بۇل تۋرالى وڭىرلىك كوممۋنيكاسيالار ورتالىعىندا وتكەن باسپا ءسوز ءماسليحاتىندا الماتى وبلىسى كاسىپكەرلەر پالاتاسىنىڭ كاسىپكەرلىككە قارجىلىق ەمەس قولداۋ كورسەتۋ ءبولىمىنىڭ باسشىسى ەرلان داتقايەۆ مالىمدەدى.

ايتۋىنشا، «باستاۋ بيزنەس» جوباسى 2017-2021 جىلدارعا ارنالعان ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا جۇزەگە اسىرىلادى. وتكەن جىلى وقىتۋ پيلوتتىق رەجيمدە وبلىستىڭ جەتى اۋدانىندا وتكىزىلدى. كۋرسقا 1 312 ادام قاتىسىپ، ونىڭ 285 قاتىسۋشىسى ءوز ءىسىن اشىپ، جوبالارى جالپى سوماسى 1 ملرد تەڭگەدەن استام قارجىعا قارجىلاندىرىلدى. بيزنەس-جوبالار سان ءتۇرلى: مال جانە وسىمدىك شارۋاشىلىعىنان باستاپ، ءوندىرىس پەن قىزمەت كورسەتۋ سالاسىنا دەيىن قامتىدى. سونىمەن بىرگە، وڭىرگە شاعىن نەسيەلەندىرۋگە 4،3 ملرد تەڭگە بولىنگەنى بەلگىلى بولدى.

«2018 جىلى «باستاۋ بيزنەس» جوباسى بارلىق اۋدان ورتالىقتارىندا، سونداي-اق، تالدىقورعان، تەكەلى، قاپشاعاي قالالارىندا ۇيىمداستىرىلادى. بيىل 3،3 مىڭ ادامدى وقىتىپ، 600-دەن استام جوبانى قارجىلاندىرۋدى جوسپارلاپ وتىرمىز»، -  دەدى الماتى وبلىسى كاسىپكەرلەر پالاتاسىنىڭ كاسىپكەرلىككە قارجىلىق ەمەس قولداۋ كورسەتۋ ءبولىمىنىڭ باسشىسى ەرلان داتقايەۆ.

سپيكەردىڭ سوزىنشە، «باستاۋ بيزنەسكە» جۇمىسسىزدار مەن ءوزىن-وزى قامتىعان ازاماتتار جانە ءىسىن كەڭەيتۋگە ماقسات قويعان جۇمىس ىستەپ جۇرگەن كاسىپكەرلەر دە قاتىسا الادى.

قاتىسۋعا ءوتىنىم جۇمىسپەن قامتۋ ورتالىعى ارقىلى قابىلدانادى جانە ۇمىتكەرلەر ونلاين تەستىلەۋدەن وتەدى. ونىڭ ناتيجەسى بويىنشا وقۋعا قابىلدانادى. وبلىس بويىنشا تەستىلەۋ 14 ساۋىرگە جوسپارلانعان.

وقىتۋ باعدارلاماسى 12 مودۋلدەن تۇرادى. قاتىسۋشىلارعا سالىق رەجيمدەرى، زاڭناما، ماركەتينگ نەگىزدەرى، بيزنەس سالاسىنداعى سۇرانىستاعى باعىتتار جانە ت.ب. ءبىلىم بەرىلەدى. سونىمەن بىرگە، تاجىريبەلىك ساباقتار، كاسىپكەرلىك وبەكتىلەرىن ارالاۋ، تابىستى بيزنەس وكىلدەرىمەن كەزدەسۋ ۇيىمداستىرىلادى. ءبىر ايلىق كۋرستا ساباقتى وتاندىق بيزنەس-ترەنەرلەر  بەرەتىن بولادى.

وقۋ اياقتالعان سوڭ، «باستاۋ بيزنەس» قاتىسۋشىلارى 6%-پەن 18 ملن تەڭگەگە دەيىن شاعىن نەسيەگە قول جەتكىزە الادى.

جالپى الماتى وبلىسىندا «باستاۋ بيزنەس» جوباسى بويىنشا وقىتۋ16 ءساۋىر كۇنى باستالادى.