«قازاقتىڭ بولاشاعى – قازاق تىلىندە» دەپ قاداپ ايتقان ەلباسىنىڭ ءسوزى قۇلاقتاردا عانا  قالىپ قويعان جوق، جۇرەكتەرگە دە جازىلىپ قالدى، دەپ جازادى Qamshy.kz اقپارات اگەنتتىگى ق ر ۇلتتىق ۇلانى «باتىس» وڭىرلىك قولباسشىلىعىنىڭ باسپا ءسوز قىزمەتىنە سىلتەمە جاساي وتىرىپ.

 ءتىل - ۇلت بايلىعى. ءار ۇلت ءوز ءتىلىن قادىرلەيدى، سىيلايدى جانە بولاشاققا، كەلەشەك ۇرپاققا امانات رەتىندە جەتكىزىپ وتىرادى. ءتىل - عاسىرلار بويى ءار ۇلتتىڭ ۇرپاقتان-ۇرپاققا بەرىلۋ ارقىلى جيناقتاعان باعاسى جوق مادەني بايلىعى. ءبىزدىڭ وتانىمىزدىڭ ءتىلى – قازاق ءتىلى.

ءقازىر قازاق ءتىلى – قازاق حالقىنىڭ ۇلتتىق ءتىلى. بۇل جايىندا ەلباسىمىز ءوز جولداۋىندا «ۇلتتىق ءتىل – قازاق ۇلتىنىڭ رۋحاني، مادەني بايلىعىن ۇرپاقتان-ۇرپاققا جەتكىزۋشى قاسيەتتى قۇرال» دەپ كورسەتكەن بولاتىن.

قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسىن ىسكە اسىرۋ اياسىندا،  سونداي-اق، انا ءتىلىمىزدىڭ مارتەبەسىن ءوسىرۋ ءۇشىن جانە مەملەكەتتىك ءتىلىمىزدى قاستەرلەۋگە، قۇرمەتتەۋگە تاربيەلەۋ ءۇشىن ۇلتتىق ۇلانى  اسكەرلەرىندە كوپتەگەن ءىس-شارالار وتكىزىلىپ كەلەدى.

وسىنىڭ ايعاعى رەتىندە، ورالداعى  5517 اسكەري بولىمىندە مەملەكەتتىك ءتىلدى جەتىك مەڭگەرگەن، وزگە ۇلت وكىلدەرىنىڭ اسكەري  قىزمەتكەرلەرى اراسىندا «مەملەكەتتىك ءتىل - مەنىڭ ءتىلىم» بايقاۋىنىڭ  ءبىرىنشى  كەزەڭى مارەگە جەتتى.

مەملەكەتتىك ءتىلدىڭ قولدانىس اياسىن كەڭەيتۋ ماقساتىندا ۇيىمداستىرىلعان ءتىل دوداسىندا بارلىعى التى اسكەري قىزمەتشى ب ا ق سىناسىپ، قازاق ءتىلىن قانشالىقتى دەڭگەيدە مەڭگەرگەنىن پاش ەتتى.

بايقاۋدى ءادىل قازىلار القاسىنىڭ ءتورايىمى: قازاقستان رەسپۋبليكاسى ۇلتتىق ۇلانى باس قولباسشىلىعىنىڭ «قالقان» گازەتى مەن «بۇركىت» جۋرنالى رەداكسياسىنىڭ اعا وفيسەرى زاپاستاعى پودپولكوۆنيك رىسپايەۆا بوتاگوز تويشىبەك قىزى اشىپ، ءوز سوزىندە  «ەلىمىزدە مەملەكەتتىك ءتىلدى دامىتۋعا ەلباسى باسا نازار اۋدارىپ كەلەدى. سونىمەن قاتار، مەملەكەتىمىزدە قازاق تىلىمەن قاتار رەسمي ءتىل رەتىندە ورىس تىلىدە پايدالانادى. «قازاقستاننىڭ بولاشاعى-قازاق تىلىندە» دەپ بەكەر ايتىلماسا كەرەك. سەبەبى قازاق ءتىلى ۇلتتاردى بىرلىككە شاقىراتىن ءتىل دەپ، قاتىسۋشىلارعا ساتتىلىك تىلەدى.

