«بۇكىلقازاقستاندىق ورمان وتىرعىزۋ كۇنى» اكسياسى كۇنى باتىس قازاقستان وبلىسىنىڭ اقجايىق اۋدانىندا «بۇلدىرشىندەر» ساياباعى بوي كوتەردى. مۇندا الداعى قىركۇيەكتە مەكتەپ قابىرعاسىن اتتاعالى وتىرعان «اقبوتا»، «بوبەك»، «ايانا»، «جىبەك» بالاباقشالارىنىڭ، چاپايەۆ №1 ورتا مەكتەبىندەگى «بالاپان» شاعىن ورتالىعىنىڭ بالعىندارى وزدەرىنىڭ اتا-انالارىمەن، وقىتۋشىلارىمەن بىرگە تال ەكتى. تۇرعىندار، اۋىلداعى ارداگەر ۇستازدار قاتىسقان سالتاناتتا اۋدان اكىمى ءادىل جولامانوۆ قۇتتىقتاۋ ءسوز سويلەدى.

– جىل وتكەن سايىن باقتىڭ اۋماعى كەڭەيىپ، اسىرەسە ءبىزدىڭ سابيلەرىمىزدىڭ سۇيىكتى ورنىنا اينالادى دەپ كۇتىلۋدە. توعىز جولدىڭ تورابىنداعى اۋدانىمىز ورتالىعىندا بارعان سايىن ساياباقتار، جاسىل جەلەك مولايىپ كەلەدى. مۇنىڭ بارلىعىن ساقتاپ، جاس ۇرپاقتى تۋعان جەردى ايالاۋعا باۋلۋىمىز كەرەك،- دەدى ول.

اتا-انالار اتىنان گۇلنار ساعادييەۆا ءسوز سويلەپ، بالالار ءۇشىن وسىنداي ورىندى جاساقتاۋشىلاردىڭ بارىنە العىسىن ارنادى. كولەمى 0.8 گا. اۋماقتى الىپ جاتقان ساياباققا بۇل كۇنى العاشقى 114 ءتۇپ اققايىڭ وتىرعىزىلدى.

اۋدان كاسىپكەرلەرى «تۋعان جەر» باعدارلاماسى اياسىندا ساياباق سالۋ، اۋىلدى اباتتاندىرۋ، سونىمەن قاتار اعاش وتىرعىزۋعا دا بەلسەنە قاتىسۋدا.