«اق جول» فراكسياسى ۇلتتىق قوردىڭ قاراجاتىن اناعۇرلىم ىجداھاتتىلىقپەن پايدالانۋعا كوشۋدى قۇپتايدى – بۇل تۋرالى ازات پەرۋاشيەۆ 2018-2020 جىلدارعا ارنالعان رەسپۋبليكالىق بيۋدجەتكە وزگەرىستەر مەن تولىقتىرۋلار ەنگىزۋ تۋرالى زاڭ جوباسىن تالقىلاۋ بارىسىندا مالىمدەدى.
ءوز سوزىندە «اق جول» پارتياسىنىڭ كوشباسشىسى مەملەكەت باسشىسىنىڭ جولداۋىن جانە بەس جاڭا الەۋمەتتىك باستامانى ىسكە اسىرۋعا باعىتتالعان بيۋدجەت تۇزەتۋلەرىن قولداپ، بۇل تۋراسىندا فراكسيانىڭ ۇستانىمىن ءبىلدىردى.
«تاۋار نارىقتارىنداعى احۋالدىڭ جاقسارۋىنا جانە مۇناي باعاسىنىڭ ءوسۋى بولجامىنىڭ بولۋىنا وراي ۇلتتىق قوردى كەزەڭ-كەزەڭمەن تولىقتىرۋعا مۇمكىندىكتىڭ پايدا بولۋ فاكتىسى اسا ماڭىزدى كوڭىل قۋانتارلىق ءسات بولىپ سانالادى.
سونىمەن قاتار، ۇكىمەتتىڭ اعىمداعى ەكونوميكالىق مۇمكىندىكتەرگە سۇيەنە وتىرىپ، ۇلتتىق قورعا قوسىمشا ساۋالدار جولداۋدان باس تارتقانىن ءپوزيتيۆتى فاكت رەتىندە اتاپ ءوتۋ كەرەك»، - دەدى پەرۋاشيەۆ.
ول وتكەن جىلداردا ءتۇرلى ماقساتتار ءۇشىن قاراجات الۋ ينۆەستيسيالىق كىرىستەردەن الدەقاشان اسىپ تۇسكەن كەزدە جانە قوردىڭ جيناقتاۋشى بولىگىنە قول سۇعا باستاعان ساتتە ەل ۇكىمەتىنىڭ شامادان تىس ۇلتتىق قوردىڭ ترانسفەرتتەرىمەن اۋەستەنۋىن پارلامەنتتىك فراكسيانىڭ بىرنەشە مارتە سىنعا العانىن ەسكە سالا كەتتى.
«سوندىقتان دا، بۇگىنگى كۇنى «اق جول» فراكسياسى ۇلتتىق قوردىڭ قاراجاتىن اناعۇرلىم ۇقىپتى پايدالانۋعا جانە ونىڭ كىرىستەرىن ارتتىرۋعا كوشۋدى ءسوزسىز قۇپتايدى»، - دەپ اتاپ ءوتتى دەپۋتات.
پەرۋاشيەۆ بۇل اقشانىڭ بىزگە ەمەس، قازاقستاندىق بولاشاق جاس ۇرپاققا تيەسىلى ەكەنىن باسا ايتتى.
«ءبىزدىڭ مىندەت – ۇلتتىق قور قارجىسىن جۇمساپ تاستاۋ ەمەس، ونى ارتتىرا ءتۇسۋ.
تەك ءبىر-اق نارسە تۇسىنىكسىز، نەلىكتەن وسى ءبىر قاراپايىم عانا اقيقاتتى ۇعىنۋ ءۇشىن وسىنشاما ۇزاق ۋاقىت قاجەت بولدى»، - دەپ ول ءوز ويىن تولىقتىرىپ ءوتتى.
بۇدان باسقا، «اق جول» جەتەكشىسى مەملەكەت باسشىسىنىڭ بەس الەۋمەتتىك باستاماسىنىڭ ءبىرقاتار قوعامدىق سۇرانىسقا يە باسىمدىققا يە ماسەلەلەردى شەشۋگە باعىتتالعان قاراجاتتىڭ ءبولىنۋىن ايرىقشا اتاپ ءوتتى.
«جۋىردا عانا بولعان دەپۋتتاتتاردىڭ وڭىرلەرگە ساپارى اياسىندا وسى بەس باستامانى حالىقپەن تالقىلاۋ پرەزيدەنتتىڭ بەرگەن تاپسىرمالارى مەن ونىڭ ءبىزدىڭ وتانداستارىمىزدىڭ باسىم كوپشىلىگى ءۇشىن وزەكتىلىگى اسا قاجەتتىلىككە يە ەكەنىن انىق كورسەتتى.
ءبىزدىڭ فراكسيا بيۋدجەتتىڭ وسى باپتارىن قولداۋعا دايىن، - دەپ مالىمدەدى پەرۋاشيەۆ.
پىكىر قالدىرۋ