىعارماشىلىق بىرلەستىگىنىڭ مۇشەسى، «كوكتەم New Generation» كورمەسىنىڭ قاتىسۋشىسى بولىپ وتىر.
جالپى شەبەرلىك ساباعى ەكى كەزەڭنەن تۇردى. ءبىرىنشى تەوريالىق ساباقتا كامەرانى قالاي قولدانىپ، جۇمىس ىستەۋ جولدارى، شىعارماشىلىق ويلاردى قايدان الۋعا، قايدان ىزدەۋگە بولاتىندىعى تۋرالى جانە «كوشە سۋرەتتەرى» جانرى جايلى ايتىلدى. ەكىنشى كەزەڭدە تالدىقورعان قالاسىنداعى «سيتي پليۋس» ويىن-ساۋىق ورتالىعى مەن ەسكى عيماراتتاردىڭ بىرىندە پراكتيكالىق ساباق جۇرگىزىلدى.
فوتوسۋرەتشى بۇگىندە ۇيالى تەلەفونمەن ءتۇسىرۋ فورماتىنا كوشكەن. سەبەبى، ول وزىڭمەن الىپ جۇرۋگە ىڭعايلى، ءارى ۋاقىت جاعىنان دا ۇتىمدىراق ەكەن. پراكتيكالىق ساعاتىنىڭ جاڭالىعى دا، ۇيرەتەرى دە وسى ۇيالى بايلانىستىڭ كومەگىمەن جۇزەگە استى.
«كوشەنى سۋرەتكە ءتۇسىرۋدىڭ تاعى ءبىر ماڭىزدى اسپەكتىسى – سۋرەتتىڭ الدىن-الا كەلىسۋسىز تۇسىرىلەتىندىگىندە. سوندىقتان، قوعامدىق ءىس-شارالاردا تۇسىرىلگەن فوتوسۋرەتتەر كەزدەيسوقتىقپەن ەرەكشەلەنىپ تۇرادى»،- دەدى مانات سەرىكباي ۇلى.
شەبەرلىك ساباعىنا تالدىقورعان قالاسىنىڭ فوتوسۋرەتشىلەرى مەن سۋرەتكە ءتۇسىرۋدى جاڭادان باستاپ كەلە جاتقان جاس بۋىن وكىلدەرى قاتىستى. شارا سوڭىندا شەبەرلىك ساباعىنا كەلگەن قاتىسۋشىلارعا ارنايى سەرتيفيكاتتار تابىستالىپ، فوتوسۋرەتشىمەن ەستەلىك سۋرەتكە ءتۇستى.
