بۇل تۋرالى وڭىرلىك كوممۋنيكاسيالار ورتالىعىندا وتكەن باسپا ءسوز ءماسليحاتىندا بەلگىلى بولدى.
وبلىستىق كاسىپكەرلەر پالاتاسىنىڭ ادامي كاپيتالدى دامىتۋ ءبولىمىنىڭ باسشىسى الماگۇل وڭعاربايەۆانىڭ ايتۋىنشا، وڭىردەگى ىسكەر ايەلدەردىڭ بەلسەندىلىگى بيزنەستە عانا ەمەس، قوعامدىق-ساياسي ومىردە دە ارتىپ كەلەدى.
«الماتى وبلىسىندا 1 ملن-نان استام ايەلدەر تۇرادى. رەسمي مالىمەتتەر بويىنشا، بۇگىنگى تاڭدا تىركەلگەن 110 مىڭنان استام كاسىپكەرلىك سۋبەكتىلەرىنىڭ 42%-ىن ايەل ازاماتتار باسقارادى. ياعني، 50 مىڭنان استام بيزنەس-جوبا ىسكە اسىرىلىپ كەلەدى. نازىك جاندىلار ونەركاسىپ، اۋىل شارۋشالىعى، بانك سەكتورىندا، قىزمەت كورسەتۋ سالاسىندا دا تابىستى قىزمەت اتقارىپ كەلەدى»، – دەيدى الماگۇل وڭعاربايەۆا.
سپيكەر ايماقتاعى ايەلدەردىڭ ىسكەرلىك ورتاداعى بەلسەندىلىگىن ارتتىرۋ، ەكونوميكالىق باستامالارىن قولداۋ ماقساتىندا كاسىپكەرلەر پالاتاسىنىڭ جانىنان ىسكەر ايەلدەر كەڭەسىنىڭ قۇرىلعانىن اتاپ ءوتتى. كەڭەستىڭ بارلىق اۋدان مەن قالالاردا فيليالدارى بار. بۇگىنگى تاڭدا ۇيىم 200-دەن استام كاسىپكەر، مەملەكەتتىك، قوعامدىق، قارجىلىق ۇيىمداردىڭ ايەل باسشىلارىن بىرىكتىرىپ وتىر. وتكەن جىلى جۇمىس ىستەپ وتىرعان، جۇمىسسىز، ءوزىن-وزى قامتىعان ايەل كاسىپكەرلەرگە وقىتۋ سەمينارلارى جۇرگىزىلگەن.
2017 جىلى 2،3 مىڭنان استام ايەلگە سەرۆيستىك قىزمەت، 5،6 مىڭ ايەلگە اقپاراتتىق قىزمەت كورسەتىلدى. ىسكەر ايەلدەر تاراپىنان جالپى سوماسى 2،4 ملرد.تەڭگەدەن استام 123 ستارتاپ جوبا جۇزەگە اسىرىلدى.
«بيىل كاسىپكەرلەرگە قىزمەت كورسەتۋ ورتالىقتارىندا 700 ايەلگە تەگىن سەرۆيستىك قىزمەت، ال 1،4 مىڭنان استام ايەلگە كەڭەس بەرۋ جۇمىستارى جۇرگىزىلىپ كەلەدى. جىل باسىنان بەرى 56 ايەل ازاماتى «بيزنەس كەڭەسشى» جوباسى بويىنشا كاسىپكەرلىك نەگىزىنە وقىپ شىقتى»، – دەپ اتاپ ءوتتى الماگۇل وڭعاربايەۆا.
ىسكەر ايەلدەر كەڭەسىنىڭ كەربۇلاق اۋداندىق فيليالىنىڭ جەتەكشىسى، «امرەيەۆا» جك باسشىسى كۇلسارا امىرەيەۆا وتكەن جىلدىڭ قىركۇيەگىندە «اتامەكەن» ۇكپ باستاۋ العان «اتامەكەنىم» رەسپۋبليكالىق اكسياسى اياسىندا الەۋمەتتىك جوبالار ىسكە اسىرىپ كەلەتىنىن ايتتى.
«وبلىسىمىزدىڭ التى قالاسى مەن اۋىلىندا «ءبارى دە راحمەت ءۇشىن!»اتتى الەۋمەتتىك دۇكەندەرى جۇمىس ىستەۋدە. وندا مۇقتاج ازاماتتارعا كيىمدەر مەن زاتتار تەگىن بەرىلەدى. جوبانىڭ ارقاسىندا ادامدار قوعامنىڭ باسقا ءبىر وكىلىنە مەيىرىمدىلىك تانىتۋدا. سونىمەن بىرگە، كەربۇلاق اۋدانىندا «شىن جۇرەكتەن» اتتى اۆتوكەرۋەن ۇيىمداستىرىپ، بىنەشە اپتا بويى اكىمدىك، مەملەكەتتىك ورگان مەن قوعامدىق ۇيىمدارمەن بىرلەسە 15 اۋىلدىق وكرۋگتى ارالاپ شىقتىق. اۋىلدا تۇرىپ جاتقان 400-دەن استام از قامتىلعان، مۇگەدەك جانە قارت ازاماتتارعا قايىرىمدىلىق كورسەتىلدى»، – دەدى كۇلسارا امىرەيەۆا.
