حالىق قاھارمانى، اسكەري-اۋە كۇشتەرىنىڭ گەنەرال-مايورى، تالدىقورعاننىڭ تۋماسى ايدىن ايىمبەتوۆكە «الماتى وبلىسىنىڭ قۇرمەتتى ازاماتى» اتاعى بەرىلدى. عارىشكەرگە ارنايى كاۋلىكتى ناۋرىز مەرەكەسىن تويلاۋعا جينالعان كوپشىلىك الدىندا الماتى وبلىسىنىڭ اكىمى اماندىق باتالوۆ تابىس ەتتى.
تاۋەلسىزدىك كۇنىنە ارنالعان سالتاناتتى جيىن بارىسىندا وڭىردەگى ونەركاسىپ، اگرارلىق سالا، دەنساۋلىق ساقتاۋ، ءبىلىم بەرۋ، كاسىپكەرلىك، سپورت جانە الەۋمەتتىك قىزمەت كورسەتۋ سالالارىنىڭ ۇزدىك ماماندارىنا ۇزاق جىلعى ەڭبەگى مەن جەمىستى قىزمەتى ءۇشىن «پاراسات»، «قۇرمەت»، III دارەجەلى «ەڭبەك داڭقى» وردەندەرى، «ەرەن ەڭبەگى ءۇشىن»، «شاپاعات» مەدالدارى، قازاقستان رەسپۋبليكاسىنىڭ قۇرمەت گراموتاسى، «الماتى وبلىسىنىڭ قۇرمەتتى ازاماتى» اتاعى بەرىلدى. ولاردىڭ قاتارىندا بەلگىلى مەسەنات باۋىرجان وسپانوۆ «پاراسات» وردەنىمەن، الماتى وبلىسى اكىمىنىڭ ورىنباسارى جاقسىلىق ومار جانە وبلىستىق دەنە شىنىقتىرۋ جانە سپورت باسقارماسىنىڭ باسشىسى تۇراتبەك چاراپييەۆ «قۇرمەت» وردەنىمەن ماراپاتتالسا، «قازاقستاننىڭ 100 جاڭا ەسىمىنە» ەنگەن ەلدوس بايالىشبايەۆ «شاپاعات» مەدالىن يەلەندى. ال جەتىسۋ جەرىنىڭ تۋماسى، ءۇشىنشى قازاق عارىشكەرى ايدىن ايىمبەتوۆ «الماتى وبلىسىنىڭ قۇرمەتتى ازاماتى» اتاندى.
تالدىقورعاندا يگى ءداستۇر بويىنشا ناۋرىز مەيرامى قالا سىرتىنداعى بۇلاقتىڭ كوزىن اشۋدان باستالدى. وبلىس باسشىسى اقساقالدارمەن، «جاسىل ەل» جاساعىنىڭ مۇشەلەرىمەن بىرگە ساياباق ىشىنە اعاش ەكتى. جەتىسۋ تورىندە بۇگىنگى مەرەكەگە وراي 1 مىڭ ليتر ناۋرىز كوجە مەن 10 مىڭ ادامعا پالاۋ ازىرلەنىپ، حالىققا تەگىن تاراتىلدى. سوعان سايكەس، ناۋرىز اۋىلىندا «ناۋرىز كوجە ءىشىڭىز!»، «باۋىرساقتان ءدام تاتىڭىز!» اتتى ارنايى شارالار ۇيىمداستىرىلدى. مەرەكەنى تاماشالاۋعا شىققان قالا تۇرعىندارى ارقان تارتىسىپ، اسىق اتىپ، گىر تاسىن كوتەرىپ، توعىزقۇمالاق وينادى، ءتۇرلى كورمەلەردى تاماشالادى. ال تالدىقورعان يپپودرومىندا دالا قىزىقتارى ءوتتى. اۋدارىسپاق، قىز قۋۋ، تەڭگە ءىلۋ ۇيىمداستىرىلىپ، كوكپارشىلار سايىسىنا قارجىلاي سىيلىقتار تىگىلدى.
مەرەكە كونسەرتتىك باعدارلاماعا ۇلاسىپ، حالىققا كوتەرىڭكى كوڭىل-كۇي سىيلاۋدا. اۋا-رايى دا تاماشا بولىپ تۇر. تەرمومەتر باعانى + 22 گرادۋسقا دەيىن كوتەرىلدى. ال كەشكە «جاستار» ساياباعىندا بي كەشى ۇيىمداستىرىلادى.
ناگرادا العاندار اتىنان «ءنۇسىپوۆ جانە ك» ج ش س ديرەكتورى قاناتحان ءنۇسىپوۆ پەن «سۇڭقار الماتى» قۇس فابريكاسىنىڭ باس ديرەكتورى دميتريي چالىح ءسوز سويلەپ، ءوز قۇتتىقتاۋلارىن جەتكىزدى. سالتاناتتى جيىن سوڭى كونسەرتتىك باعدارلاماعا ۇلاستى.
