مەملەكەتتىك جاستار ساياساتىن دامىتۋ قورىنىڭ ۇيىمداستىرۋىمەن XIII سپارتاكيادا وتكىزىلدى.
بۇل تۋرالى الماتى قالاسى وڭىرلىك كوممۋنيكاسيالار قىزمەتىنىڭ الاڭىندا وتكەن بريفينگتە الماتى قالاسى جاستار ساياساتى ماسەلەلەرى جونىندەگى باسقارماسىنىڭ باسشىسى شىڭعىس جۇماعالي ۇلى ايتتى.
شىڭعىس جۇماعالي ۇلىنىڭ مالىمەتى بويىنشا، جاستاردىڭ جازعى ماۋسىمداعى بوس ۋاقىتتارىن ءتيىمدى پايدالانۋ جۇمىستارىن جۇرگىزۋ كەزىندە، حالىقارالىق بالالاردى قورعاۋ كۇنىنە وراي، مەملەكەتتىك جاستار ساياساتىن دامىتۋ قورىنىڭ ۇيىمداستىرۋىمەن، بارلىق ۇيىرمەلەر مەن سەكسيالارعا قاتىسۋشى جاستار مەن جاسوسپىرىمدەر اراسىندا XIII سپارتاكيادا وتكىزىلدى. سپارتاكيادانى وتكىزۋدەگى باستى ماقساتتاردىڭ ءبىرى جاستار اراسىندا سالاۋاتتى ءومىر سالتىن ۇستانۋدى قالىپتاستىرۋ.
سالتاناتتى ءراسىمدى وتكىزۋ بارىسىندا سپارتاكيادا ۇيىمداستىرۋشىلارى تاراپىنان قايىرىمدىلىق اكسيا وتكىزىلىپ، ول اكسيا بويىنشا مۇمكىندىگى شەكتەۋلى جاستارعا جانە مۇقتاج بالالارعا اربالار سىيلاندى. شارا سوڭى جاس تالانتتى ونەرپازداردىڭ مەرەكەلىك كونسەرتىنە ۇلاستى.
سپارتاكيادانىڭ ءبىرىنشى كۇنىندە شاعىن فۋتبولدان جارىس ۇيىمداستىرىلىپ، وعان 14-18 جاس ارالىعىنداعى جاسوسپىرىمدەردەن قۇرالعان 40 كوماندا قاتىستى،-دەپ اتاپ ءوتتى ول.
سپارتاكيادا فۋتبول، ۆوللەيبول، توعىزقۇمالاق، ۇستەل تەننيسى، جانە ستريتبول سەكىلدى ويىندار بويىنشا وتكىزىلدى. سايىسقا الماتى قالاسىنىڭ 200 اۋلا كلۋبتارىنان، 1300-دەي جاستار مەن جاسوسپىرىمدەر قاتىستى.
وسى شارا بارىسىندا، جاستاردى جۇمىسپەن قامتۋ ماقساتىندا، Facebook، Instagram، Twitter، ۆكونتاكتە سەكىلدى الەۋمەتتىك جەلىلەردە «Zhastar online» اتتى ارنايى اقپاراتتىق جوبا جاسالدى. جانە دە بۇل جوبانىڭ تاعى ءبىر ارتىقشىلىعى، تەك قانا بوس جۇمىس ورىندارىن ايتىپ قويماي، جۇمىستار جايىندا اقپارات بەرىپ، سونىمەن قاتار، ءدىني ەكسترەميستتىك جانە تەروريستتىك ءبۇلدىرۋ جۇمىستارىنىڭ الدىن الۋ جولدارى مەن قالاي كۇرەسۋ جولدارىن تۇسىندىرەدى، - دەپ بايانداماسىن تۇيىندەدى باسقارما باسشىسى شىڭعىس جۇماعالي ۇلى.
