قازاقستاندا 2018 جىلى «ASAR» ءۇشجاقتى سەرىكتەستىك فورۋمى اياسىندا الەۋمەتتىك جوبالار الاڭىنا قاتىسۋ ءۇشىن ۇكىمەتتىك ەمەس ۇيىمداردان وتىنىشتەر قابىلداۋ ناۋقانى باستالدى. «ازاماتتىق باستامالاردى قولداۋ ورتالىعى» كوممەرسيالىق ەمەس اكسيونەرلىك قوعامىنىڭ باسقارما ءتوراعاسى نۇرلان وتەشيەۆ بايقاۋدىڭ شارتتارى تۋرالى ايتىپ بەردى.

ن. وتەشوۆتىڭ ايتۋىنشا، الەمەتتىك جوبالار كەلەسىدەي تالاپتارعا ساي بولۋى ءتيىس: جوبالار جەرگىلىكتى قوعامداستىقتاردى دامىتۋعا، جەرگىلىكتى ماسەلەلەردى شەشۋدە تۇرعىنداردىڭ قوعامدىق الەۋەتىن قولدانۋعا جانە وسى ايماقتارداعى ءومىر ساپاسىن ارتتىرۋعا  باعىتتالۋى كەرەك؛ ۇسىنىلاتىن جوبالار جەرگىلىكتى قوعامداستىقتاردىڭ جۇمىسىن جاقسارتۋعا شىنايى ۇلەس قوسۋى كەرەك؛ جوبالار ۇەۇ-دىڭ اعىمداعى قىزمەتىنە نەمەسە ءبىر رەتتىك ءىس-شارالاردى وتكىزۋگە باعىتتالماۋى ءتيىس؛ جوبالار بۇعان دەيىن قاندايدا ءبىر قارجىلاندىرۋ كوزدەرى ارقىلى جۇزەگە اسىرىلماۋى ءتيىس.

بايقاۋ 3 كەزەڭنەن تۇرادى.  ءبىرىنشى كەزەڭ – ۇەۇ-دىڭ جوبالارى كورسەتىلگەن وتىنىمدەردى جيناۋ. بايقاۋعا قاتىسۋ ءۇشىن وتىنىشتەر 2018 جىلدىڭ 2 مامىرىنا دەيىن قابىلدانادى.  ەكىنشى كەزەڭ - ۇەۇ-دىڭ جوبالارىن ونلاين-پلاتفورمادا جاريالاۋ جانە كاسىپكەرلەرگە  تاراتۋ. ءۇشىنشى كەزەڭ – ۇەۇ مەن كاسىپكەرلەر اراسىندا مەموراندۋمدارعا قول قويۋ.

بايقاۋعا قاتىساتىن ۇەۇ-دىڭ بارلىق جوبالارى www.asarprojects.kz ونلاين-پلاتفورماسىندا جاريالانادى. ۇزدىك جوبالارىمەن كاسىپكەرلەر تاراپىنان قولداۋ تاپقان ۇكىمەتتىك ەمەس ۇيىمدار 2018 جىلدىڭ ماۋسىم ايىندا تالدىقورعان قالاسىندا وتەتىن  «ASAR» ءۇشجاقتى سەرىكتەستىك فورۋمىنا شاقىرىلاتىن بولادى.

وتكەن جىلى «ASAR» فورۋمى اياسىندا  10-نا اسا جوبا كاسىپكەرلەر تاراپىنان  قولداۋ تاپقان بولاتىن. مىسالى، «اتىراۋ وبلىسىنىڭ ازاماتتىق اليانسى» قوعامدىق بىرلەستىگىنىڭ «ۆەنەرا» ينكليۋزيۆتى شەبەرحاناسىن قۇرۋعا ارنالعان جوباسى كاسىپكەرلەردىڭ  قولداۋىنا يە بولعان. وسىلايشا، اتالعان شەبەرحانا مۇگەدەك بالالاردىڭ ءومىر ءسۇرۋ داعدىلارىن قالىپتاستىرۋ جانە دامىتۋ ماقساتىندا قۇرىلعان بولاتىن.

بايقاۋدىڭ ۇيىمداستىرۋشىلارى - قازاقستان رەسپۋبليكاسىنىڭ ءدىن ىستەرى جانە ازاماتتىق قوعام مينيسترلىگى، «اتامەكەن» ۇلتتىق كاسىپكەرلەر پالاتاسى، ازاماتتىق باستامالاردى قولداۋ ورتالىعى.