 بايقاۋ  سايىسى ءۇش كەزەنەن تۇرادى جانە ءاربىر كەزەڭ الىنعان ۇپايلار جۇيەسى بويىنشا باعالاندى. العاشقى «باستاۋ» اينالىمىندا ءار قاتىسۋشى  ءوزى  جانە  قىزمەت ورنى مەن ۇجىمى جايلى اڭگىمەلەپ،  كورەرمەنگە ءوزىن ەتەنە تانىستىرىپ ءوتتى

ال، ورلەۋ» دەپ اتالعان ەكىنشى اينالىمدا  سايىسكەرلەر قازاق حالقىنىڭ بي، شەشەن، كوسەمدەرى، حاندارى مەن باتىرلارىنىڭ رولدەرىن سومداپ، ساحنالىق قويىلىمدار ۇسىندى.

«بايانداۋ» دەپ اتالعان ءۇشىنشى اينالىمدا بايقاۋعا قاتىسۋشىلار بەرىلگەن تاقىرىپتار بويىنشا سلايدتاردى پايدالانا وتىرىپ، بايانداما جاسادى.

قازىلار القاسى بۇل كەزەڭدە سايىسكەرلەردىڭ رەسمي تۇرعىدا دۇرىس سويلەي ءبىلۋى، سويلەۋ مادەنيەتى، مۋزىكامەن كوركەمدەۋى، ءوز ويىن مانەرلەپ، تولىق جەتكىزە بىلۋىنە باسا كوڭىل بولگەنىن ايتا كەتكەن ءجون.

سايىسكەرلەر اراسىنان شىن مىقتىنى انىقتاۋ   ءۇشىن قالادان شاقىرىلعان ءادىل-قازىلار قۇرامىندا باتىس قازاقستان وبلىستىق تىلدەردى دامىتۋ باسقارماسىنىڭ باس مامانى گانييەۆا سۆەتا قادىرباي قىزى، «باتىس» وڭىرلىك قولباسشىلىعىنىڭ جانىنداعى حالىق مادەني ۋنيۆەرسيتەتىنىڭ رەكتورى مەڭدىعالييەۆ ءشامىل ۇمبەت ۇلى، ورال  قالالىق مادەني – اعارتۋ بىرلەستىگى ديرەكتورىنىڭ شىعارماشىلىق جۇمىستار جونىندەگى ورىنباسارى نۇرعالييەۆا جانار امانعالي قىزى، 5517 اسكەري ءبولىمىنىڭ  ايەلدەر كەڭەسىنىڭ ءتورايىمى، ءبولىمنىڭ شتاب اۋدارماشىسى كىشى سەرجانت حۋساينوۆا جاننا جۇمابەك قىزى بولدى.

ساراپشىلار القاسىنىڭ قورىتىندىسى بويىنشا، ءى ورىندى اۆتوبرونەتانكى مۇلكى ورتالىعى باستىعى  كاپيتان الەكساندر ەرشوۆ جەڭىپ الدى. ءىى ورىندى ماتەريالدىق جانە تەحنيكالىق قامتاماسىز ەتۋ روتاسى  بايلانىس ۆزۆودىنىڭ كومانديرى لەيتەنانت يۆان ەفرەموۆ يەلەندى. ال ءۇشىنشى ورىندى 2 اتقىشتار روتاسىنىڭ باقىلاۋشىلار ۆزۆودىنىڭ باقىلاۋشى مامانى سەرجانت ستانيسلاۆ كوتەنكوعا بۇيىردى.

جەڭىمپازدارعا ماقتاۋ قاعازدارى مەن سىيلىقتار تابىستالىپ، ەرەكشە ونەر كورسەتكەن قاتىسۋشىلارعا العىس حاتتار تابىستالدى. سايىس سوڭى  ورال قالالىق جاستار مادەني ءۇيىنىڭ ونەرپازدارىنىڭ كونسەرتىنە ۇلاستى. 

ال بايقاۋدا جەڭىسكە جەتكەن كاپيتان الەكساندر ەرشوۆ  ەندى  اسكەري ءبولىمنىڭ نامىسىن وزگە ۇلت اسكەري قىزمەتشىلەرى اراسىندا وتەتىن «باتىس» وڭىرلىك قولباسشىلىعىنىڭ 2-كەزەڭى بايقاۋىندا قورعايتىن بولادى.