مىسىردىڭ «Cairo Opera House» باس كونسەرتتىك ساحناسىندا «رۋحاني جاڭعىرۋ» باعدارلاماسىن ىسكە اسىرۋ اياسىندا ق ر حالىق ءارتىسى ايمان مۇساقوجايەۆا جانە ءقازۇوۋ ستۋدەنتتەرىنىڭ قاتىسۋىمەن كونسەرت ءوتتى.
ق ر حالىق ءارتىسى ايمان مۇساقوجايەۆا ماەسترو ايدار تورىبايەۆ باسقاراتىن قازاق ۇلتتىق ونەر ۋنيۆەرسيتەتىنىڭ سيمفونيالىق وركەسترى سۇيەمەلدەۋىمەن ونەر كورسەتتى.
«مىسىردا بولعان كۇندەرىمىز وقيعالارعا تولى بولدى: بۇكىل الەمدەگى جاڭالىقتار تۋرالى حابار بەرەتىن «ON TV» مىسىر تەلەارناسىنىڭ تىكەلەي ەفيرىنە قاتىستىق. مىسىرداعى ق ر ەلشىسى ارمان يساعالييەۆپەن بىرگە ءوزىمىزدىڭ كونسەرتتىك تۋرىمىز جانە «رۋحاني جاڭعىرۋ» مادەني جوباسى تۋرالى سۇحبات بەردىك.
جۋىردا اممان مەن الەكساندريادا، ەندى كايردە ونەر كورسەتىپ جاتىرمىز، بۇل وسى ايماقتاعى قازاق ۇلتتىق ونەر ۋنيۆەرسيتەتىنىڭ العاشقى كونسەرتتەرى. ولار ۇلكەن تابىسپەن ءوتىپ، كورەرمەندەر تاراپىنان قولداۋعا يە بولدى. «كاير وپەراسى» مەن «الەكساندريا وپەراسى» - بۇل تاماشا اكۋستيكاسى بار كەرەمەت زالدار، كورەرمەندەردىڭ ىستىق ىقىلاسى سەزىلۋدە. وسىنداي تىڭدارماندار الدىندا ونەر كورسەتۋ ءبىز ءۇشىن ۇلكەن ابىروي. ءبىزدىڭ انشىلەر، جەكە ورىنداۋشىلار مەن وركەستر كونسەرتتەن كەيىن زالدا بولعان ەرەكشە كۇيدى سەزىنىپ، «كاير وپەراسىندا» العاش رەت وسىنداي تابىستى ونەر كورسەتۋلەرىنە وتە ريزا بولدى. «كاير وپەراسىنىڭ» تاريحي عيماراتى جانە مىسىرداعى تاعى بىرنەشە عيماراتتار سۋەس ارناسىنىڭ اشىلۋىنا وراي سالىنعانىن بىلەمىز... وسى تەاترعا قانشا جىل ەكەندىگىن، ونىڭ ساحناسىندا قانداي ۇلى ارتىستەر ونەر كورسەتكەنىن، ونىڭ قابىرعالارى قانشاما داستۇرلەردى بويىڭا سىڭىرگەنىن ەلەستەتىپ كورىڭىز...! ارينە، مەن جانە ستۋدەنتتەرىم وسى ساحنادا ونەر كورسەتۋگە وتە قۋانىشتى بولدىق. ءقازۇوۋ ستۋدەنتتەرى ۇمىتىلماس اسەر الدى. مىسىرمەن جاقىنىراق تانىستىق، ەندى بولاشاقتا كايردىڭ ونەر اكادەمياسىمەن ىنتىماقتاستىق تۋرالى مەموراندۋم جانە شارتقا قول قويۋ جوسپارلانۋدا. ونەر اكادەمياسىنا كايردىڭ بارلىق مادەني ينستيتۋتتارى، اتاپ ايتقاندا تەاتر اكادەمياسى، كينو اكادەمياسى، مۋزىكا اكادەمياسى، حورەوگرافيا اكادەمياسى كىرەتىنىن اتاپ وتەمىن. ءبىزدىڭ كاسىبي حالىق ۇجىمدارىمىز رامادان مەرەكەسى اياسىندا كايردە ونەر كورسەتەتىنى تۋرالى كەلىسىمگە كەلدىك. بولاشاقتا بىرلەسىپ ىسكە اسىراتىن ءالى كوپتەگەن جوبالارىمىز بار، ولاردىڭ ءبىرى – مىسىردىڭ تەاتر فەستيۆالى، نەمەسە مىسىر كينوفەستيۆالى، ءىس-شارالار