تانىمال Boxrec.com سايتى قازاقستاندىق بىلعارى قولعاپ شەبەرى گەنناديي گولوۆكيننىڭ 5ء-شى مامىرعا جوسپارلانعان جەكپە-جەگىنىڭ وتەتىن جەرىن اتادى. بۇل جايىندا Qamshy.kz اقپارات اگەنتتىگى Qsport.kz پورتالىنا سىلتەمە جاساپ حابارلايدى.

ايتا كەتەيىك، گەنناديي گولوۆكين 5ء-شى مامىر كۇنى ساۋل الۆارەسپەن لاس-ۆەگاس قالاسىنداعى T-Mobile Arena سپورت كەشەنىندە جەكپە-جەك وتكىزۋ كەرەك بولعان. الايدا «كانەلو» دوپينگ داۋىنا بايلانىستى كەزدەسۋدەن باس تارتتى.

ەندى GGG كەلەسى جەكپە-جەگىن اقش-تىڭ كاليفورنيا شتاتىندا، لوس-اندجەلەس قالاسىنا قاراستى كارسون قالاسىندا وتكىزەدى. وتانداسىمىز 27000 ادام سىياتىن StubHub Center ارەناسىندا جۇدىرىقتاسادى.

ەسكە سالايىق، گولوۆكينمەن قارىمتا كەزدەسۋگە ەكى اي قالعاندا الۆارەستىڭ قانىنان كلەنبۋتەرول اتتى دوپينگ تابىلعان. مەكسيكالىقتىڭ كومانداسى مۇنى زارارلى ەتتى تاماققا پايدالانۋمەن بايلانىستىردى. دەگەنمەن نيەۆادا شتاتىنىڭ اتلەتيكالىق كوميسسياسى الۆارەستى ازىرگە جەكپە-جەكتەردەن شەتتەتتى. گەنناديي گولوۆكين مەن ساۋل الۆارەس اراسىنداعى العاشقى جەكپە-جەك 2017 جىلدىڭ 17 قىركۇيەگىندە ءوتىپ، تەڭ ناتيجە تىركەلگەن بولاتىن.

قازىرگى تاڭدا گەنناديي گولوۆكينمەن جەكپە-جەك وتكىزۋگە بەس بوكسشى ءۇمىتتى. الايدا ەشقايسىسىنىڭ ەسىمى ازىرگە اتالعان جوق.