مۇنداي دەرەكتەردى وڭىرلىك كوممۋنيكاسيالار قىزمەتىندە وتكەن بريفينگتە ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ جۇرتشىلىقپەن بايلانىس جونىندەگى دەپارتامەنتىنىڭ ديرەكتورى بەردالين ارمان تىلەكتەس ۇلى، سىبايلاس جەمقورلىققا قارسى ستراتەگيانىڭ ورىندالۋىن باقىلاۋ بويىنشا رەسپۋبليكالىق ارنايى مونيتورينگتىك توپتىڭ مۇشەسى  دۋامبەكوۆ مۇساعالي سارسەنباي ۇلى، قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتىنىڭ باسشىسى نالىبايەۆ ماقسۇت ىبرايحان ۇلى،  سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ جامبىل وبلىسى بويىنشا دەپارتامەنت باسشىسىنىڭ ورىنباسارى راحيموۆ ارمان تاستەمىر ۇلى ايتتى.

ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىلا اگەنتتىگىنىڭ جامبىل وبلىسى بويىنشا دەپارتامەنتىمەن شۋ اۋدانى اكىمدىگىنىڭ اۋىل شارۋاشىلىعى ءبولىمىنىڭ قىزمەتىنە جۇرگىزىلگەن سىبايلاس جەمقورلىق تاۋەكەلدەرىنە تالداۋ جۇرگىزۋ كەزىندە مۇددەلەر قاقتىعىسى انىقتالدى.

اتاپ ايتقاندا، تالداۋ بارىسىندا، شۋ اۋدانى اۋىل شارۋاشىلىعىنىڭ ءبولىم باسشىسى س.سەيداحمەتوۆ، تەك 2014-2016 جىلعى ارالىقتا "بەكتىباي"، "بەكتىباي-1"، "سامات"، "ەركىن"شارۋا قوجالىقتارىنا جانار-جاعار ماي شىعىندارىنا سۋبسيديا كولەمى 159 910 000تەڭگەنى قۇرايتىن سۋبسيديا ءبولىپ، شۋ اۋدانى بويىنشا وسى باعىتتاعى ەڭ ءىرى سۋبسيديالار الۋشىلاردىڭ ءبىرى ەكەندىگى انىقتالدى.

سونداي-اق، سۋبسيديا العان اۋىل شارۋاشىلىعى تاۋارىن وندىرۋشىلەردىڭ ءبىرى بولىپ تابىلاتىن "بەكتىباي"، "بەكتىباي-1"، "سامات"، "ەركىن" شارۋا قوجالىقتارىنىڭ باسشىلارى، ءوز كەزەگىندە س.سەيداحمەتوۆتىڭ جاقىن تۋىستارى - اعاسى، كەلىنى، ايەلى جانە بالاسى ەكەندىگى بەلگىلى بولدى.

ءوز كەزەگىندە ءبولىم باسشىسى، جۇيەلى تۇردە مەملەكەتتىك قىزمەتشىگە قويىلعان شەكتەۋلەردى بۇزا وتىرىپ، جوعارىدا كورسەتىلگەن شارۋا قوجالىقتارىنىڭ سۋبسيديا الۋعا ۇسىنىلعان وتىنىمدەرىن قاراپ، ۆەدومستۆوارالىق كوميسسيا ءتوراعاسىنىڭ ورىنباسارى رەتىندە جيىنتىق اكتىلەرگە قول قويىپ كەلگەن.

تالداۋ ناتيجەسىندەگى ۇسىنىستار نەگىزىندە ءبولىم باسشىسى قىزمەتىنەن بوساتىلىپ، قىلمىستىق قۇدالاۋ ورگاندارىمەن س.سەيداحمەتوۆكە قاتىستى قىلمىستىق ءىس قوزعالدى.