الماتى اكىمى كۇندەلىكتى جۇمىس ساپارى بارىسىندا مەگاپوليستىڭ كوشەلەرى مەن اۋلالارىن اباتتاندىرۋ جونىندە ءبىرقاتار تاپسىرمالار بەردى جانە بوستاندىق اۋدانىنداعى گاگارين كوشەسىنىڭ جوندەلۋىن تەكسەردى.

الماتىدا بيىلعى جىلى ۇزىندىعى 155 كم بولاتىن 157 كوشەنى جوندەۋ، سونىمەن قاتار ماقاتايەۆ، بايتۇرسىنوۆ جانە جاروكوۆ كوشەلەرىندەگى ترامۆاي جولدارىن الىپ تاستاۋ مەن ولاردى اباتتاندىرۋ جوسپارلانعان. الماتىنى رەكونسترۋكسيالاۋ اياسىندا ءبىرقاتان نەگىزگى داڭعىلدار مەن كوشەلەر، سونىڭ ىشىندە اباي، ابىلايحان، دوستىق، نازاربايەۆ داڭعىلدارى جانە باسقالارى جاڭارادى، مودەرنيزاسيالانادى.

گاگايرن كوشەسىن ارالاعان كەزدە قالا باسشىسىنا جىل اياعىنا دەيىن بوستاندىق اۋدانىندا 36 كوشەنىڭ جوندەلەتىنى، 11 قوسىمشا بەكەت كەشەندەرىنىڭ ورناتىلاتىنى باياندالدى. ۇزىندىعى 7،4 كم. بولاتىن ارىق جۇيەسى جاڭارادى. 12 جەر استى جانە 7 جەر ءۇستى وتپەلى جولداردى جوندەۋ جوسپارلانعان. اۋدان تۇرعىندارىنىڭ ءوتىنىشى بويىنشا «يۋجنىي» جانە «درۋجبا» ساياباقتارى رەتكە كەلتىرىلەدى.

گاگارين كوشەسى بويىنداعى تروتۋارلار جۇرگىنشىلەر ءۇشىن اباتتاندىرىلادى، ارىق ناۋالارى قويىلىپ، قاجەتسىز كونسترۋكسيالار مەن قوعامدىق كەڭىستىكتەگى زاڭسىز قۇرىلىستار الىنادى، كوشەلەر جاسىلداندىرىلادى.

سونىمەن قاتار، ەگەر وتكەن جىلى بوستاندىق اۋدانىندا 30 اۋلا كۇردەلى جوندەۋدەن وتسە، بيىلعى جازدا 130 اۋلا جاڭارادى.

«شىندىعىنا كەلسەك، ءارقايسىمىز ءۇشىن قالا ءوز اۋلامىزدان باستالادى. كوشەلەر مەن داڭعىلداردى قايتا جاڭعىرتىپ، الماتىلىق اۋلالاردىڭ قازىرگى جاعدايىنا كوز جۇمىپ قاراي المادىق. سوندىقتان مەملەكەت باسشىسىنىڭ جولداۋىن جانە «پرەزيدەنتتىڭ بەس الەۋمەتتىك باستاماسىن» ەسكەرە وتىرىپ، ءبىز بيۋدجەتتى قايتا قاراپ، وعان بارىنشا الەۋمەتتىك نەگىز بەردىك، ءارى ناقتىلى جوبالار مەن ناتيجەلەرگە باعىتتادىق. ەگەر وتكەن جىلى ءبىز 455 اۋلا الاڭدارىن اباتتاندىرساق، بيىلعى جىلى قالانىڭ بارلىق اۋداندارىندا 585 اۋلا قوسىمشا جوندەلەتىن بولادى»، - دەدى باۋىرجان بايبەك.

ايتا كەتەرلىگى، الماتى اكىمى بۇرىندارى تروتۋارلاردى تەكسەرۋدەن وتكىزىپ، جاياۋ جۇرگىنشى قوزعالىسىن قيىنداتاتىن زاڭسىز سالىنعان قۇرىلىستاردان ارىلۋدى تاپسىرعان ەدى. ستيحيالى تۇراقتاردىڭ الدىن االۋ جانە جۇرگىنشى قاۋىپسىزدىگىن كۇشەيتۋ ماقساتىندا كوشەدەن كىرەتىن قوزعالىستى تارىلتۋ جانە تروتۋرارلاردى تيىسىنشە كوركەيتۋ جوسپارلانعان.