الاكول اۋدانىندا ەلباسى جولداۋىنىڭ V-باعىتى تۇرعىن ۇي-كوممۋنالدىق ينفراقۇرىلىمىن جەتىلدىرۋ باعىتىندا اۋقىمدى جۇمىستار اتقارىلۋدا.

قۇرىلىس سالاسى بويىنشا 7561 شارشى مەتر تۇرعىن ءۇي كىرىسكە الىنىپ، قۇرىلىس جۇمىستارىنىڭ كولەمى 9215 ميلليون تەڭگەنى قۇرادى. 2016 جىلمەن سالىستىرعاندا جۇمىس كولەمى 129%-عا ارتتى. بۇل تۋرالى وڭىرلىك كوممۋنيكاسيالار قىزمەتى الاڭىندا الاكول اۋدانىنىڭ اكىمى الىبەك جاقانبايەۆ باياندادى.

وتكەن جىلى «نۇرلى جەر» باعدارلاماسى اياسىندا 140،6 ميلليون تەڭگەگە ءۇشارال قالاسىندا كوپ قاباتتى 20 پاتەرلى تۇرعىن ۇيلەر قولدانىسقا بەرىلدى. 6 ەلدى مەكەندەردە 128 ميلليون تەڭگەگە ۋچاسكەلىك پوليسيا پۋنكتى، 2 ەلدى مەكەندە 34،7 ميلليون تەڭگەگە ۆەتەرينارلىق پۋنكتىنىڭ قۇرىلىسى سالىندى.

«اۋداندا كوپ قاباتتى تۇرعىن ۇيلەر سالۋعا بولىنگەن 22 گەكتار جەرگە جانە جەكە مەنشىك تۇرعىن ۇيلەر سالۋعا بولىنگەن 150 گەكتارعا ينجەنەرلىك-كوممۋنيكاسيالىق جۇيەسىن جۇرگىزۋگە جوبالاۋ سمەتالىق قۇجاتتارىن دايارلاۋعا 20،6 ميلليون تەڭگە ءبولىنىپ وتىر»، – دەيدى الىبەك اسكەربەك ۇلى.

سونىمەن قاتار، اعىمداعى جىلى «نۇرلى جەر» باعدارلاماسى اياسىندا ءۇشارالقالاسىندا 447 ميلليون تەڭگەگە 60 پاتەرلى جالدامالى تۇرعىن ءۇي جانە 274 ميلليون تەڭگەگە 13 ەلدى مەكەندە ۋچاسكەلىك پوليسيا پۋنكتى مەن جاپسارلاس تۇرعىن ءۇيى سالىنىپ، پايدالانۋعا بەرىلەدى.

ءۇشارال قالاسىنا 20 پاتەرلى جالدامالى 2 تۇرعىن ءۇي قۇرىلىسىن سالۋ جوسپارلانۋدا. دوستىق اۋىلىنا 20 پاتەرلى جالگەرلىك تۇرعىن ءۇيى مەن سپورت ساۋىقتىرۋ كەشەنى، ال قابانباي اۋىلىندا 10 تۇرعىن ءۇيدىڭ قۇرىلىسىن سالۋ ماسەلەسى قاراستىرىلىپ جاتىر.