اتىراۋدا 2016 جىلعى ساۋىردە وتكەن «جەر شەرۋىنە» قاتىسقاننان كەيىن بەس جىلعا سوتتالعان جەرگىلىكتى بەلسەندى تالعات ايان بوستاندىققا شىعاتىن بولدى، - دەپ حابارلايدى Qamshy.kz اقپارات اگەنتتىگى.
بۇل جايىندا تالعات اياننىڭ اكەسى ءارى ادۆوكاتى تولەپقالي ايانوۆ حابارلادى. ونىڭ سوزىنشە، ءساۋىردىڭ 13-ىندە اقتوبە قالالىق №2 سوتى قازىرگى كەزدە وسى قالاداعى ك-168/2 كولونياسىندا قاماۋدا وتىرعان تالعات اياننىڭ ءىسى بويىنشا ناۋرىزدىڭ 25-ىندە تۇسكەن ءوتىنىشتى قاراعان.
— سۋديا تەڭىزباي الدانوۆ تالعاتتىڭ جازاسىنىڭ قالعان بولىگىن باس بوستاندىعىن شەكتەۋ تۇرىنە وزگەرتۋ تۋرالى شەشىم قابىلدادى. پروكۋرور قارسىلىق بىلدىرگەن جوق، سوت شەشىمى ءساۋىردىڭ 29-ىندا كۇشىنە ەنەدى، - دەدى تولەپقالي ايانوۆ.
2016 جىلعى 24 ساۋىردە اتىراۋداعى يساتاي مەن ماحامبەت الانىڭا جۇزدەگەن ادام جينالعان. ولاردىڭ «جەردى شەتەلدىكتەرگە جالعا بەرمەۋ جانە ساتپاۋ» تۋرالى تالابىن وبلىس اكىمى نۇرلان نوعايەۆ اقورداعا جەتكىزۋگە ۋادە ەتكەن.
اتىراۋداعى ميتينگىدەن كەيىن كوپ ۇزاماي بەلسەندىلەر ماكس بوقايەۆ پەن تالعات ايان قاماۋعا الىنىپ، ەكەۋىنىڭ ۇستىنەن قىلمىستىق كودەكستىڭ بىرنەشە بابى بويىنشا ءىس قوزعالدى. 2016 جىلى قاراشانىڭ 28ء-ى كۇنى اتىراۋدا سۋديا گۇلنار داۋلەشوۆا ازاماتتىق بەلسەندى ماكس بوقايەۆ پەن تالعات ايانعا ۇكىم شىعاردى.
سوت بەلسەندىلەردى «ارازدىق قوزدىردى»، «جالعان اقپارات تاراتتى» جانە «ميتينگ وتكىزۋ ءتاربىتىن بۇزدى» دەپ تانىپ، ءارقايسىسىن بەس جىلعا باس بوستاندىقتارىنان ايىردى. ۇكىمدە ولاردىڭ ءۇش جىلعا دەيىن قوعامدىق جۇمىسپەن اينالىسۋىنا تىيىم سالىنعانى دا كورسەتىلگەن.
تالعات اياننىڭ ادۆوكاتى تولەپقالي ايانوۆتىڭ ۇكىمگە نارازىلىق ءبىلدىرىپ قازاقستانداعى سوت ينستانيسيالارىنىڭ بارلىعىنا جازعان ارىزدارىنىڭ ەشبىرى قاناعاتتاندىرىلمادى.
تۋىستارى مەن قۇقىق قورعاۋشىلار سوتتالعان بەلسەندىلەردى قازاقستان زاڭىنا سايكەس تۇرعىلىقتى جەرى بويىنشا جازا وتەۋگە جىبەرەدى دەپ كۇتكەن ەدى. الايدا بوقايەۆ پەن اياندى اۋەلى اقتوبەدەگى تۇرمەگە جىبەرىپ، كەيىن الماتى ارقىلى ەتاپپەن سولتۇستىك قازاقستان وبلىسىنداعى ەس-164/3 قاماۋ مەكەمەسىنە جونەلتكەن. ادۆوكاتتارى سوتتالعان بەلسەندىلەردى قولدانىستاعى زاڭعا سايكەس جازاسىن وتەۋگە تۇرعىلىقتى ايماققا جىبەرۋدى سۇراپ بىرنەشە رەت شاعىم بەرگەن.
2017 جىلعى تامىزدا تالعات اياندى اقتوبەدەگى ك-168/2 كولونياسىنا اۋىستىرىپ، ماكس بوقايەۆتى پەتروپاۆلداعى تۇرمەدە قالدىرعان ەدى. تۇتقىن بوقايەۆتى جاقىندا پاۆلودارعا "ەمدەۋگە" جىبەرگەنى تۋرالى حابارلاندى.
