"اتامەكەن" ۇلتتىق كاسپكەرلىك پالاتاسى تالعار اۋداندىق فيليالىنىڭ ۇيىمداستىرۋىمەن "تالعار اسار" قايىرىمدىلىق شاراسى تالعار قالاسىندا ورنالاسقان "اروماتنىي مير" سۋپەرماركەتتەرىندە يگى ىستەر جاسالۋدا. بۇل اكسياعا ءار ءبىر جان ءوز ۇلەسىن قوسسا بولادى، ياعني، ازىق تۇلىكتى ساتىپ الىپ، كومەك كورسەتۋ سورەلەرىنە قويادى. ول سورەلەردەن از قامتىلعان جاندار، كوپ بالالى وتباسىلار، قارت ادامدار كومەك الۋلارىنا بولادى. وسىنداي قايىرىمدىلىق شارالارىنا بەلسەنە ات سالىسۋعا سۇرانىس تاستادى.
اتالمىش جوبانى تالعارلىقتار قايىرىمدىلىق مادەنيەتىن دامىتۋ مەن الەۋمەتتىك جاۋاپكەرشىلىكتى جوعارىلاتۋعا باعىتتالعان «اتامەكەنىم» رەسپۋبليكالىق اكسياسى اياسىندا ىسكە اسىرىپ وتىر.
«تالعار اسار» جوباسىنىڭ باستاماشىلارىنىڭ ءبىرى تانىمال كاسىپكەر، «اروماتنىي مير» سۋپەرماركەت جەلىلەرىنىڭ ديرەكتورى سەرگەي مايبورودا. ول بيزنەس وكىلدەرىن الەۋمەتتىك باستالامالاردى ىسكە اسىرۋعا بەلسەندى قاتىسۋى كەرەكتىگىن ايتادى.
«ءبىزدىڭ قالامىز بەن اۋدانىمىزدا الەۋمەتتىك كومەككە ءزارۋ ازاماتتار وتە كوپ. دۇكەندە جينالعان بارلىق ازىق-تۇلىك پەن تاۋارلاردى از قامتىلعان وتباسىلارعا، مۇگەدەك جاندارعا، باسقا دا مۇقتاج ادامدارعا تىكەلەي جەتكىزۋدى قاراستىرىپ وتىرمىز. الەۋمەتتىك كومەك كورسەتىلەدى. باستامامىزدى تالعاردىڭ وزگە دە قايىرىمدى كاسىپكەرلەرى قولدايدى دەپ سەنەمىز»، – دەپ اتاپ ءوتتى كاسىپكەر.
«دانا» جەكەمەنشىك مەكتەبى مەن «ەركەم-اي» بالاباقشا جەلىسىنىڭ ديرەكتورى، قازاقستان مەكتەپكە دەيىنگى ءبىلىم بەرۋ ۇيىمدارى قاۋىمداستىعىنىڭ الماتى قالاسى جانە الماتى ايماعى بويىنشا فيليالىنىڭ جەتەكشىسى كۇلاندا باتىربەكوۆانىڭ سوزىنشە، يگى ىستەر جاقسى ادەتكە اينالىپ قانا قويماي، قوعامنىڭ ترەندىنە اينالۋى ءتيىس.
«حالقىمىزدا «اسار» ءسوزى ماڭىزدى ۇعىمدى بىلدىرەدى. جوبامىزدى «تالعار اسار» دەپ اتاۋ ارقىلى بىر-بىرىمىزگە قول ۇشىن سوزۋدى ۇمىتپاۋدى ەسكە سالعىمىز كەلدى. سورەلەرگە «جاقسىلىق جاساۋعا اسىعايىق!» دەپ جازىپ قويدىق. ويتكەنى قايىرىمدىلىق پەن مەيىرىمدىلىك ىستەرىنىڭ ۇلكەن-كىشىسى جوق»، – دەيدى كۇلاندا باتىربەكوۆا.
«تالعار اسار» جوباسى اياسىنداعى سورەلەردى قالاداعى جانە تالعار اۋدانىنداعى ساۋدا نۇكتەلەرىندە دە اشۋ جوسپارلانىپ وتىر.
«اي سايىن كاسىپكەرلەر سورەلەردى قاجەتتى ازىق-تۇلىكتەر مەن تاۋارلارعا تولتىرىپ وتىرادى. ءقازىر وسىنداي سورەلەردى باسقا دا ساۋدا ورىندارىندا اشۋ جوسپارلانىپ وتىر. جالپى تالعارلىق كاسىپكەرلەر اۋدانىمىزدىڭ قوعامدىق، الەۋمەتتىك ومىرىنە بەلسەنە ات سالىسىپ كەلەدى. قايىرىمدىلىق بيزنەس وكىلدەرى قىزمەتىنىڭ اجىراماس بولىگىنە اينالعان. مىسالى، تۇياق ەسقوجينا باسقاراتىن «نۇر» بالالار ءۇيى كاسىپكەرلەردىڭ قامقورلىعىنا الىنعان. مۇمكىندىگى شەكتەۋلى بالالار مەن مۇگەدەكتەر ۇيىمدارى دا كاسىپكەرلەردىڭ اسا ماڭىزدى نازارىندا»، – دەيدى كاسىپكەرلەر پالاتاسىنىڭ تالعار اۋداندىق فيليالىنىڭ باسشىسى ەرجان تۇرالىقوۆ.
ايتا كەتەيىك، «قايىرىمدىلىق سورەلەرى» وسىعان دەيىن تەكەلى قالاسىندا اشىلعان بولاتىن. ىسكەر ايەلدەر كەڭەسىنىڭ باستاماسىمەن الماتى وبلىسىنىڭ بىرنەشە قالالارى مەن اۋىلدارىندا «ءبارى دە راقمەت ءۇشىن!» الەۋمەتتىك دۇكەندەرى جۇمىس ىستەيدى.
