تالدىقورعان مەديسينالىق كوللەدجىندە قوعامدىق دەنساۋلىق ساقتاۋ سالاسىنىڭ ماماندارىن دايىنداۋداعى وزەكتى ماسەلەلەر مەن كەلەشەكتە دامۋى تالقىعا ءتۇستى. شاراعا مەديسينالىق جوو-نىڭ جەتەكشى عالىمدارى مەن وقىتۋشىلارى، دارىگەرلەر، قوعامدىق دەنساۋلىق ساقتاۋ دەپارتامەنتى مەن وڭىرلىك كاسىپكەرلەر پالاتاسىنىڭ ماماندارى قاتىسىپ، ۇسىنىستارىن ءبىلدىردى.
كوللەدج وكىلدەرى «گيگيەنا جانە ەپيدەميولوگيا» ماماندىعى بويىنشا ءبىلىم بەرۋ باعدارلاماسى ەسكىرگەن جانە جۇمىس بەرۋشىلەردىڭ تالاپتارىنا سايكەس كەلمەيدى دەپ ەسەپتەيدى ەكەن.
«دەنساۋلىق ساقتاۋ جۇيەسىندە پروفيلاكتيكالىق مەديسينانىڭ ۇستانىمىن تاجىريبەدە ىسكە اسىراتىن قوعامدىق دەنساۋلىقتى قورعاۋ سالاسىنىڭ ورنى ەرەكشە. «گيگيەنا جانە ەپيدەميولوگيا» ماماندىعى بويىنشا بەكىتىلگەن مەملەكەتتىك جالپىعا مىندەتتى ءبىلىم بەرۋ ستاندارتى زامان تالابى مەن ونىڭ شارتتارىنا جاۋاپ بەرمەيدى. پراكتيكادا جۇمىس بەرۋشىلەر تۇلەكتەردەن مۇلدەم باسقا مىندەتتەر تالاپ ەتەتىن كورىنەدى»، – دەدى تالدىقورعان مەديسينالىق كوللەدجىنىڭ ديرەكتورى سەرىك جانسەڭگىروۆ.
س.اسفەندياروۆ اتىنداعى قازۇمۋ پروفەسسورى ساكەن امىرەيەۆ مامان دايىنداۋ ماسەلەسىن رەسپۋبليكالىق دەڭگەيگە كوتەرىپ، ءبىلىم بەرۋ ستاندارتتارىنا قاجەتتى وزگەرتۋلەر ەنگىزۋ كەرەكتىگىن ايتتى.
«بارلىق سالالار مەن باعىتتار بويىنشا دامۋ مەن جاڭعىرتۋ ءجۇرىپ جاتىر. ءبىز ءبىر ورىندا قالىپ قالعان سياقتىمىز. ماماندىق بويىنشا ستۋدەنتتەر تەستىلەۋدى وتە المايدى. سەبەبى، باعدارلامادا كوپتەگەن تاقىرىپتار قامتىلماعان. مىسالى، شەت ەلدەردە وسى ماماندىق بار بولعانىمەن باسقاشا اتالادى. كوتەرىلىپ وتىرعان سۇراقتى كەڭ كولەمدە تالقىلاپ، جوعارى وقۋ ورنىمەن بىرىگىپ ورتاق مامىلەگە كەلۋ كەرەك»، – دەپ اتاپ ءوتتى ساكەن امىرەيەۆ.
وسىعان بايلانىستى «گيگيەنا جانە ەپيدەميولوگيا» ماماندىعى بويىنشا تۇلەكتەر اراسىندا جۇمىسقا ورنالاسۋ دەڭگەيى تومەن. سونىمەن بىرگە ساراپشىلار قورىتىندى اتتەستاسيالاۋدى ەكى كەزەڭ بويىنشا وتكىزۋ، ەلەكتيۆتى پاندەر ەنگىزۋ سىندى ۇسىنىستار ايتىلدى.
“ءدۋالدى وقىتۋدى ەنگىزۋ، ماسەلەنى شەشۋدىڭ ءبىر جولى بولىپ تابىلادى. ءدۋالدى جۇيە وقىتۋ ۇردىسىندە تەوريالىق جانە پراكتيكالىق دايىندىقتى بىرىكتىرە الادى. وقۋ باعدارلاماسى جۇمىس بەرۋشىنىڭ تاپسىرىسىمەن جانە تىكەلەي قاتىسۋىمەن ازىرلەنىپ، ءبىر ماماندىق بويىنشا وقۋ ماتەريالدارىنىڭ كولەمىن ءپان بويىنشا بولۋگە مۇمكىندىك بەرەدى. وسىلايشا، ءدۋالدى وقىتۋ جۇيەسىن دامىتۋدىڭ جول كارتاسى اياسىندا وقۋ باعدارلاماسىنا وزگەرتۋ ەنگىزۋگە بولادى”، – دەدى الماتى وبلىسى كاسىپكەرلەر پالاتاسىنىڭ ساراپشىسى ارداق قاشقاروۆا.
تالقىلاۋ قورىتىندىسى بويىنشا مەديسينالىق كوللەدج الداعى ۋاقىتتا الماتى وبلىسىنىڭ ءدۋالدى وقىتۋدى دامىتۋدىڭ جول كارتاسىنا ەنۋ مەن مەملەكەتتىك جالپىعا مىندەتتى ءبىلىم بەرۋ ستاندارتىنا ءبىرقاتار وزگەرتۋلەر ەنگىزۋدى جوسپارلاپ وتىر.
ەسكە سالساق، تالدىقورعان مەديسينالىق كوللەدجىنىڭ 80 جىلدىق تاريحى بار. بۇگىنگى تاڭدا وقۋ ورنى سەگىز ماماندىق بويىنشا كادر دايىندايدى.