اياسىندا ستۋدەنتتەر ءوز جۇمىستارىن ۇسىنا الادى. الدىمىزدا قويىلعان مىندەتتەر وتە اۋقىمدى ءارى قىزىقتى، وزىمىزگە ساتتىلىك تىلەگىمىز كەلەدى. اكادەميالىق ۇتقىرلىق باعدارلاماسى بويىنشا كايردەگى دوستارىمىزدى استاناعا شاقىرۋدى جوسپارلاپ وتىرمىز. ارينە، مىسىردى ءار كەلگەن سايىن جاڭادان اشۋعا بولادى، مىسالى ەجەلگى زامان ەسكەرتكىشتەرىنىڭ 80 % ساقتالعان عاجايىپ لۋكسور قالاسى، الايدا وسى جولى بۇل قالاعا بارۋ ءساتى تۇسكەن جوق. دەگەنمەن، الەمنىڭ ەڭ ەجەلگى كىتاپحاناسى – الەكساندريالىق كىتاپحاناعا بارىپ قايتتىق. وسىنداي ساپارلار جاس مۋزىكانتتار ءۇشىن وتە ماڭىزدى، سەبەبى ەرەكشە شابىت بەرىپ، تاڭعاجايىپ ءارى سيقىرلى الەمنىڭ سىرلارىن اشادى...» - دەدى كەرەمەت ونەر كورسەتۋدەن كەيىن ايمان مۇساقوجايەۆا.
«قازاق حالقىنىڭ اسەم اۋەندى مۋزىكاسىمەن تانىسپىن، استانادا بىرنەشە اي بويى تۇردىم، EXPO-2017 كورمەسىنە دە قاتىستىم. سول كەزدە قازاق مۋزىكاسىن سۇيسىنە تىڭداي باستادىم. بۇگىن تاماشا كونسەرت بولدى، ۇمىتىلماس اسەر الدىم. سىزدەردىڭ مۋزىكاڭىزدى تاماشالاۋعا مۇمكىندىك بەرگەن قازاق حالقىنا العىسىم شەكسىز» - دەپ اتاپ ءوتتى مىسىردىڭ ونەركاسىپ مينيسترلىگىنىڭ باس مەنەدجەرى Haitham El Mashad.
«بۇگىن تاماشا كونسەرت بولدى، قاتىسقانىما وتە ريزامىن. ءسىزدىڭ پرەزيدەنتىڭىز نۇرسۇلتان نازاربايەۆقا قازاق مادەنيەتىن بۇكىل الەمگە تانىتىپ جاتقانى ءۇشىن، جانە وسىنداي كونسەرتتى ۇيىمداستىرعانى ءۇشىن مىسىرداعى ق ر ەلشىسى ارمان يساعالييەۆكە ۇلكەن العىسىمدى بىلدىرگىم كەلەدى. مەنىڭ اتا-بابالارىم كەزىندە تارازدان مىسىرعا قونىس اۋدارعان، سوندىقتان تەگىم «El Tarazi». بارشا قازاقستاندىقتارعا كايردەن جالىندى سالەم جولدايمىن» - دەدى كونسەرت تاماشالاعان كورەرمەندەردىڭ ءبىرى.
كونسەرت باعدارلاماسىندا قازاقتىڭ تانىمال ۇلتتىق شىعارمالارى، اتاپ ايتقاندا ە.راحمادييەۆتىڭ «قۇداشا دۋمان»، «كۇي شاشۋى»، ر.ابدىساگيننىڭ «Aftersounds of Romanticism» شىعارماسى، ل. ءحاميديدىڭ «كازاق ءۆالسى»، سونداي-اق پ.چايكوۆسكيي، دج. ءروسسينينىڭ الەمدىك كلاسسيكاسىنىڭ ۇزدىك شىعارمالارى جانە ت.ب. ورىندالدى.
كونسەرتكە قازاق ۇلتتىق ونەر ۋنيۆەرسيتەتىنىڭ ەۋرازيالىق سيمفونيالىق وركەسترى، سكريپكاشىلار ءانسامبلى، «شابىت» دومبىراشىلار ءانسامبلى، ءقازۇوۋ وقىتۋشىلارى مەن ستۋدەنتتەرى قاتىستى.
كونسەرت قازاقستان رەسپۋبليكاسىنىڭ مادەنيەت جانە سپورت مينيسترلىگى مەن مىسىرداعى قازاقستان رەسپۋبليكاسىنىڭ ەلشىلىگىنىڭ قولداۋىمەن ۇيىمداستىرىلدى.
