وتكەن جىلى الماتى قالاسىندا شىعارماشىل جاستار ءۇشىن دەلفيي ويىندارى ۇيىمداستىرىلدى.
بۇل تۋرالى الماتى قالاسى وڭىرلىك كوممۋنيكاسيالار قىزمەتىنىڭ الاڭىندا الماتى قالاسى جاستار ساياساتى ماسەلەلەرى جونىندەگى باسقارماسىنىڭ باسشىسى شىڭعىس جۇماعالي ۇلى ايتتى.
ونىڭ ايتۋىنشا، جاستاردى ونەرگە جانە ۇلكەن ازاماتتىق مادەنيەتكە باۋلۋ ءۇشىن قالامىزدا ءبىرىنشى رەت شىعارماشىل جاستار ءۇشىن دەلفيي ويىندارى ۇيىمداستىرىلدى.
2017 جىلدىڭ مامىر ايىنىڭ 20-شى جۇلدىزىندا «الاتاۋ» ءداستۋرلى ونەر تەاترىندا قالالىق دەلفيي ويىندارىنىڭ اشىلۋ سالتاناتى ءوتتى. ستۋدەنتتەر اراسىنداعى ءارتۇرلى ونەر سايىستارى (كونكۋرستار مەن فەستيۆالدار) جانە دە كورمەلەر مەن پرەزەنتاسيالار سەكىلدى بولىمدەردەن تۇردى. جاستار كونگرەسسى جانە دە ستۋدەنتتەر اليانسى ۇيىمداستىرعان سايىستا بارلىعى 300-دەن استام جاس ونەر يەلەرى باقتارىن سىنادى،-دەپ اتاپ ءوتتى ول.
ونەر ويىندارى ەكى جاستىق كاتەگوريا بويىنشا جۇرگىزىلدى: 10-15 جاس ارالىعىندا كىشى توپ، 16-21 جاس ارالىعىندا – ۇلكەن توپ. سايىسقا قاتىسۋشىلار 17 نوميناسيا بويىنشا بايگەگە ءتۇستى. اتاپ ايتساق: اسپاپتا ورىنداۋشىلىق، ەسترادا جانە اكادەميالىق ءان ايتۋ، تەاتر، فوتوگرافيا، سۋرەت ونەرى، تەلەجۋرناليستيكا جانە تاعى دا باسقا.
ونەر سايىسى وتكىزۋدەگى باستى ماقسات – جاس تالانتتاردى تابۋ مەن كومەك بەرۋ، سونداي-اق، شىعارماشىلىق ءوسۋى مەن اشىلۋىنا جاعداي جاساۋ بولىپ تابىلادى.
جەڭىمپازدار مەن جۇلدەلى ورىندارعا يە بولعان سايىسقا قاتىسۋشىلاردى ارنايى ديپلومدارمەن جانە دە سىيلىقتارمەن ماراپپاتتادى. سونىمەن قاتار، جەڭىمپازدار رەسپۋبليكالىق دارەجەدەگى XIII ۇلتتىق جاستار دەلفيي ويىندارىنا قاتىسۋعا جولداما الدى،-دەپ ايتىپ ءوتتى شىڭعىس جۇماعالي ۇلى ءوز سوزىندە.
