«سامۇرىق-قازىنا» اق-دا 2018-2028 جىلدارعا ارنالعان جاڭا دامۋ ستراتەگياسى قابىلداندى جانە ترانسفورماسيا باعدارلاماسى جاڭارتىلدى. قۇجات وپەراسيالىق جانە ينۆەستيسيالىق قىزمەتى تولىعىمەن كوممەرسياعا باعىتتالعان «Temasek» (سينگاپۋر)، «Khazanah» (مالايزيا)  جانە «Mubadala» (بىرىككەن اراب امىرلىكتەرى) ءتارىزدى تابىستى تاۋەلسىز قورلاردىڭ تاجىريبەسىن ەسكەرە وتىرا ازىرلەندى.

جاڭا ستراتەگياعا سايكەس، قور قورجىن كومپانيالاردىڭ كىرىسىن كوبەيتۋ ارقىلى ۇلتتىق ءال-اۋقاتتى ارتتىرۋعا باسىمدىق بەرەمەك.

«سامۇرىق-قازىنا» اق جاڭا ستراتەگياسىندا ءۇش نەگىزگى ماقساتتى بەلگىلەدى: كومپانيالاردىڭ تيىمدىلىگىن ارتتىرۋ، «سامۇرىق-قازىنا» پورتفەلىن (اكتيۆتەردى) ءتيىمدى باسقارۋ جانە تۇراقتى دامۋ. بۇل ماقساتتار 4 ستراتەگيالىق باستاما ارقىلى جۇزەگە اسىرىلادى:

ءبىرىنشى – كومپانيالاردىڭ قارجىلىق تۇراقتىلىعىن نىعايتۋ ارقىلى كومپانيالاردىڭ تابىستىلىعىن ارتتىرۋ، ترانسفورماسيا باعدارلاماسىن جۇزەگە اسىرۋ جانە سيفرلاندىرۋ، بيزنەس پەن ۇيىمداستىرۋ قۇرىلىمىن وڭتايلاندىرۋ ارقىلى الەۋەتتى انىقتاۋ؛

 ەكىنشى -  قورجىن كومپانيالاردىڭ پورتفەلدىك قۇرىلىمىن وڭتايلاندىرۋ. بۇل باعىتتا جەكەشەلەندىرۋ باعدارلاماسىن جۇزەگە اسىرۋدى اياقتاۋ، ينۆەستيسيالىق جوبالار پورتفەلىن قايتا قاراستىرۋ جانە ستراتەگيالىق ەمەس اكتيۆتەردەن شىعۋ ارقىلى ستراتەگيالىق سەرىكتەستەردى تارتۋ جوسپارلانعان؛

ءۇشىنشى – كىرىستى ءارتاراپتاندىرۋ. بۇل قازاقستاندىق بيزنەسپەن جانە شەتەلدىك ارىپتەستەرمەن ءتيىمدى بىرلەسكەن ينۆەستيسيالار ارقىلى جەكە كاپيتالدى دامىتۋعا باعىتتالعان؛

ءتورتىنشىسى – كورپوراتيۆتى باسقارۋ جانە تۇراقتى دامۋ.

وسى ماقساتتاردى ىسكە اسىرۋ - قوردىڭ جاڭا قۇرىلىمىن ەنگىزۋگە، قارجىلىق تۇراقتىلىقتى نىعايتۋعا، ينۆەستيسيالىق تارتىمدىلىقتى ارتتىرۋعا، قارجىنى ءتيىمدى باسقارۋدى قامتاماسىز ەتۋگە جانە اكتيۆتەردى ۇلعايتۋعا مۇمكىندىك بەرەدى. بۇل مىندەتتەردىڭ ساپالى جۇزەگە اسۋىن قامتاماسىز ەتۋ ءۇشىن قوردىڭ اكتيۆتەر پورتفەلى قايتا قۇرىلىمدانادى. 
      قازىرگى ۋاقىتتا، 332 كومپانيانى قامتيتىن قوردىڭ اكتيۆتەردى باسقارۋ جۇيەسى قۇرىلىمى كۇردەلى 5-6 دەڭگەيدەن تۇرادى.  بۇل جۇيە باسقارۋ جۇمىسىن قيىنداتۋدا. سوندىقتان، جەكەشەلەندىرۋدىڭ كەشەندى جوسپارىنا سايكەس، قور قۇرىلىمىنان 51 كومپانيا شىعارىلادى. تۇسكەن تابىستى قايتا ينۆەستيسيالاۋ بارىسىندا تاعى 102 بەيىندى ەمەس  كومپانيا اكتيۆتەر قاتارىنان شىعارىلادى.

وسىلايشا، قور قۇرىلىمىنا كىرەتىن كومپانيالار سانى 332-دەن 179-عا دەيىن قىسقارتىلىپ، باسقارۋ دەڭگەيى كۇردەلى 5-6 دەڭگەيدەن 3-كە دەيىن ازايادى.  ناتيجەسىندە «سامۇرىق-قازىنا» قورىنىڭ باسقارۋ قۇرىلىمى ءموبيلدى بولادى.

جاڭا ستراتەگيادا حالىقارالىق ينۆەستيسيالار پورتفەلىن ستراتەگيالىق قاداعالاۋدى قوردىڭ باسقارۋ كەڭەسى جۇزەگە اسىراتىنى ناقتىلانعان. ەكونوميكاداعى شوعىرلانۋ كورسەتكىشىنىڭ تومەندەۋى، جەرگىلىكتى ينۆەستورلاردىڭ جىلىستاماۋى، قوردىڭ حالىقارالىق دەڭگەيدەگى ورنىنىڭ نىعايۋى جانە تەحنولوگيالار مەن ءبىلىم ارقىلى پايدا تابۋ -  وسى ينۆەستيسيالاردىڭ ارتىقشىلىعى بولماق.

جاڭا ستراتەگياعا سايكەس، الەۋمەتتىك ينۆەستيسيالار «Temasek» جانە   «Khazanah» كومپانيالارىنىڭ تاجىربيەسىنە نەگىزدەلىپ، تەك ءبىلىم بەرۋگە،  «ادام كاپيتالىنا» جانە يننوۆاسيالار قۇرۋعا باعىتتالاتىن بولادى.

ەستەرىڭىزگە سالا كەتەيىك، 2018 جىلعى ءساۋىردىڭ 19-ى، قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ «سامۇرىق-قازىنا» ۇلتتىق ءال-اۋقات قورىن باسقارۋ جونىندەگى كەڭەستىڭ وتىرىسىندا «سامۇرىق-قازىنا» اق 2018-2028 جىلدارعا ارنالعان جاڭا دامۋ ستراتەگياسىن جانە جاڭارتىلعان ترانسفورماسيا باعدارلاماسىن ماقۇلدادى جانە بەكىتتى.

سونداي-اق، مەملەكەت باسشىسى قوردى دامىتۋعا باعىتتالعان جۇمىستارعا وڭ باعا بەردى.